الأربعاء، 31 مارس 2010
مجادعات النمة20
Abdallah Alhraa :-
مشكورين يااللسود دايما ردودكم جاهزة
==========
لو اهديتي حافظ اهديتي لينا معزة
مجادعات النمة19

الهمباتي الأغبش :-
==============
بي الكاف كليت نافح عبيرو بقة شاف
وبي الفا فات مفدع جيدو والاكتاف
وبي التا تلت ايدا مكملة الاوصاف
وبي اليا يوت بناطح في العذاب اضعاف
وبي الرا رامي طرفو جنس عيون تنخاف
وبي الها هادي كلمة لي صورة جد تنشاف
Hafiz Alamin :-
============
بالكاف كملتا عجايب الغرام شكل واصناف
بالفاء فتا ناس المحلق الباقين فى العشق اشراف
بالتاء تاجوج فتيها سماحه وزوق احتشام وعفاف
بالياء ياريتنى فى جوارك اتكرف ريحة الكليت والشاف
بالراء راجيك انا عهد ووعد الحر دينا" على الاكـــــــــتاف
بالهاء هيمان بالسنين عاجبنى القوام والخد الندى ولصاف
الهمباتي الأغبش :-
============
الكفتيرة فوقا السكرية تضاوي
والعجب البخور بي ريحتو عبق عاوي
الجدي القعد لي شوق عليهو يلاوي
صب شاهيهو جوة قليبي بوخو يخاوي
Amal Elfadl :-
==========
يا الحافظ كبيت الشاي ذدت الكيف
والله بعد الشفتو ما عارفه عليكم أرد كيف
خليتوني زي الواقفه علي حافة قيف
لا عارفه أواصل لا عارفه ليكم أضيف
Hafiz Alamin :-
=========
انتى الخير والبركه والعزه وتمامة الكيف
انتى الشان وانتى الزاد وبطر الضيف
انت البيك نمتنا تزيد علا وتشريف
كفتيرتك زكرتنا الونسه ورمال الريف
الهمباتي الأغبش :-
===========
حلات شاهيها لمن كب في الكباية
من ايد المفدعة تبقي نعم الغاية
لو ميرود عديل من ايدا تبقي دوايا
اشرب وانفعل طربان مع شاشايا
Midoo Khidir :-
===========
الريف فيه حنان حاشاه من الزيف
ناس الريف كرام كان في الشتاء وكان صيف
في طباعهم اصالة وهم بكرمو الضيف
كان ماشفت شوف الريف بساطة وكيف
مجادعات النمة18

Osman Amin :-.
============
قلبي الأنوجع ما بتنفعو التصبيره
من قدح العُشُق شال ليهو لقمه كبيره
قدلة والتفات غالبني تب تصويره
ومدرسه في الكِفل ياريتني أبقي مِديره
الهمباتي الأغبش :-
===========
ياعثمان امين سمح الكلام بيعشرق
دايما لي النضم سكينك انت مطرق
السبب البخلي الزول يمين مايفرق
لهيج السمح ام عينا دميعا يرقرق
الهمباتي الأغبش :-
===========
يادكتورة كيفك وليك نمسي نقول
هدير النمة قايد فوق العضام متكول
في الوصف السمح دايما عطر مبهول
بنسوي الكلام وقط ما بنجرح زول
Hafiz Alamin :-
==========
مو هدير النمه القايد فى العضام متكول
دى هدير ريدة السمحه ام فراقا" حول
انا كل مالى انظم فى القوافى القول
راجى الله يطلق القيد واشوف الزول
الهمباتي الأغبش :-
=============
شوفت السمحة ياحافظ تملي نريدة
دقة قلبي سندانا معاهو حديدة
ما ظنيت اطيب ورويحتي تبقي شديدة
غير مهرة صبق مابتنمسك لي سيدا
الهمباتي الأغبش :-
===========
الوصف السمح بي عينا بس بنشيلو
اميفناك الغرام مابشفي يوم لي عليلو
هيوسين بي الوريد اردب درب اديلو
مابتطفي العليهو وما بتقصر ليلو
Hafiz Alamin :-
============
النم والشعر لى راسنا عاد اكليلو
وريدة البنات انا فى عقلى طالقة سعيرو
هواهن يالهمباتى فى جوفى قدح قصطيرو
انا بخت النمه فوق النمه وقلبى الله دبــيرو
الهمباتي الأغبش :-
=============
العسل المغلف في المينا لي تصديرو
الوز الغتس في الموجة رامي صديرو
القلب الحداي تب انغلب تصبيرو
فوق فرخ البلوم خايف يطير لي غيرو
مجادعات النمة17
Hafiz Alamin :-
===========
