الثلاثاء، 6 أبريل 2010

مجادعات النمة94




بشرى ابراهيم
============
عاجت الدنيا واتبدل عماري خراب
نكبة حظ وجور ازمان ونجما غاب
اغرز ايدي في النعمة واخمو تراب
اقج للقمري ياعثمان واقبضو غراب


Osman Amin
============
صُح عاجت من قديم لا لمه لا أحباب
والمرق المسوس ما بسنِّدو الفلكاب
الخبر الأكيد البُشري جاهو خطاب
قآلتلو القسمه مآاف لا منقه لا ويكاب


Osman Amin
===========
روق البشري واحمد من الله فتح الباب
أتلزم ضو صبُر المولي خيلو قراب
صيبتن للحظوظ ما بتدركا الألباب
كم من قال غتس تلقاهو بكره شهاب


Msaad Yousif
===========
فراقكم فرتق الجرح الكان منوسربي
كل ما اطراكم تنهمل الدموع تجري
حار فراق الزول ان بقى معاك دقري
غيابك فقد وكل الناس بوراك تجرى



بشرى ابراهيم
=============
يابت الخضر راجلا ماصل وصامد
من ما مرضتي ساك النمة ضوها هامد
قالو لي إلتهاب لكن في شئا غامض
يستر ربي كما تبقى مرضت حامد

الشاعر المخستك
============
نحن أهل الثبات أهل الكرم والجود
فراس الكلام الما بنخون لعهود
نمشيها الدروب إن كان ملانة سدود
وساعة الحارة ديك حرم تشوفنا أسود


مجادعات النمة93



Abdallah Alhraa
=============
نحن الفوتنا مو هشكي وغناوي ونم
ونحن الما بنقول الماتو مننا كم
نحن ان قمنا بنفور زي قدور السم
ديدان عركة الضحوي اب حليباً دم

Msaad Yousif
=============
نحن الفوتنا ما طرب دلوكة وشتم
ونحن البندفع مابنقول ادينا كم
نحن سيفنا بقطع مابحقن دم
اسود فرتاقين صفوف وكت تتلم

Abdallah Alhraa
=========
نحن بنضبح الشايل نعشي الضيف
ونحن بننطر الدعجــــه ونتــم الكيـــف
نحن الفي المحاص نكرم نروي السيف
بي دم العلوج تريــــــــااان ووزنو خفيف

Msaad Yousif
============
نحن كرمنا واضح مابدورلو توصيف
ونحن بندفع العاتى ونراشي ضعيف
وفى راس الخصيم بنجرتقو سيف
مابنهاب الموت وريحة الدم متل بن الكيف

Abdallah Alhraa
============
نحن الفي الهزل والفارقه مابنقيف
ونحن نفوسنا في الطاعات منافيه الزيف
نحن المن حسد طاهر قلبنا نضيف
ونحن تملي للمحتاج دمرنا خريف

Nada AbdalMonem Hassan Madani
=======================
نحن والله لابنخاف ولابنعاف ولابنتهدد
لا بنكل ولا بنمل ولا بنتردد
كمان للزول البخون عشرتنا مابنتودد
نبقالو البلا في كل فجه ممدد

Elsheikhe Ibrahim
=============
الهمباتى ياب سيفا دوام مسلول
تحجابو الضعاف فى الحاره بيه تصول
كفانا مفاحآت سيبنا الننم ونقول
وكلنا فى حجاك فجر قنابلك دووول

الصديق تبار البطحاني
=============
الفيس بوك منور بيك وين ياحليلك
زمان كنت رسايل تاتي من ايميلك
بت العمدة روقة الغمدة شدة حيلك
حزني الكان جيوش فر بسماع صوت خيلك

بت العمدة
=========
الليلة البرق في الصفحة جاناملمع
ود تبار علينا اليوم قروبنا جن متجمع
رسالي الزارتك فيها الكلام متطمع
حزنك زي مطر فرقت سحاب مجمع

Elsheikhe Ibrahim
==============
سلام ياناس سلام شاشاينا جد بنريدو
ولو غاب منو زول يمسخ علينا قصيدو
دحين يا أخوانا هوى كل واحد يشحد سيدو
يعجل بى الشفاء ويتم سلامة ميدو

Bent Alomda Hassan
===============
كبس الهم علي ,, فاض الشجن ستفني..
زااااد الشوق على .. الا البعاد كتفني..
لي ريحة الجرف والنيل هواو يختفني..
فرقو على صعيب دا الشوقو تب نتفني

