مجادعات النمة 35

Hafiz Alamin
===========
مكتوب علي سفرا" قاسى ودروبو بعيده
حددتا الدنيا شرق وغروب سافل وصعيدا
حد مارات عيناى من انواع البلاد وجديدا
مالقيت لى ترابا" ياسودانى غيرك اريدا

الهمباتي الأغبش
==========
السفر العنيتو البي مسافتو عنيدة
تكبس في الضلوع نيران فراق بتزيدا
الجدية البقت عينينا يوت بتريدا
ما لامين وصال عشان نحفظو نشيدا

الأميرلاي السراج
===========
شالت الشنطة خفت الشنطة تشوح إيدا
شالت قلبي ذي شالا المغتي وريدا
كان ما ساي بخاف من الله سيدي وسيدا
كت قالتها ولامس خديدي خديدا

الهمباتي الأغبش
=============
قصيبت السكر البدون نقراش نحن نريدا
جيدا مغتي بي ملفاحا تحمد سيدا
الراسية الماصلة اللي عزولا مكيدا
كل الشافا جنا وفات ركبلو جريدا

Hafiz Alamin
=============
الله يهدى القلوب ونارا تطفا هميده
ظبية بت الرشيد الجايه تقدل صيده
مربوعة القوام الفى مشيها فريده
من تحت الحجاب عينيها جانى وميضا

الهمباتي الأغبش
===========
نيرانا الغرام في جوفي يوت بتزيدا
والسفر الحداي روحي زاد تنهيدة
يومين ماكتار لي زول بعلف الصيدا
استفام كتير لي زول بدور ترويدا

الأميرلاي السراج
============
تسلم يا الأصم إنشاء الله دايماً عالي
بيرق للرجال في الحارة ما بتبالي
راجل ود رجال فوق الرجال أبالي
تسلم للوطن نجماً بريقو يلالي

الهمباتي الأغبش
============
السراج ركب في النمة مرحب بيهو
عود نضما سمح بالحيل اصل كاسيهو
ود عز الرجال المانقطع طاريهو
اقدل بي مهل مالنمة بابا ليهو

Khalid Alahmady
============
مرحب حبابو سراج شرّفت انت النمة
فارس صى مأصل مافيك تب من كلمة
جر النم وعقب تانى خلّنا أننجمّ
بالقول الرصين بنشفى من السهر والحِمة

الأميرلاي السراج
=============
ما قصر معانا الزول إيديتو سخية
عدال العوج ما سالو شيتاً نية
دخلنا البيوت وعقرلو عنافية
كفالنا الضيوف لحمة ومرارة وشية

Hafiz Alamin
==========
الجود والكرم فينا اصل وسجيه
لحاقين عايقة ال فى المحن ملويه
نستر عرض الريل الخدودو نديّه
كلنا اولاد بلد والماركه ســـــودانيه


الهمباتي الأغبش
============
من زمنا قديم اخوان سمتة والمحرية
حفاظين عروض عفة ونفيسة ابية
ان حر الكماج في الجو تكنو حدية
ولو دق الشتم في الدارة طير صقرية


الهمباتي الأغبش
==============
اخوي جبل الكحل نقاطة الضحوية
زكازة الضعيف الخاتي من النية
الحافظ صمد جرق صباح وعشية
فوق ست البنات ابياتو در منضية

الأميرلاي السراج
===========
حليل أسد الرجال الما قعد فوق دارو
رفاي الضعاف سياف رقاب الجارو
في الشين والعوج نحنا السمح تجارو
ما من الرجال الفي الوهيط بتضارو

الهمباتي الأغبش
===============
اب قدلة النحيف اسدا هصور هبارو
سيل الاتبراوي الفج غلب عبارو
صياد الغليد قابض العجاج حبارو
رطان تنجليزي مليان عصير صبارو

Hafiz Alamin
===========
كم شويمت وسريت للتحت الفنيده ضفايرو
فرقوطالق فينى نارا" كل ماليها زايــده حرايرو
مفدوعة الوريد المتل الحليب دى سرايرو
كيفن اتمو كيفى واشوفك ياغزالى الدايرو

Khalid Alahmady
=============
شدولك ركب فوق البيلوى عصارو
مقنع بنات مغوار الماانطفت تب نارو
عوج الدرب مخبور هناك لى دارو
همباتى اخوى لى كتفو النجوم يتبارو


الهمباتي الأغبش
===========
الدخان عبق والليل جبالو اتضارو
ما اصلو الخميس مابتهبش عبارو
البهم انطلق واتحلحلت صرارو
وانا المجدوع براي فوق الخلا وتبارو

الأميرلاي السراج
===========
تسلم يا الهميم من كل شر ومزمة
كان طال البعاد لا بد يوم تتلم
ترجع للبيوت وسط الأهل تتلم
ترتاح في ضراك تفرح شوي تنجم

الهمباتي الأغبش
===========
يا السراج ترا الدنيا لينا تالم
بي كب الوحيح عقبا تهج وتعلم
شلنا الزاد غنا دوبيت نصيح متبلم
واخوانا عزاز من البعاد بتصرم