مرضان ونيران الغرام زايد القلوب تأويرا
هالكانى مرنوعة الوريد المكتمل تسطيرا
انظم فى الشعر مجانى لا رخصه لاتسعيره
وبرضى ما ارضيت بت الفــــاضل ام كـفتيره
الهمباتي الأغبش :-
=============
نيران الغرام في الجوف كتم تدويرا
والجدي المفدع وفي الروح تبث تاثيرا
اكتب في الكلام في الجو اطير بي صقيرة
وبت الفاضل ياخوي برضو بتسلو جفيرا
Abdallah Alhraa :-
============
مرضان الغرام يا أخوي دوام في حيره
واعراض المرض مابنعرف تفسيرها
مرنوعة القوام الفي دلالها قريره
مابتدريه يا الحافظ بلا تجيب سيره
الهمباتي الأغبش :-
============
ياعبدالله اخوي الليد حدانا قصيرة
والزول يوت مناهو مابكتمل بي السيرة
الحب في القلوب ماليها حد الحيرة
والقدر ان وقع مابتنفع التكشيرة
الهمباتي الأغبش :-
=============
ياحافظ ننم ونقول بدون تكشيرة
اكان ترزية عبي وكمل القصطيرة
نفض لي الغبار من جوفنا والتكشيرة
كيتا لي البنية الصورتا الكفتيرة
Hafiz Alamin :-
==========
ريدة السمحه طلقت فينى نار الغرام بى سعيرا
كل ما اقول اتوب اسد باب الغرام وانسى الســــــيره
ارجع اطراها ام فاطرا" حاكا برق ام رعود وكـــــــــريرا
واخر جزاى تطلعينى ترزي يا بت الفاضل ام كفتيره ؟!
الهمباتي الأغبش :-
============
الكفتيرة كانت وكان معاها كبابي
والشاي المطفح زبدو داك يشابي
الصينية ناقعة وايدا الحنون صبابي
من زولا مكوكر ظنيتو امكن حابي
الهمباتي الأغبش :-
==========
الكفتيرة امكن لينا تشبه اكيد
جواها حار يشوي ومن برة سمحة شديد
والخلق الهناك شايلاها يوت في الايد
وصابرة علي الجمر ولهبا عويدو غليد
مجادعات النمة16

الهمباتي الأغبش :-
============
من امس الصباح اضحي النفس مقبوض
وبات مرعي الهموم من الخدار مجبوض
زايغ عقلي طافش وتوب الفرح منقوض
والحال العلي اصبح عديل مفروض
Hafiz Alamin
============
غلبنى السكات والنم فى جواى وارد وسادر
قدلت بريرية الاراك الفى السماحه حظها وافر
تلة ايدا قلعت قلبى لى احشاهو اضحى منافر
سببى لمــعة اللـمه وفـص الجــيد وقواما" نـادر
الهمباتي الأغبش :-
============
لو سكت اللسان الكلام في الجوف يدافر
اتنهد سنين كاتم الصدير ولي البيهو سادر
خايف ان نضم امرق براكين ساسا غاير
وخايف ان سكت كتر الالم للجوف يناحر
Osman Amin
============
داك دهب الكنوز لموهو تحت الفركه
متنقع مسك في الصُّره كوّن بركه
الخلاني هاجس لا صنعه تب لا تركه
آآلأغبش دواي طبلوهو جوه الشِركه
الهمباتي الأغبش :-
============
ها دكتور تعال شوف لي سريع الحل
شاقيت في الدروب القاها فوقا طبل
الخلاني هاجع ليل وتوبي داك ينبل
حرا فيي مكتم ومالاقي حتة ضل
Abdallah Alhraa :-
============
سمحه المن مجال الغيرها ست لي كزّ
تيلاد الكسر طهر الفرس في الهزه
فوق ندو الدهب تاني الصفر ما عزّ
لهجك موز ومن برق المدوعل مـــزّ
الهمباتي الأغبش :-
==============
السمحة ام جمال فوق الارض تهتزا
خمرة لونا ناقعة صدرا يموج زي وزة
يوم قدلت بشيش عقلي المطين فزة
واكان جنيت انا بسراع اطبلو الرزة
Hafiz Alamin :-
==========
بريريبة الآراك السارحه بالقلوب تعتزا
لاهيه ولاعبه ومو داريه طرفى جافا الخزه
درة وادى الحسان سمحة لون وبراطما" لذه
هردت قلبى جابتلو الانضراب والــهـــــــزه :- :-
مجادعات النمة15
عــــــــــــــيــــد الــــــــــــــــــــحب
=================

Osman Amin :-
===========
الفلانتاين كبس وكل زول ملاقي حبيبو