مجادعات النمة92



Elsheikhe Ibrahim
==============
اهل النمه اتلومتو واللوم زاد شديد
لا الهمباتى رحب بينا لا سراجا بمد لنا إيد
لا حافظ بقول حرم ويتكى دعول غليد
ويقول جيبو اللحم والشيه للضيف الجديد

Hafiz Alamin
===========
حباب ود ابراهيم ومتلوم معاك شديد
حرمتنى الظـروف من متعــة الترديد
هايم فى غربه حزنان وحيد وشريد
زادى غنواتكم الا الظروف ما بالايد

أمونه حسن
=========
حبابك ود ابراهيم الله لا جاب اللـوم
حباب ألف يبراك السلام بالكــــــوم
أدخل لا جوه النم مودايرلو عـــــزوم
فك المحنه النمه ديارنا وذاد للمحروم

Hafiz Alamin
============
حبابك وراجنك زى قدوم السيره
نطرب نسوى غنانا دلوكه والتصقيره
ننم مع الشعار حروفا" سمح تدبيره
جـبنه موزونـه وشاينا ملـى الكفتيره

Elsheikhe Ibrahim
==============
تسلموا كلكم شابات وشيب وشباب
عارف قدركم اصحاب سروج وركاب
وضيفكم من يهل قبال يدق الباب
بسمع من بعيد حرم تدخلوا حباب

Khalid Alahmady
================
حافظنا اللبيب أصلو ديمة مبادر
ود الأصول ضيفوبيكرمو يباشر
بعد تشبع لحم ترا (الكفتيرة)شايا النادر
حبابك بينا ياشيخ العرب بس لاتغادر

Hafiz Alamin
==========
حلوه يا دامرجى دائما" تفهم المدسوس
يا ود عرقا" سليم مابينخرو سوس
فيك نباهة ابواتك باينه خاتيه لبوس
ليك وحشه ياتيس الخلا المحبوس

الهمباتي الأغبش
============
مرحب بيك يا الشيخ المصفا وراسي
الاهناك شغلتا مخلوفة شلت راسي
نضمك مو غريب باريتو داشر حاسي
اظن قبل دحين نميت معاك سداسي

Bent Alomda Hassan
================
فيها الراحه والهواء والبراح والفي
فيها كرمها والوفاء والضمير الحي
فيها الفيها كلو وحاتها هي بخيل لي
فيها بطانه لا اقول ليك لا تقول لي..
الفرجوني...

Elsheikhe Ibrahim
=============
فيها سراجنا والحافظ وبت العمده
فيها الضل تقيل كم تحلى فيهو الغمده
فيها الخوه فيها الريده فيها موده
فيها رجال كرااااام نارن دوام متقده

Hafiz Alamin
===========
فيها عقول فيها حلو القول فيها العشره
فيها فحول اصول فيها شعرا" ماصل وندره
فيها اسود فيها رجال يسترو الحال لو تدرا
فيها الحور حلاة بناتا" لافيهن عفافن ستره

الأميرلاي السراج
===========
فوكا الما أنهبش قصباً مواقع سـيدو
فوكا سماحة الدهب المزين جـــيدو
فوكا وفوكا فيها الما ببارزو نــــــديدو
فوكا الأدبراوي السال قصد تشريدو

محمد احمد احمد
============
فيها خديد جميل زاد الجمال فصيدو
فيها عيون غزال كل البشوفا تصيدو
فيها جمال وشى مرسوم رسم فوق جيدو
فيها الفدله كيف زايناها تلت إيدو

Hafiz Alamin
========
فيها الفصـيح المابـلــفظ كلاما" فالس
وفــيــهــا الاصهــب الاتبراوى الفارس
فيها وفيها فيها دود الكوانى العــابس
الاغبش الهميم سيد الحوار ومجالس

Msaad Yousif
===========
فيها جميع القبائل وكلهم فراس
فيها سيوف بتقطع بين الكتف والراس
فيها جمال بناتنا عفيفات الانفاس
وفيها الخير وفيها الديمة شايلين الكاس

الأميرلاي السراج
==============
نيتي علي أم سماحة الشوق كتلني وزاد
ولعت وحرقت الشوق عملني رمــــــــــــــاد
لتيبة الفي الصعيد واردات علي أم نهــــــاد
شالت قلبي فر طارتبو ود حــــــــــــــــــــداد

وليد ابوزيد
==============
ضقت مجالس حديس والرجال بتسافر
وضقت المكاره ابان سعيرا" طافر
ضقت الصليل وسيوفنا ديمه تعافر
وضقت الكتير وقليلي دايما وافر

Msaad Yousif
===========
ضقت جلوس مع ابواتى البهدو الكافر
صقت نشوق فى خلايا صي وبسافر
ضقت ركوب على ضهر الاصهب وبعافر
الضقتو كتير ضقت السعية والخير الوافر