الأميرلاي السراج
===========
لا ربحاً بلاها لا دون عينيها خسارة
لا درت الرئاسة ولا دخل في غارة
غنيت لا القصيد دوبيت ودق نقارة
درتها بالحلال إلا الظروف جـــــبارة

الأميرلاي السراج
==============
إلا يا الهمباتي .
زولك جان جفاك بالشينة لا تبدرلو
كان خلف الوعد كوس ليهو عذراً يحلو
ما الفايتك بفوت حت إن بقيت ذي ضلو
والجاييك بجيك حت إن بقيت بتزلو

مجادعات النمة 34

الهمباتي الأغبش
===========
ليك يا الاتبراوي باقي عندي شمار
كاتمو تلاتة يوم راجي بس اشعار
يوم مايجيبك النت يوم معاي اظهار
بغربلو ليك تمام مابينا نحن اسرار

الهمباتي الأغبش
===========
اجدع مقدافك العذر ملحوق
واصلو الدنيا خرقا ماها ست الذوق
قابضاك المعايش جوة بطن السوق
وناس علينا شوقا مابكاورو تب واسوق

Khalid Alahmady
=============
مجدافى ترا جدعتو علا خايفو مايحوق
الفيسبوك مخستك ومسيلى أيرور بدون زوق
خلانى مرات أهابش فيهو ومرات اجيو بى فوق
ومرات اصاوت فى موبايلى زى التقول مريوق

الهمباتي الأغبش
============.
حاااسس بي الهرع الليلة بظهر دافر
موجو مع السحاب يعلا يشق الطافر
فوق النمة ديك جوادو دايما ظافر
نشتاق جيتو وحافظ حداهو يعافر

Hafiz Alamin
=============
حباب ود الملوك جواد النمه الدافر
فارس دار جعل بحر المحيط الهادر
كيف امسيت بعد مصابك الظاهر
عساك طبتا وفارقتا الالم ومراير

الهمباتي الأغبش
===========
امسيت بي وجودكم عز وعافية تدافر
يا الاخوان وكت كشح العصار متكاور
تمسحو لي العيون وتزحو ضيق العاسر
هيلكم من زمان لي الخوة انتو منابر

Khalid Alahmady
============
أريتنا بالهرع سيد الدرر وجواهر
شاعرناالهميم الديمه جابرالخاطر
تراهوغايتو حافظ جاك سيلا دافر
عليكم رمينا حمولنا يلا أبقو سواتر

الهمباتي الأغبش
===========
الساتر الفريق فحل الصعيد الداشر
حافظ اخو البنات دم الحجامة القاطر
الهرع الفتق جرح الشتا المتناسر
وسيل الأتبراوي حداك تب ما تخاطر

Abdallah Alhraa
===========
احساسك يا البهيج فوق العوالي بناطر
ودار النمه ماجافاها الهرع بي الخاطـــــر
سيل سيف الله خالد وحافظ المتقاطـــــر
كيف اسلاهو الدوام راعد سماهو وماطر

***************
حديثكم ياالتلوب فرّ القلب والفاطر
كيف اوفي الكرام نفس الفليل العاطر
كان صح الحديث ياهو الفلت متساطر
وكان لج الطريق عدوها دقسة شاطر

مجادعات النمة 33

Hafiz Alamin
=========
دمارة الملوك الدنيا مى دار فايده
حد ما اتقدمت لابد بتعكس عايده
غبارة الرجال ست الفعال الكايده
ما تغرك بى جاه او نــعمة" زايـده

الهمباتي الأغبش
===========
الدنيا ام قدود نيرانا دايما زايد
كسرت كم قلوب من مدة كان مترايدة
مافيها السمح لي شينا دايما قايدة
ببراها الضعيف الظاني فيها الفايدة

Hafiz Alamin
==========
دار الخراب وفيها الخلوق متجابده
ناسين الحساب يوم العيون الشارده
خايدين فى العرق والأنــــام متوارده
يوما" لا ينفع فيهو جاه لا ولد لا ماده

Midoo Khidir
============
الدنيا العبوس ماليها اي ضمان
مرة تكون معاك تديك الف امان
ويوم تغلب عليك وتصبحك عدمان
خليك ديمة جاهز بحصانة الايمان

الهمباتي الأغبش
===========
ياريت لو تعيش والناس تصفي النية
لي خالق البشر تذكر صباح وعشية
القاسم الرزق ختاهو في المحرية
حقو الناس تعي وتترك شفقت الجية

محمد الحسن إبنعوف
=============
الدنيا أم قدود فيها بنحكم راينا...
فى الفيسبوك إخوجل نمنا وشاشاينا...
أولا البمهجرو فى البنوك الداينه...
فيها العوس نعوسو والتكون الكاينه..