والضارب الخلا العيد الكبير ماا بجيبو
راضين بي القِسَمْ قدر اللّه قط ما نعيبو
العيد عيد قلوب كل زول يموت بي نصيبو
الهمباتي الأغبش :-
============
عيد الحب ترا الليلة سارحة جمالو
وانا الشاشيت بعيد ما داري بي احوالو
كل الناس هناك جنب الحبيب تسغالو
وانا الكاضم الصبر وبعيد حبيبي منالو
Hafiz Alamin
============عــيدين وعيد ورفيقو وتلاته وسبـــعه
قضيتن وحيد رفيقى الاسف والدمعـه
يارب يا كريم خالق الطباق السبعــــه
تراف بى حالى يتحلن قيود النجعـــه
Midoo Khidir
=============عيد الحب ده جا وانا فيه قاعده وحيده
الهم العلي واحلامي مني شريده
انا كايسة السعادة وكايسة حاجة جديدة
عيد الحب يفوت وانا راجية حاجة سعيدة :- :-
مجادعات النمة14
وصـــــــــــــف الكمــــــــــــــــــاج
==============
الهمباتي الأغبش :-
========= ===
ما قام النفس تاور علينا الخوف
مع البرطن حديد يلقط يرمي صفوف
ان حر الكماج وطارت رقاب الجوف
بتلقي اخو البنات علي الكماج ملهوف
الهمباتي الأغبش :-
=============
ياعثمان اخوي ماشفت ساعة الضيق
وكت حصل الكماج واليوم بقالنا رقيق
في محك الرجال ساعة ينعرف دا رفيق
وكت الكوع يحم ولسانو يبقي دقيق
الهمباتي الأغبش :-
============
اكان شفت الاسود عبو الافق جبخانة
صالو وجالو ماخلوها طلقة ودانة
اكان شفت الرباعي وكت عزف الحانة
مع الكاتيوشا ناسك طربو حد هيجانة
الهمباتي الأغبش :-
============
جينا رجعنا وكت العين بصيصا حمار
كل مانشوف بعيد العين تشوفو غبار
تممنا وركبنا ودعواتنا لي الغفار
يرحم اي الرجال الماتو وهم احرار
الهمباتي الأغبش :-
===========
ياعثمان اخوي اكان رأيت احساس
ساعة جينا داخلين احساسنا ما بنقاس
فرحا عبا دفق فوقو رفعة راس
وطارت في الافق دمعة من الناس
الهمباتي الأغبش :-
==============
ياعثمان اخوي في جوفي حار النم
غوغر في الضلوم مسدارو مابتلم
الشم قولبت عكست علينا الهم
والببرا الرجال مابتر ولا بنجم
الهمباتي الأغبش :-
===============
ود الفاتح اعثمان تور علينا كلام
طرانا الاسود الفاتو الصقور قدام
حجرالدندراب سيفا سنين قلام
بياكلو النار قرش يتوطو لي الالغام
الهمباتي الأغبش :-
==============
لبسو الخمسة مااتلفتو واتضارو
سكليب مدفعم خلي الخلوق يجارو
البارود كبس والدوشكا رامي عبارو
والهاون فتق اضنين بعد الوقع هبارو
الهمباتي الأغبش :-
=============
اخو السمحات زحف فوق ايد تكنو دبيب
اتخطي الدفاعات بقي لي عدوهو قريب
قام شب بي عجل قرنوفو ضربو لهيب
حتحت لي الصفوف كلسا دواسو مريب
الهمباتي الأغبش :-
=================
ما اتضارينا ضمة وما اخدنا سبات
اخو المرقن عصر فوق كتفو كم نجمات
حباس عركتن وجاه جيوش راجمات
وعن ساعة الكماج بركز اخو السمحات
Mohammed Elfatih :-
================
الهمباتي اخوي لا بتقصر ولا بتلام
جيشنا حراس الحدود ما انضام
وكت الحارة بتحزم بقيف ضرغام
لاساوم على ارضو رامي لى قدام
الهمباتي الأغبش :-
==============
ديشا كب مدفع عبا ولدا شبا
ازرق كتا فوق وشو الثبات انصبا
صرة وشو هيبة قامتو شنبا ربا
رايو سديد ونضمو قليل مابنكبا
Mohammed Elfatih :-
=================
جيشا هب واقف صد خائن شبا
لا بارى السياسة ولاااا ... إتغشى
في صدر الرفاق ما وجه سلاحو رشا
صمام أمان وكت الخطوب تِتفشَّى
Abdallah Alhraa :-
===============
كم شويملهن وقتاً كتير فوق ناقه
زمنا من طرف ريسه وشوية فاقه
عاكسنا الدهر كترت علينا العاقه