بت العمدة
=========
اليلة العصير انا جاني خبرا شين
قالولي العزيزة ميرودة ليها يومين
سلامتك بت خدر والله طقوك عين
نتمناهو شفاك ندعي ونقول امين

بت العمدة
=========
الخبر الاكيد قالو التهابك حااااد
صابك في الجيوب ومعاهن اللوزات
قالو الحمة جاتك وقالو حيلك مات
كمان داك الصداع الالمو بالجنبات

Elsheikhe Ibrahim
=============
سلامتك بت خدر انشاء الله أجرا وعافيه
يا بت الاصول اللى المحاسن حاويه
سالت الله الكريم بى نيه صادقه وصافيه
يزيد ليك الثواب ويسبغ عليك العافيه

Elsheikhe Ibrahim
==================
جريت نمى فوق بدرا بسوى بلاوى
فيهو دفاع حديد جد محترف ما هاوى
فيه وسط فريد قايدو الأمير الحاوى
وإن قلنا الهجوم سادمبا مع مساوى

Elsheikhe Ibrahim
============
البت الصغيره البتقت يادوبا
زارتنا العصير فى يوم مع حبوبه
ادتنى السلام واتبلمت بى توبا
خلت عقلى راح اضحك واقلب الهوبه


مجادعات النمة91



Mahmoud Algaily
=============
يا عثمان تعال شوف بشرى فاضح ريدو
مقتول من رمش بي سرحتو و غرويدو
هسه أكان دحين قلابتو غمزت صيدو
كان نلقاهو غاطس في العسل لي إيدو

الهمباتي الأغبش
===========
ودالجيلي ناس النمة زولا في النضم مبروك
بجيد جر الغنا البتق علي ضو الدغش مشبوك
كتير كلمني اخوي عثمان وختاهو الشكر متروك
اتمنيت اناضمك ليل وبيناتنا الحديث محبوك

Mahmoud Algaily
=============
يا الهمباتي أخوي خوتنا مي داب خوه
أخوك من العيون تعرف كلامو الجوه
انا و عثمان زمان بس كنا مركز قوة
و بركة الجيتنا انت الليلة نقدل سوا

Hafiz Alamin
===========
ان مـا اتربعت حـرم مـابـتـجـرو الـنـم
ووسطكم داخل لو انـال القدح والـذم
فرسـان حــاره ماكـم الـرعاع من جــم
لهب النار يخلى العود منو العطر بنشم

Osman Amin
============
علي الديوان تخش ود الامين تربيعه
ياك دود المحاصه اب نترتن لويعه
درب النمه فوق سالك خيولو سريعه
عرفتن في الرجال سمته وقلوبا شديعه..

Osman Amin
============
ياالجيلي قول عتمان للبشري خابرو بفيدو!
خسار ردحيب ومرديغ للقلب فوق قيدو
جن الطاويات حبالن قبلن يتمو جديدو
ترا حامد للقِسم وكل سمحه تملخ ايدو

الهمباتي الأغبش
==========
ريد عثمان يا الجيلي انعرف عقيدو
فوق شوك الغرام نبالو ليهو تصيدو
وكمتير العشق في غربة شد شديدو
الزول في البعاد رايد ام سماح وبتريدو

Mahmoud Algaily
==============
دكان الغرام قال لي ببيع بالكاش
كترتو الديون طششتو بينا طشاش
ياخي الريد رخيص شكة قميص في القاش
و ضحكة و نظرة بي جاي أجدعن ع الماش

أمونه حسن
==========
الغرام ما كاســــــوهو يوت بقــــــروش
إلا غراماً مزيف مو مـــن القلب منقوش
والنظره والضحكه مو جيابه دون معيوش
ما تعيب الغرام تاريك ات البراك مدروش

أبوبكرالجنيد يونس
===============
شيطان الغرام وشوش لي بى وشواش
قال لي التوبةاحصل بيها فكري الطاش
شغال اغوي في الإنسان مكشروباش.
كحلت بنية خلت شوفي يبقى طشاش

عثمان امين
============
الجرح ان دبس ما بتم علاجو الشاش
وشوكتن للكداد حردت علي المنقاش
هالصيد الورد من ايدنا دايمن طاش
موقصة قروش القصه حنك ونقاش

Hafiz Alamin
===========
الحنك المفلس آخـرة جـزاهـو طناش
موزونة القوام كل من شافا تبه وهاش
مجنون غرامها ضــارب الفيافى وطاش
كيفن تنولو رضاها ان ما اتوزنت قـراش