الهمباتي الأغبش
============
العوس بي فهم في الدنيا كبر ساسو
وان كتر العوج ماتبري يوت لي مداسو
الخير مهما كان افتح هناك كراسو
والراس الكبير انعل كتير وسواسو

Midoo Khidir
==============
من يوم سفري منك قلبي يمة حزين
كل مانجيبهاسيرتك تنزل دموع العين
سائلة الله الكريم القاك ولو يومين
ابل اشواقي ليك منك الاقي حنين

الهمباتي الأغبش
===========
سفرك مهما طال لابد انت تبين
تملا العين حنين بيناتو متقاودين
الحاج في الشمال وامك حداك يمين
والباقين فرح بي الجية طربانين

Midoo Khidir
===========
يايما الفراق للعقول نشال
ماشفناك طول من شهر شوال
شوفيلك اجازة اوشوفي اي مجال
كيف نقعد بدونك ده الفراق قتال

الهمباتي الأغبش
==========
بتعدي الليالي واليوم كمان ان طال
ونتكاور عقب نترس حنينا السال
نجدع لي الهموم برة الديار بي نبال
نفرح وننبسط ونجبد في الدروب امال

مجادعات النمة 32

مسدار الضرس
=========

الهمباتي الأغبش
===========
البارح تمام وجع الضروس بي سادر
خلي المشرط المنعول عليهو يماسر
الدكتور شديد بي اجنة ديمة يعافر
جفف حلقي ضمة وريقي دايما داشر

عمك تنقو

==========
الضرس البسوها غايتو فينا عراقل
يصدع للرويس وبالليل يسوي قلاقل
يحميك الاكل يبغالك شغلا شاغل
الله يقلعه ده حالتو قالوا العاقل

Midoo Khidir

=========
كيف اصبحت يالهمباتي من الامك
كل ماتقوم صباح العافيةتجي قدامك
نحنا بلاك يتامى ومشتهنو كلامك
يالزوقك رفيع ويالراقي في هندامك

الهمباتي الأغبش
==========
اصبحت فوق نما جميل وسلامك
وناس النمة بيك حتة من احلامك
اصبحت النضم قاصر عليك وكلامك
مابوفويهو قول حت لو وقف قدامك

الهمباتي الأغبش
=============
افهم يا المعوك الما انعرف فهامك
تلفونك دوا وبلسم وحيح دا كلامك
الامر الحداك بس قولو بي ابهامك
يا ضفر التميسيح الما انخبر قلامك

Hafiz Alamin
==========
سلامتك يالاصيل من المصاب الصابك
وشرك مقسم يفوت بى قفاك واجنابك
يــاود القبيله الغالى ســــامى جنــابك
تسلم من اذى والعافيه حد تلازم بابك

Osman Amin
========
العافيه تجيك والضرس اللّه يقهرو اب سوس..
يالأغبش بنجك فاك قبل تتّبز الحقانّ
والضرس الكِمل ماضاق حلاوه لبان
اكل الكوجه قو فوقا الكجيك فنان
وسمك يا ابدرق ما برحم الأسنان

الهمباتي الأغبش
============
عارف من زماااان محفور جواك انسان
عليك هيبة اسد سيد حارة اخو اخوان
من زمنا بعيد راجيك اخوي عثمان
بي نمة تصير العافية في الابدان

Hafiz Alamin
===========
سلامتك يالسخى مشرع العطشان
ركازة الضعيف الشلبى مونة الغلبان
اب عروض كريما"حنين وانسان
قضاى قروض للبجيك عشمان

الهمباتي الأغبش
============
من مغرب محمر لاعند الصباح ممكون
النتحي الغريق كاضم عليهو سنون
ياوجع الضرس الضقت فيك كم لون
تنبح في الحشا وتدمـع وراك عيون

Ahmed Mohammed Alfatih
=================
الضرس العنيد ساهربى طول الليل
ورانى العزاب وضوقنى صنف الويل
ينتح فى الخشم وهداهو هد الحيل
نتحتو فى الرويس زى ضربة حوافر الخيل

Hafiz Alamin
=========
ضوقنى الوجع المتل حريق النار
وعرفنى السهر لا طلــعة الافجار
مــعدوم الضمير القلب ليلى نهــار
يبقالى شفاعه يوم تشخص الابصار

Hafiz Alamin
===========
بقيت بالوجع ليلى ونهارى اقوقى
سهرا" ودرنى ويبس مدامى عروقى
ياضرس السجم كفاك ضيقتا خلوقى
والله كرهــتك التقــول معرس فوقى

Hafiz Alamin
===========
ياضرس السجم حكايتك معاى حكايه
وجعا" منك فوقى قاصص على اعــضـايا
المك والتهابك لا بيقيف لا بتتلحقلو نهايه
مـالـك مصـاقرنـى التـقول بينـاتنا جـنـايه

الهمباتي الأغبش
============
نصحوني الصحاب امشي الحكيم واجزو
الفكين بقن في اللقمة ما بنغزو
ماسك في العضم الجبدة ما بتلزو
يادكتور تعال جيب بنك انت اتبزو

Msaad Yousif
=========
حار وجع ضرس العقل الاخرانى
جربت الالم ابو نتاحتن مامفارقانى
مشيت المستشفى ومنو بعانى
جات الدكتورة نضال وتم خلعوفى ثوانى

الهمباتي الأغبش
===========
يوم فت الطبيب ماكنت شايف حاجة
غير ما ينقلع لو كية نار سراجة
ينبح زي كلب واخوانو تب فراجة
جهجه لي المنام والروح بقت سهراجة

Msaad Yousif
===========
ان شاء الله وجع الضرس مالى صديق
بخلى زولو زهجان دايما وناشف ريق
محارب لى اكل الحلو ونتاحتو مابتفيق
مورم كضموا موية باردة مافى ليها طريق