نحن برانا ياهنباتي كيـف نتلاقـــا
Hafiz Alamin :-
==========
حباب وارث السمته الهيلو من اجدادو
حباب ود المكوك الفايت على اندادو
حباب فارس الدوبيت البيكا قدحنا ز نادو
ليك وحشه يالهمباتى وحات ربى المنزهه ذاتو
Abdallah Alhraa :-
============
ابشر بي الجهاد انتو الفديتو الامـه
ودا العمل الجليل الاجرو مابتـــلمه
يا الهمباتي ليك تاج الفراسه وعمه
حقيت الشكر فزرت ورفعت الهمـه
Abdallah Alhraa :-
===============
مرحبتين حباب الفارس المغوار
راجع بالنــــصر ماجـــيتنا راجـــع فار
يا الهمباتي اخوي نلتو الثواب قنطار
ومابلزم دعاك للشــهداء والابـــرار
Hafiz Alamin :-
=============
حباب رجال الحاره فرساننا الكمّل الابرار
لحقو الضعيف سترو العروض نصرو للاحرار
حباب جنودنا احفاد المهدى وعلى دينار
وحباب الغبش اصحاب ذمة" ماباعوها بالدولار
Hafiz Alamin :-
==========
مشكورين رجالا" عبدو الحق وطردو للخناس
ستارين عروض ولى اعداهم النار ووجع الراس
حمو البلد ورفعو رايه الاسلام بى شديد الباس
جزاكم عند مولاكم فى يوما" الابره تازن الفاس
Abdallah Alhraa :-
==============
الببرا الرجال فارساً شجاع واشم
وبدخل لجــــة العـــركه ام سماياً دم
يا الاغبش صميم حاشاك تشيل الهم
وما بنيلو الشرف كل الخلوق من جم
Hafiz Alamin :-
==========
فراس عركة الحميه ام نحاسا" نم
لحاقين كربة الفى الدرك منضم
احفاد المك الخلى الخديوي فحم
يسلمو للوطن السترو الغريب والعم
Osman Amin :-
==========
فوق راس الخسيم همباتي سمْك قطّر
من حقة دواس تمباك عزيمتك مطِّر
ضارب الدوشكا منك اخد الاشاره وسطّر
معروف أغبش دُهِم فارسن قدل واتبطر...
مجادعات النمة13

Abdallah Alhraa :-
============
شعاعك زي شعاع البدر خلقو الخالق!
ولهجك مو زفر شالعه ولسانك طالق
الخلاني من فرقـــك تملي بتالــــــق
فرقك سالي وحه وحر شقيقه وفالق
Hafiz Alamin :-
=========
مرناعة وادى الحسان البقا نار وحيحا وطالق
ولعت فينى جمرا" سبحانو ربى الخالق
الخلى النظر معلول والنوم بقى لى مفارق
كرفة خمرتا وقدلة مشيتا وفاطرا" بارق
Abdallah Alhraa :-
=============
تسلم يااللبيـــب والمولى ليك ارافق
مسائل الغــــرام دايماً حسابن فارق
الخلانا مشطوطين غروب ومشــارق
ليم العنقو باهي وفرقو كاوي وحارق
Hafiz Alamin :-
==========
سلاما" يصلك ياالهرع وديمه ليك يرافق
ريدةالمرنوعه صبحت جواى سما" زارق
السبب الخلانى ليلى ونهارى مفاقق
صدرا" حاكى الوزين الفي بحورو يشاقق
Abdallah Alhraa :-
===========
احفظك الله يا الحافظ وتختى عوايق
تتف السم وتنهل من معينو الدافق
لا هم لا كدر وسنان غرير المايـــق
وتتوسد قرين السمحه تصبح فايـق
Hafiz Alamin :-
=========
ياالهرع يسمع منك المولى الكريم الخالق
انا فرقة السمحه عكرت صفاى والمايق
الخلاني حز نان وتملى باكى وشاهق
صدرا" شب وديسا" كب وطيبا" عابق
الهمباتي الأغبش :-
===========
كل يوما بمر الدنيا لينا تعلم
مرات بي فرح وعقبا تجينا تالم
الزول بالفهم احسن لربو يسلم
والزول البليد البي قبيحو بكلم
Midoo Khidir :-
===========
يالهمباتي اخوي انا كايسة ليك مخصوص
بدور شورتك الي وتهدي لي نفوس
بدورك يااخوي تديني راي مدروس
يحفظك الله ويجعل مسكنك فردوس
الهمباتي الأغبش :-
==============
من دغشا مبدر وباقي النهار بي ليلو
مكتوب في صحاي دربا طويل امشيلو
السفر البخلي الناس دوام تبكيلو
زالق الخترة من حجر الدغش تهويلو ...