مجادعات النمة90



بشرى ابراهيم
===========
عثمان قولو قلبي الليلة طاري نديدو
واضحت حالي زي حال المتلت قيدو
لي امل الرجوع والماضي تاني اعيدو
ولا حكايتي زي جمل الطريفي وسيدو

أمونه حسن
=========
يابشري لي حبيبا لي تورت إقبـــالي
بي شوقي العلي اتقلب معاه حالـي
ياربي تقرب للايام أشوفو تاني قبالي
ويتم الفي الحشا الراكز في بالــــــي

Khalid Alahmady .........
=============
يالهمباتى هوى حرّم عديل بالغتّ
طولت الغياب شايفك زمان ماجادعتّ
يازول دحين للنمه تب مااشتقتّ
لايكون الشى داك حاميك ومنو ماخلستّ

الهمباتي الأغبش
===========
ياخالد اخوي قضيان الامر تالاي
اصبح من صباح لامن الاقي عشاي
متحقب صبر دفق وكل اعصابي تتلافاي
ولسة الحلة مانجضت بظبط في البهارات جاي

مجادعات النمة89





Abdallah Alhraa
=============
بنوت دار جعل للعفه راس ودليل
حرات صهلن وقعن كواني النيل
مابنقدر نجازيهن قدر ما نكيــل
شكراً ليهن الخلن لسانا طويل

Midoo Khidir
=============
جميلات في الخصال ماشفنا تاني مثيل
زيدات في الادب والعفة والتأصيل
تربية المكوك ياهن بعدلو الميل
عشان حفظ العروض وقعن قبيل في النيل

Hafiz Alamin
===========
سمح الاصل لابد فرعو جميل
وست البيت دائما" وليها ليها دليــل
تنصلح ان صلح وسار مشيهو عديل
وان فسد حصادو الخيبه والتنــكيـل

عبد القادر النوبي
==========
سواجعا فى وريف الايك ليك بتغنى
طربن بالتلاقى وشدوهن جننى
ساهر وحدى ناظم لقصيدى وفنى
انا ياربى هل سالو الحبايب عنى

Midoo Khidir
=========
يابدر التمام المن سماهو ادلا
راجياك من سنين وشوقي ليك ماكلا
حسب قول الكبار بالصبر الجميل نتحلا
يوم شوفتك هناك انا عقلي غاب وانشلا

بت العمدة
============
دخلت علي المشفر قلت اعرف حالو
شنفرة اب شنيب الليلة غايب مالو
شيال الثقيل عدال مسيرة المالو
وفي صفحت بريد ما حاكي عن احوالو

الأميرلاي السراج
============
أبوي ود السراج سيد القبيلة وراســـــــا
أبوي حرم يمين الحارة من فراســـــــــــا
ركاب الصعاب وكتين يدقو نحاســـــــــــــا
كان قصد النجوم ساهل عليهو مساسا

Midoo Khidir
=============
ابوك جابك لصم ود رجال ماشترة
متل النيل تعم تسقى اليباس والخضرة
ماك داب الشكر والفيك مأصل فطرة
ان ختوك في الجرح فورايطيب و بيبرة

Msaad Yousif
===========
ابوك معروف فى وسط القبيلة وناسا
فرتاق للصفوف وكت تحر وينقرولا نحاسا
سند الهاكعة ابوك دون شك مغلق ساسا
جود وكرم لى ضيفانو ديمه ام زور قاطع راسا

الهمباتي الأغبش
=============
ياود الرجال السمتة يوت تبراك
هيلك من زمان نور الكرم يغشاك
الزمن ان قلب مركب وصال تنجاك
لقينا الفيك كتير اخو ونبقي ضراك

Msaad Yousif
============
الزول البريدك فى قلبو تب مافى خيانة
زول نضيف من الشوائب حافظ للامانه
مابغدر بالصديق خوه لله حرم ماوسخانه
بتلقاهو فى ساعت الحوبات مركز ومكانا

Khaled Ibrahim
===========
تجارة آخر الزمان فانية وعميرها صغير
والمال ما بعز ولدا قبيل موخير
الشبع البعدجوع ديمه سيدو صغير
والريش البقوم بعد الكسر ما بطير

الأمين جعفر
========
يا خالد كلامك ما بدورلو زيادة
لكين الخلوق سايقاها يوت العادة...
بي كلمتين بديك اخوي إفادة
حقيت الشكر و الله نلت شهادة

Waleed Abzeed
==========
تجارة الكلام نايمه وشخيره صفير
والزول إن كبر نضمو بيبقه كتير
الجوع والشبع مرات علامة خير
والريش ان كتر لابد من الطير