Msaad Yousif
============
وجع الضرس اديتو للعدو الغدار
يحمية النوم والليل يبقالو نهار
ان جاك الوجع كمل يومك استغفار
مابعفاك من السهر ابوعصرا حار

الهمباتي الأغبش
============
جيت تب لي الطبيب وكت اول واحد
من دغشا مبدر اسرعت ليهو مجابد
المنية المعاي دكتوري يطلع جامد
لقيتا بنية دكتورة صبرتا وحامد

الهمباتي الأغبش
============
عبت لي البنج بي ابرة عودا حديد
طعنت فكي في اخرو تلات وتزيد
وعبت لي الحقينة كمان اظن بتكيد
طعينتا تاية خلت سيل لعابي شديد


الهمباتي الأغبش
============
خدر الجضم ياناس جاب معاهو تقل
والمشرط كبس فتحا عديل للسل
واتنعفشت جادة للجرية كيف الحل
ماشبة الجزارة لكن الحكاية عمل

لهمباتي الأغبش
===========
يابنية حيلك بي ماك شبة الدموم ضمة
وشك وش صباح بيهو العوافي اتلمة
شن جابك يا الملاك في بلاد الضلمة
سوي الدايرا تب شيلي من جوايا غمة

الهمباتي الأغبش
============
بقي بس ياناس تجيبا لي سكين
في ايدا المقص في التانية دربكين
قدام عينيا اجنة قصادا محفار شين
هي ياناس تعالو وقولو لي اقبل وين


الهمباتي الأغبش
============
لمت جنبي جنس دواهي وكم مفك
شوف عيني زردية وكلابة كيف انفك
ظنيت نفسي شباك سندان معاه تلك
علي البت بتتضحك وانا الخدران علي حنك


الهمباتي الأغبش
==========
قصرا لي النضم الشوم خلاص انسل
كميد بي قطن شان دمو ما ينزل
ممنوع من الكلام والحار شرابو يقل
لا اجبد سجارة ولا سفة كيف الحل


Midoo Khidir
============
مسكين يا اهل الجاو الم في اضراسو
يحميه الرقاد والنتحة في نص راسو
زي همباتي اخوي عبر عليه باحساسو
ناس النمة والشاشاي نضمو يواسو

Ahmed Mohammed Alfatih
=================
دكتورتى التمام سموها أهلهل نشوى
بتدور للضرس تعمل عليهو الحشوة
قت ليها الضرس ما بتنفع معاهو الرشوة
سليهو الضرس خلينى ألفى العشوة

عمك تنقو
=========
قلعك يا الضرس غيره ما عارفين
ما بندم عليك ولا بنكون اسفين
شعورك مؤلم وبرضو ما خايفين
دواك وعلاجك مـع (السابوفين )

مجادعات النمة 31

ابنعوف كايس لي بدور يعرفني
===============

محمد الحسن إبنعوف
============
يالهمباتى كيفنك لعلو سلامه...
غاتسين للاضان خجله وقصار وملامه...
البارح ندى لاقنتى يا أب بلامه...
لاجابت خبر
لا أدتنى ساهى علامه...

الهمباتي الأغبش
==========
بي الحيل الخبر عندي خاتي ملامة
رجع عقلي ليها دقيلا والفهامة
مابغلبك خبر زولا سرب بهامة
وعاشميق النخل معرف تمام برامة

الهمباتي الأغبش
==========
لاقيت ياالخزين بت العزاز في دال
وبعد سويتو نمك فوق القصير والطال
اديتا السلام وعني رامي سؤال
ومالقيت الدرب الليك علي وصال

الهمباتي الأغبش
============
وبعد نميت هناك في ساحة النيلين
قابلتو العزيز ات وصاحبك الإتنين
وقجيت السؤال لي الغالي اطلع مين
وطلبت الرقم يدوه ليك في الحين

الهمباتي الأغبش
============
قبلك ليك ضربت وعلا مارديت
رقم شلتو من النمة وليهو قريت
كنت بدور اعرفك مايبقي بس دوبيت
نتكاور صحاب وعقبا نخش البيت

الهمباتي الأغبش
============
وبعد نميت هناك في ساحة النيلين
قابلتو العزيز ات وصاحبك الإتنين
وقجيت السؤال لي الغالي اطلع مين
وطلبت الرقم يدوه ليك في الحين

محمد الحسن إبنعوف
=============
متل المتلك إته المتلى بتشربو...
أهود فى الصوى كان ألقى وأتعرفبو...
ود السيل قبيل القيفه تتجرفبو...
رفيق الدوشكه وأبظرفن نحاس ظرفبو...

محمد الحسن إبنعوف
==============
من شندى الاهل يا أبشمه والمكنيه ...
ود ود أبنعوف أهلى البخلفو الكيه...
مطاميرهن مقلعه لى البشيلو تكيه...
وكت الراى كمل سووها بالزنديه..

محمد الحسن إبنعوف
===============
وإت من وين عقابك فى النضيفه عروقن...
خافسين فى الشرف
تشلع ضكاره بروقن...
ترب النجض الباشا الغشيم مدروقن...
ضكارن إصدد السما إن وقع..