الهمباتي الأغبش :-
=============
اسرج في البطان تلقي المتني حبالو
وعاين في الكرو تلقاها كرعي جالو
وفوق عكف النخل والدوم هناك تالالو
وعكس النيل بعوم تمساح هجم في رمالو
Abdallah Alhraa :-
===========
كم شويملهن وقتاً كتير فوق ناقه
زمنا من طرف ريسه وشوية فاقه
عاكسنا الدهر كترت علينا العاقه
نحن برانا ياهنباتي كيـف نتلاقـــا
Hafiz Alamin :-
==========
حباب وارث السمته الهيلو من اجدادو
حباب ود المكوك الفايت على اندادو
حباب فارس الدوبيت البيكا قدحنا ز نادو
ليك وحشه يالهمباتى وحات ربى المنزهه ذاتو
مجادعات النمة12
Midoo Khidir
============جيت من البلد وهمومي راقده كتيرة
في البندر بكوس شان الاقي جبيرة
من يومي الاتيت واتيت معاي الحيرة
ناس البندر الجافين مابراعوها حتى الجيرة
Khalid Alahmady :-
===========
قصيبة التقنت اللينة ومندى خدارا
بجر النم عليها وأكتب حروف أشعارا
درة بلدنا..غالية ....وتقيل معيارا
خادت لجة البندر ومافاتا زول فى بصارة
الهمباتي الأغبش :-
===========
بشوف الاتبراوي الليلة دافر موجو
يسوي النم ترس شاشايو كوم فوجو
فوق سمح الكلام تلقاهو شادي سروجو
زاد لينا الطرب يوم دق لينا بروجو
الهمباتي الأغبش :-
============
البندر ملان ياميدو زايد زيفو
مافيهو الكريم في الحال بيكرم ضيفو
كل زول داب رقبتو مابنضمن لي وليفو
والزمن انقلب لخبط خريفو وصيفو
Khalid Alahmady :-
==============
موزون النضم ياكا انت سيدو وساسو
والمقطوع محير ياك ات بجيبلو راسو
بس لا تغب همباتى أخوى بعد ختيت أساسو
خلنا نغرف ونعب ونروى تب من كاسو
الهمباتي الأغبش :-
============
هادي النمة ياخالد وليدي الاول
والشاشاي بنيتو بيكم حيط تتطول
بي ايدكم معاي النمة مابتتحول
نعافر تب سوي في النمة لامن نكمل
Midoo Khidir :-
===========
البندر سمح بس بالمباني العامرة
العلم المفيد والعقول الزاهرة
الا كرم وجود في الناس تب ماظاهرة
كل الناس تجوط جابراهم ظروف قاهرة
Khalid Alahmady :-
==============
البندر خليط أجناس وناس متكاجرة
لكن الاصول مازالت قاعدة ووافرة
أحفظى الله وبارى الندر اهل الحارة
عوجتا مابتجيك ولا بضرك ضارة
Midoo Khidir :-
==========
ياخالد اخوي للطين البلد مشتاقة
البندر خليط وجوطتو جد حراقة
الناس ي البلد هادية وزينة اخلاقها
كايسة انا للهدوء وللراحة انا محتاجة
Hafiz Alamin :-
=========
مكتوب على الانسان دائما" يعيش فى حيره
ومكسور اللة مستحيل يتلقيلو جبيره
يارب ياكريم تنقذنا من دى الحيره
نرجع لى بلدنا وننعم بالاهل والجيره
مجادعات النمة11
غــــــــــــــــربة وحنيـــــــــــــــــــــن
======================

Hafiz Alamin :-
==========
اريت الغربه طايره وطاير وراها كلاما
نرجع للبلد وارواحنا تعود لاجساما
يارب ياكريم تحل العلى من طامه
وارجع انطلق واعيش لاجواز لااقامه

Khalid Alahmady :-
==============
معروفة الغربة طايرة وطايرات معاها أياما
كيف طاوعك القليب تمشى وتسير فى ذماما
يارب ياكريم وداللمين يرجع يعود بسلامة