الهمباتي الأغبش
============
ناس سوق التلات ومن عندو للنوراب
عربية اب شنب تالانا شاقا تراب
وسوق الأحد في طيبة نمشيه للأحباب
ويوم الجمعة فوق شندي بنكوسو ضهاب

مجادعات النمة 30

محمد الحسن إبنعوف
==============
القشاش وصل وينكن جرارقه النمه...
وين بت الفضل ناس تنقو وأخوان شمه...
الهمباتى ها اللاوى المسادير عمه...
الحافظ الكتاب مو زى زويل جزو عمه...

عمك تنقو
=========
جيتك يا ابنعوف بكل نشاط وهمة
سمعني النضم في الشاشاي والنمة
حوليك كمان قاعدين في احسن لمة
قارين للكتاب وأتعلمنا منه الحكمة

الهمباتي الأغبش
===========
حباب ودالحسن بيك المراد انتمة
تقوقي من الدغش نمك يفج الغمة
لملم للجميع علم اصول النمة
وكل الناس تنم تجدع نهار وضلمة

محمد الحسن إبنعوف
=============
ديل تلتين سنه العدن مداقش الصى...
مصعى وهنقراب ماقمته فوق النى...
ربيت السغار ركازتى منى ولى...
ضقته الطلقه والسكين والفرار ولسع حى

Midoo Khidir
==========
احمد الله الحياك بعد المتاعب ديا
عمرك ماكبير سويتو كلو تقية
في ناس في دي البلد قاعدين يموتو ضحيه
ات حقك بتاخدو كان طلقة كان زندية

الهمباتي الأغبش
==============
سمح الزول يعيش فوق راسو بارود ضي
ماضامن يعيش لي بكرة يصبح حي
بركز شان بقود لي رجالو خاتين ني
حاقب السبحة في نص الكماج والغي

محمد الحسن إبنعوف
=============
وعمر الزول جزم مو حد سنينو العاشه...
تلات جامعات علم سرحه وعزق حواشه...
سطاشر محل ردعى ورفق جياشه...
بفره ومقده ولول وإنزردتا غباشه.

Hafiz Alamin
=========
فى الدنيا جربتا الكربتا فى الخريف الراش
كيف تميت كيوفى بى موية تمور ومشاش
آخر المطاف وبعد المشيب للصوادغ راش
رجعلى هوا مضمور الحشا اب تنا وحراش

الهمباتي الأغبش
===========
الدنيا ام قدود ضايقين سموم ودعاشة
صاقرتا العلم لي حدو كت هباشة
وفوق بطن الجروف كرعيا كانت ماشة
وفوق الكاكي ختينا النجوم لطاشة

Msaad Yousif
===========
حار الفراق زى ام لهيب فى الجوف
تسري فى العضام وتصل حد الشوف
نار الفراق تظهر فى الجسم متل ضرب السيوف
ما بتبرد اصلها بتشل الزول تحمي الوقوف

Midoo Khidir
==========
يالهمباتي اخوي النت بلاك في وكرة
كل الناس تنم مابحصلوك في الخبرة
معروف بالكرم والجود وطبيت العشرة
ان نميت بكون نمك صحيح مو شترة

عمك تنقو
=======
الهمباتي شايف ادوك شهادة
تستاهل اكتر ومعاها زيادة
تنقو محروم كمان كالعادة
عدم حظ مصاقرة ومعاه بلاده

الهمباتي الأغبش
===========
موجات الوجع بي الليل علي مندفرة
قلبت حلمي من جوف الكتاب والطرة
الزول الضرب ولي وتلفونو مسح المرة
ما يضوق التعب في دناهو تب بي المرة

الهمباتي الأغبش
===========
ياك تنقو العلم فوق فرشك انت وسادة
وماك دغور فهم وتجما تنوبو بلادة
التصميم مكنتو والنضم جبادة
سنارتك هناك تكتوك وتنقو شهادة

Midoo Khidir
==========
ياود الغبش الجود والكرم هولك
ياود دار جعل بتفاوض البشكولك
بالمرض العليك الليلة تقيلة حمولك
لو عرفو الخبر عثمان وحافظ يشابولك

Hafiz Alamin
============
ما بتشابا للدون اب ضروسا" شوك
انا اخو ام رشوم ام صندلا" معبوك
فشاش غبينة الفى المحن مدروك
يافايت حدودك خليك مع الواسوك


الهمباتي الأغبش
=============
الوجع اللعين في فكي يوت مشبوك
نتحيب الضرس تسكينو مو مدروك
ياحافظ حداي وجع الدماغ مفكوك
والعين الغميد قجت حداهو شروك

Midoo Khidir
===========
يالهمباتي اخوي المك حماك تجادع
عارفاك يااخوي موجع وبرضو تصارع
شاحدة الله الكريم تطيب ولاتشوف فاجع
فوق النمة والشاشاي باكر نشوفك راجع

الهمباتي الأغبش
==========
التلفون ضرب ولي ردو ديمة اصارع
ماقادر النضم وماقادر ارد واقارع
ماها جيدة فيك لي ودادنا انت تسارع
وبيتنا النمة بيك بابا انفتح في الشارع

مجادعات النمة 29

هيجان السفر
========

Midoo Khidir
=========
من امس العصير انا السفر دايراهو
شريان الشمال في سفري انا قاصداهو
بدور امشي البلد وشوقي جت شيلاهو
اغير جو وارجع وهمي اخلي براهو

عمك تنقو
==========
مساعد والله غيرك شاطر
تلاوي في البنية خليها تمشي تسافر
لي شوفة الاهل الليلة قبال باكر
اديها الاذن ومعهاه طيبة الخاطر

الهمباتي الأغبش
============
السفر الحداك ياالزينة بتمناهو
اصبح في البلد وجرابي عز املاهو
ابل الشوق لحاف وراحتي تبقي غتاهو
ازح خرج البعاد وبي ريدي أتوطاهو

Midoo Khidir
===========
البشوف هموم الناس تهونلو همومو
الزول الحماني السفرة ماني بلومو
السفر المقدر لسة مابان يومو
رضيت بالقسمة والهم راجية في خرطومو

Midoo Khidir
============
السفر النويتو الليل ابا يتسهل
الهم الابيتو جواي سكن واتمهل
بدور اجلس وافكر وردي مايستعجل
عشان نضمي ينجض واصلو مايتحول

الهمباتي الأغبش
============
المكتوبة لابد العين عليها تحصل
حداك نية السفر والخترة ليها تعجل
القرف العليك بي النية امكن ينزل
وتتكاور عليك الراحة ليك تكمل

Midoo Khidir
==========
من قمت وربيت مابيا الكلام الشين
شايلاوهو الصبر وحبلو مادا متين
الحزن الالم في عيوني ديمة تبين
يالله الظروف وادني انا لوييييين

محمد الحسن إبنعوف
==============
قالت تفتح الباب القبيل ما أنسده...
وأنسندت فريع سوت ضراعها مخده...
يا البتبردولك محرمين من جده...
لمنى بيها بعدين السما اللنقده...


محمد الحسن إبنعوف
==============
نضمك حاشا يامياده ماهو ملتق...
ولا حاشاهو فيك توب السماح ماتفتق...
الراس أبسنيده على الضراعها معتق...
عودو بكون من شتل المدالق البتق...


الهمباتي الأغبش
===========
فيك بت الخضر نضما غليد ورصين
وهيلك جبرة الراسيات بتملب العين
بنعرفك تمام لافيك ميل لا شين
وضيقك مهما طال صبرك حداهو متين

Midoo Khidir
===========
تسلم يابن عوف نضمك علي كتير
في النم والشعر والله انت خطير
بنضمك فرحت وراسي بيه ينير
يعلي مراتبك المولي الكبير

Midoo Khidir
===========
يالهمباتي اخوي اسد الكدادة
نمك زين وماخد فيه شهادة
قول ياخو ي ونم ادينا منو زيادة
تسلم انت في النم ليك سيادة

محمد الحسن إبنعوف
===============
جربتا الفراق والسربه بالقشاش...
وخبرتو الكماج بالمدفع الرشاش...
ضقته الجيم سرى أبطبله وكربتا القاش...
يبقى هدا الطرف وكتين ضربتى طناش


الهمباتي الأغبش
==========
بي الكاتيوشا مابي الجيم صلد دقاش
والقرنوف دشر قصطيرو بق رشاش
ان حر الكماج اخو الرجال لطاش
فوق كتفو الصُفر اللي الصفوف نفاش


Midoo Khidir
==========
جدا يابن عوف باكر اكيد سامعنك
كان حيين وقاعدين نحن بس راجنك
فوق ديك الاذاعة نحب نسمع منك
الشاشاي والنم بتقولو باكر اظنك

محمد الحسن إبنعوف
==============
انا والمهدى أريت حال الرجال بى حالنا...
ضقنا العز بطر لامن مفضل مالنا...
عقباتن فقرنا وإنقطع وصالنا...
وهسى قسيمه فى الحفره وفطين تقلالنا


الهمباتي الأغبش
============
انا واب عمة اتقابلنا نحكي احوالنا
بي النم الرصين دايما يلولي قُبالنا
بي الغربة العليهو والبعاد يكوالنا
والريد المقنطر والحنين بي حدالنا

Midoo Khidir

==========
البارح نويت من الهموم ارتاح
قمت حقبت هدماتي وعزمت صباح
الا ظروفي جاتطت زي تورن النطاح
تسهل لي سفرا ربي يافتاح

الهمباتي الأغبش
==============
البارح نهار عكل الغبار سراح
واتكاور عُقب وعند االمغيرب راح
اتسارعت عاقر وفاقد اب شباح
عن طرف الزريبة بخاف تعكلو رياح

محمد الحسن إبنعوف
==============
مرقته مع الحمار قاصد رفاعه وغادى...
وبى سبحة بقس دليتها جت أورادى...
ياشيخ الضريح الوسدوك الوادى ...
تجمع شملى بالضامره أم خديدن نانى...