نشبع كبدة ابل شية ومرارة كرامة
Mohammed Hamza Albaih :-
================
صبرت وعشت في غربة وصبر الغربة لو تدري
امر من الصبر نفسه واطول من سنين عمري
متين يا ربي ارجع لي بلدي
وحافظ والهمباتي ديل ناسي وديل اهلي
الهمباتي الأغبش :-
===========
الغربة ام قدود داست شبابا ليكم
الشوق والحنين دايما يدافر فيكم
في نص البلد ترتاح عديل عينيكم
لاتجديد جواز لاكشة يوم بتجيكم
مجادعات النمة10

Osman Amin :-
==========
كاتم عضم الابيره تقيل شيل الكفل محمول
هع !!والسدر العرج في سماهو مافي نزول
هاناس كفاي ملام الليلة اللّه موعن زول
إتكرّفْ شوف غزال ناولوني كوم بندول
الهمباتي الأغبش :-
===========
اخير جيتنا حنيت شوقنا ليك يتاتي
متمنين تبين في النمة ديك يوماتي
مقدرة هي العليك مشغول كتير تحاتي
بس بندور غناك ويعقب عليك همباتي
الهمباتي الأغبش :-
=============
من اقصي الشمال بي عمتك جيت قادل
سويت النضم وصفا عدييل متاصل
مانسيت القيم الفيك عزا خايل
ياود الاصول الخاتي قولة قايل
Hafiz Alamin :-
==========
اكان للعمه ابواتك لبسو الخوده ام حديدا" صالل
واكان للنضم ات فارسو الفوقك ثابت وخايل
واكان للقيم ات ود الاصول الحاشاك قولة قايل
واكان للكرم ات ود رجالا" ينحرو الشايل
الهمباتي الأغبش :-
============
تبيت بي عجل طفرت فوق النمة
مافتر القلم عندك وقال ننجمة
حقيت الاسم حافظ سكونو القمة
عزيت الكلام وبيك جد انتمة
Hafiz Alamin :-
===========
مشكور شيخ العرب وكيفنا بيك انتما
يافارس ام لطام وكتين الكوع بى يحما
تيراب المكوك سيد الشكره والكلمه
يحفظك الكريم بى يس وتبارك وعم
: Hafiz Alamin -
===========
ياالهمباتى اخوى ممكون اخوك بى ريد ام جمالا" جاسر
حرقت جوفى برمت قلبى برمة حشاها الضامر
غرام الريل قلّ منامى وخلانى للتريا اسامر
ودا اقرارى ياينتمى لى لماها ياسكنى يبقى مقابر
الهمباتي الأغبش :-
============
الريد في القلوب نتحانو دايما دافر
غوغر ميسو حاقب شوقو فينا يحافر
نقيب الفرح من العصب بيسافر
سببو العاجبو العناد ولي دايما نافر
Hafiz Alamin :-
=========
ام عقلا" معاها خلقه مى منقول
خفيفة روح ولونا التبرى فى شنقول
فوق نايرات خدودها ولفظها المعقول
بسوى غناى وحرّم يالهمباتى فوقا تقول
الهمباتي الأغبش :-
===========
بشد خيل الكلام فوق البنية واقول
ست كل الفريق ماليها زول بيطول
طيب الخاطر حلاوة الروح تزيدا اصول
نتشرف تبقي اخية لينا دوام ومابنزول
مجادعات النمة9
الوصـــــــــــــــــــــــــف

Abdallah Alhraa :-
الهمباتي الأغبش :-
Hafiz Alamin :-
Hafiz Alamin :-

Abdallah Alhraa :-
============
شوفتك يا سعادة الروح تزيل البلوه
صدرك برتكان يافه وشفايفك حلوه
غاية المنيه يا شبه الجنيبه الفلوه
يوم اتصادفن شوقي وجمالك وخلوه
Hafiz Alamin :-
===========
ريتدتك يالمبطر هردت حشاى والكلوه
فرقتك طلقت فينا نيران الاسف والشلوه
يا اللماك لينا فيهو السعد والسلوى
كيف الوصول وتالاك جبال العوارض دروه
الهمباتي الأغبش :-
=============