الهمباتي الأغبش
===============
في المشرع هناك في بقجة حاقب زادي
مع صرة هدوم مصحف قديم واورادي
كرتونة مطبق ومن فوقا خاتي الرادي
وخليت لي الوراي بقي الحنان وودادي

عمك تنقو
=========
يا ابو فركة ابوي انا ليك بنادي
ست روحي اشوفها ويتحقق مرادي
طولة الفراق البي زاد على سهادى
انطبق المثل وصبحنا الاثنين في وادي

مجادعات النمة 28

الهمباتي الأغبش
=============
جر النم علي يا الاتبراوي تعال
حرك جوفي بي نما لذيذ يتقال
داخرك لي للحوبات محل تنكال
جلدك جلدي يالمبروك محال تنطال

Khalid Alahmady
============
انت أبكريق العرش ونوايبو مابتنشال..........
انت غير النضم المكمل فيك شن ينقال
علا أعزرنى اليومين دى أخوك مغلباهو أحمال
وكان أقدر أتلب جوة أجيك فى الحال

محمد الحسن إبنعوف
=============
من دار ابصهنب لا كجر كرشولا...
اخوان أم وضيب درشو العيوق كرشولا...
يمينن مابتعرد ودقهن كر شولا...
فطرو من النهود وأتغدو فى اب كرشولا.

Khalid Alahmady
===========
شعديناب أنحنا ومابنفز من حارة نهبر هولا
اخوان المتبر ساقا وأم قرقاد تحت فى رجولا
حديداً حامى سيوفاً كابرة حراات دى خيولا
نحاساً رزا ولداً هزا جولة تعقب جولة

الهمباتي الأغبش
===========
عيال مغوار هناك موجة البحر ترسولا
فشاشاين غباين بنجدو المحمولا
ان دق النحاس فرسان حرب واصولا
فجاجين صفوف بين السيوف وخيولا

Hafiz Alamin
===========
اولاد رباط هيلنا الفصاحه وهولا
صغيرنا يصول المحن الشداد ويجولا
ساترين عرض ال بالدهب محجوله
للحاره ساعين الدكاكر المصقوله

محمد الحسن إبنعوف
=============
الهمباتى كيفن فى عشيتو وعصرو...
أريتا تطيبلو فى بلدو الحنينه ومصرو...
الباسطنى منك يانديد البصرو...
الدود ابنيوب إن داوسك بتعصرو...

الهمباتي الأغبش
===========
النم الرصين شايفك حبال بتمسرو
وبتقولب كلام يا الله نحن نفسرو
امواج الكليمات في حضرتك ينحسرو
والهم والحزن في نمتك ينكسرو

محمد الحسن إبنعوف
=============
شن ببرى الفحل غير أم ضمير والمايق...
وهن فال الفوارس والمترى وفايق...
أم ديس والنهيد الردوف يالرايق...
بينها وبينى وقفت نار جهنم عايق..

Khalid Alahmady
==============
ياسيد الفراق والقشاش السيدو سايق
ديل كتلنو قلبى وجن يدنو العلايق
اوعاك منهن تبقى متلى سهران وضايق
كعب الزول تدورو ويبقى منك همو رايق

الهمباتي الأغبش
============
الفحل البجر لاشربة يوت لاعلايق
من ضربا مكوكر جوة قلبو فلايق
الريد البيقلي ويرش عليهو سلايق
ماشاف الحبيب وكب ريدو يلايق

Abdallah Alhraa
============
من رد الردوف جفل اب قوايم شالق
وولع نار حشاي صبح القليب متفالق
الدرعاء ام ضميراً حكمه خلقو الخالق
بينها وبيني خيط حبل الصراط الزالق

Abdallah Alhraa
============
كتبت في الاصيله الكريمه عبير
دائماً طيب عبير فايح وعابق نــــدو
حكمني الحروف قسن عبارات ردو
بالاني القــــدر ابعدني تب من ردو
بالحظ الشقي بنياني ابني واهدو

Abdallah Alhraa
============
شكراً ياعبير دائماً جزيلك وافر
وبي اصرار عطاك تهدي القليب الكافر
في قيدي المتين مكتوف تملي بدافر
لي دار الملوك زمل الهوان بتنافــــــــر

محمد الحسن إبنعوف
=============
مرات العوج يا أم زين بجيك فى محلك...
إن بيض صباحك وإن ضلامك حلك...
إن شديت رحل تلقاهو شده رحلك...
أته تحلحلو وبقفاك يعقد حلك...

الهمباتي الأغبش
==========
تصحيح العوج يوت ليهو نحن ندِلك
والزول الوخيم لو ليك غبي ندلك
وعوجات القدر لو هي يوم نادلك
اتحقب صبر وبي الحكمة انت ادلك

مجادعات النمة27

مجادعات فوق الخميس
=============

الهمباتي الأغبش
===========
خرمان ومتقريف للنمة لي يومين
اناتل في الظروف تالايا مابيا تلين
اتقلب مكوكر مغستا فيا ماليا العين
فراقكم نارو تبلع وفوق جحيمو حنين

Hafiz Alamin
=========
حبابو الكلس العزيمتو مابتلين
حباب نوارة نمتا البيملى العين
حباب الفى الحاره سيفو سنين
وحباب ود الرجال الكمّل البينين