شوفتك شاف معطر بي البخور نديان
وصدرك موجو دافر غز في الوديان
السبب البزيد اضنيا في الطرشان
تلت ايد ومدة جيد قديم وحلان
Hafiz Alamin :-
==========
شبية الصيد ام كفلا" حاكا مهرة الميدان
دى الخلت اعضاى تتضارب والقلب يبق نيران
السبب الخلى احشاى تتوجع وتزيد حرقان
تلة ايدا وتنية جيدا وقصعة قدلتا ولمعة الدخان
Mohammed Elfatih :-
=============
شوفتك شفا تزيل السقم والايه
صدرك ليمون بارا وعيونك جعفريه
غاية المنيه الشوفة قبل المنيه
نبل شوقنا ونصلى نحمد رب البريه
Osman Amin :-
==========
سجره وانجبار البلد البعيد قول لي مالي ومالو
ويالاغبش طريتا وطريت وادي ام سماحه ونالو
نويت رجوع مفارق رجّع للطريفي جُمالو
وقلبي الكاتمو شوق في الحين أفوض بالو
الهمباتي الأغبش :-
============
كمل في التبادي القاصدو ماترتالو
قلبك في الصبر عقبا سماحو قبالو
بتعود الليلي ان قصرو او كان طالو
وينساها السنين ضيقو وبشاتن حالو
الهمباتي الأغبش :-
============
البارح بشوف عكل الغبار وبلوح
غطي المغرب العرقوب ترابو يكتح
اتكاور عقب تقل عيونا يكيح
ساق الخترة لي الصي البعيد وقبيح
Hafiz Alamin :-
========
الشوق والحنين مالينى لى سنتين
مسجون غربه قاعد مابين اسى وانين
اتشجع ومرات اقول اصبر ربك على حنين
ومرات يغلبنى الشوق يغرز فى حشاى سكين...
Abdallah Alhraa :-
===========
ضحوةً واسعه لي غي البنات سايقاني
مابفرز حسان بس زلهن والاني
تصنيع اليهود خلا الدواني غواني
معشوقن يبش لي عزهن متفاني
Abdallah Alhraa :-
==========
قجنو الشرك صاد البعيد والداني
اظهار الرقم من نوع محزق وشاني
بي ثورة شباب من الصواب لاجاني
انظر في العوج من العديل عامياني
Abdallah Alhraa :-
===========
طرفاً ماأنكسر في عين وليهن راني
نبلنو السنين عكازي ما نجاني
ضعفاً بي يا خلاي ما بغباني
دلوني الطريق زيفن خلاص لماني
الهمباتي الأغبش :-
===========
شرك الريدة لو قجا وين تختاهو مابيفيد
ولو هبر الحنين تالاك بحر الريد عمقو بزيد
دودرت الفرح من تالا شكبت القلب في الايد
بدور اديهو ليها تشيلو عشان جواهو هي اكيد
الهمباتي الأغبش :-
============
من دغشا مبدر وباقي النهار بي ليلو
مكتوب في صحاي دربا طويل امشيلو
السفر البخلي الناس دوام تبكيلو
زالق الخترة من حجر الدغش تهويلو
Hafiz Alamin :-
=======
جدى الارايل الوصفو خاتى مثيل
ولع فى قلبى نيران الغرام تشعيل
اكان ما بخاف اللوم وبشاعة التنكيل
كنتا خميتو فى صدرى وبلعتو عديييل
الهمباتي الأغبش :-
===========
الجدي اب رمش تحتو العيون بتقيل
تابن ساقو فوق خطوة مشيهو مهيل
مرت فوقنا نافحا عبيرا فوقنا يكيل
رديت السلام من دون تقول متحيل
Hafiz Alamin :-
==========
آه من اللابس الغويشه وشايل فى يمينو بنيتو
ينادم فى المجالس بى خلاصة نيتو
الجاهل المتل مهر المكوك فى مشيتو
الذ عبيرو من مسك الكمن فى ليتو
الهمباتي الأغبش :-
============
كل يوما بمر الدنيا لينا تعلم
مرات بي فرح وعقبا تجينا تالم
الزول بالفهم احسن لربو يسلم
والزول البليد البي قبيحو بكلم