Khalid Alahmady
============

نضم حافظ مأكد ملان مدفق زين
والقريفة الرامياك يومين أنحنا فى اتنين
أم قدود طايرا معايشا بتتلحق فى حين
والليلة الخميس تب معاك يالهميم متعشيين

الهمباتي الأغبش
============
حبابك عشرة اعزم الحلة والقاعدين
وبي جيتك يمين نفرح نهز ضابحين
وان درتو اللبن فوق المراح سارحين
نتم الليل غنا ونما صريح وحنين

Khalid Alahmady
===========
اللبن بندورو بالشاى بعد اللحم اّلخزين
وكان بالقول جبنةً فاهمة بى الفناجين
نتّنى البكرى نتلت فوقو بى اتنين
ننم ونجر فوق أمات رشيم صابحين

عمك تنقو
==========
نحن مع البعاد دائما نكون ضايعين
خالد والاغبش لشعورنا ما راعين
عزومة بي مزاج ونحن هنا جايعين
اليوم الخميس وللقميص بايعين

Khalid Alahmady
===========
خميسك معاك العازة تب قاضيكا
بعد بعت القميص ماتكون بعت ديكا
علا انا واللغبش لينا الكريم ويهديكا
نحنا فرىىى حتى ان فركنا الويكا

الهمباتي الأغبش
==========
العشوة المدنكلة في االخميس معروفا
خالد زول لحم وانا حاجة تب مابعوفا
كورية اللبن وفطيرا في نص جوفا
تاكل وتندبل لمان تمسكك خوفة

الهمباتي الأغبش
===========
مبروك الخميس البيعك لي قميصك
عشان تكسب وداد يا اخويا كبر كيسك
جيب فيه السمح من بدري وسع ميسك
وان حالك عدل اضبح عديل لي تيسك

عمك تنقو
==========
الخميس والجمعة كله اصبح واحد
احسب في الشهور واحد تلو الواحد
رب العباد والكون كريم يا واحد
قرب لي المسافة انا ومعاي زول واحد

مجادعات النمة 26

محمد الحسن إبنعوف
=============
أهل النمه والشاشاى حبابكن ميه...
أمل ولدر مساعد وبت كرير والنيه..
إن النم حكرتوه وعدلتو الليه ...
انا القشاش بصاقركن صباح وعشيه...

Midoo Khidir

==========
ياود الحسن مرحب حبابك مية
نمك زين ليك من اهل النم تحية
كلنا اهل و بالنم صلاتنا قوية

مرحب بيك اهلا ياها دي المحرية

الهمباتي الأغبش
===========
نتشرف كتير في النمة تب بي الجية
يااب زيطا طلع ودوبيتك انت هدية
كتير في النمة نطرب قشاشك الصقرية
نشريك ياللدر ولي النمة سوي الجية

محمد الحسن إبنعوف
=============
فسبكنا النميم قبالو قوقلناهو....
وفى بيت الرئيس كم مره كم قلناهو...
كم راكز تقيل بى نمه قلقلناهو...
نحنا اهل النمبم قالنو ما لقيناهو...

Khalid Alahmady
===========
جيداً جيتنا ودأبنعوف صاحب شعر وقوافى
قشاشك معمرة مكنتو ديمة وبالبلود طوّافى
مكتوب فى قفاهو وجبهتو ختاً كبيراً ضافى
فايق شهرتو الأفاق فات ال3 آلاف بيت صافى

موولي موولي
========
مرحب حبابك فوق الميه كمان ميه
حبابك والنمه بوجودك تراها هنيه
نمك موزون مرتب تقول ألفيه
و من الكفتيره ليك كباية شاي هديه

الهمباتي الأغبش
=============
عارفنك تمام ود ابنعوف غناي
وزول نما رصين فوق الوصف ختاي
كلامك بيهو نطرب لو لينا قبل جاي
وكلما تقول نضم تلقي ردو حداي

Hafiz Alamin
=========
الهمباتى نعلك عافيه خبارك يااخوي خافى السيره
فاقداك محاصة النمه مين غيرك يدير تدبــــيره
اظهر ياود القبايل بلاكك النمه يابــــسه فقيره
راجين طلتك ما انتا اياك سلطانا وسراج تنويرا

الهمباتي الأغبش
===========
جيتك يالخزين في جرابي شوقا ليك
وفاقدك ضمة يالمبروك ومغرود فيك
ياك فارس المحاصات الغمد حاجيك
اب عمة الهبر فوق الغزال شاشيك

الهمباتي الأغبش
============
جاي حاقب شوقي في بقجة ومستف
حقبت حنيني في حقة وفت مطرف
اتشحتفت فوق النمة جيت متقيف
لقيت النمة ترعي والوراي متكيف

الهمباتي الأغبش
===========
شوق حافظ مساعد وخالد
تنقو هناك مع امال حنين والد
وكيف شيخ الهرع خليتو جبلا صالد
وكل الجونا ميدو هناك بدالنا تقالد

Abdallah Alhraa
===========
وحاتك يا البهبج انتو الجبال وشيوخنا
وبي ود ابنعوف بنشد هشيش رخروخنا
اوزان الحديث قانون بفش منفوخــــــــنا
هيلكم ضمه شن لماهو بي مشروخـنا