Hafiz Alamin :-
===========
شديت اب لجام وختيت حمولى على ربى
هايج بى غراما فى جوفى اعلن حربى
الطبق البوخه وقام من حفرتو مغبى
ولع فينا جمرا كل ماليهو زايد سلبى
الهمباتي الأغبش :-
============
شديت اب لجام من الدغش منكبي
وهايج بي غرام في جوفي صار متربي
طقطاق الطلح الفي نسيمو بعبي
هيج نار غرام من نومي قمت مغبي
Hafiz Alamin :-
==========
من تبينا غرام الريل منوسر فى قلوبناجراح
نساهر ليلنا نرجا الطيف واخر مطافنا قماح
اه انا من اساى البى واه انا لو يفيدنى الآح
ربى يزيل هما" بى ويزيدك ياغزالى سماح
الهمباتي الأغبش :-
===========
الريل الجدع فوق الكتيف ملفاحو
هيج فيني شوق عقبا نبل نقاحو
السبب البخلي الريد يسوقنا جناحو
عويد بانا رطيب جوه القليب نتاحو
Hafiz Alamin :-
=========
الخلانى للفجراوى ازوزى صياح
جيد الظبيه جيدو ووجهو كالمصباح
البايح لو راس مالى والارباح
يارب تكتب ليمو لى فى محفظ الالواح
الهمباتي الأغبش :-
===========
اه من نار غراما الفي القلب نتاح
فض عيوني من نوم الليالي وساح
الجوف التملي الريد عليهو وشاح
من فرق الغزالة الليلة تاور وناح
Hafiz Alamin :-
==========
من جنى العلى اصبحتا ليلي ونهارى ازاول
الاهيبو ظبى الوادى الفتق جرح الغرام الدامل
اسبابى المحشم وبى القبيح ما بجادل
ردفا" عالى صدرا" شاب وديسا" هادل
Nisrin Musa :-
=========
مَزرُوع في التَقانِت وحشُّو بالنَجَّام
ونور خدَّادو يخَفِي الغَربلُّو العُجَّام
مبَرَّع دِيسُو ما سولواللُتَاقة تُمَام
بلَلْ خولِيهُو حدَّر جَدوَلُو الجمَّام
Hafiz Alamin :-
=========
الريل القدل وتالى اليمين متمهل
خلى قلبى فوق نيران جهنم يمل
اكان ما اتحقق المقصود وليهو وصل
بفارق عيشة الدنيا ورقاد الضل
Hafiz Alamin :-
=========
ياشيخ العرب من زمان بنات حوا فينا تبهدل
يكسرن شوكة المنو الجبابره بتجفل
مفدوعة الوريد الفى الوضيب بى تتل
لسعت عقربا وقنب عشوقا يمل
الهمباتي الأغبش :-
===========
حافظ ود علي في النمة ديمة تميل
باهي الطلعة رايك فوق عدل مهييل
عاشق للجمال وصفك فوق جدي الريل
بخلي الروح تروق تفقد صوابا عدييييييل...
مجادعات النمة8
نمة في الوصف
=========
ودالمك نمر :-
=========
ودالمك نمر :-
=========
فى مشيتا تقيله ولى اقداما مى ختافا
ان جلس بتسلى وللاصول عرافا
الذوق والظرف وارثاهو من اسلافا
دره مكمله وللرمــيم عوافـــــــــــا
Hafiz Alamin :-
==========
هالكاني ظبية واديينا المضمر هافا
فاتت اندادا سماحه وذوق وظرافه
عاليه من السدير ومردمات اردافا
ظبية مكمله زكر ربو كل من شافا
الهمباتي الأغبش :-
============
الذوق والخصال وارثاهو من اسلافا
ولي درب نوين وبدور سريع اتلافا
لكن الظروف لي سعادتي يوت ختافا
ولو صدقت معاي معاك سعادتي اضعافا
مجادعات النمة7
ودالمك نمر :-
========
مغلوب غلبى غلبا" جهرو خلاى حار
ومظلوم اشكى ظلمى وحاكمى جاير وجار
مضيوم ماشى دمعى ال للوجن نحار
اه من تميز حظوظا ولعبة الاســـــــحار
Hafiz Alamin :-
===========
دى الكاسيها وضيبا لى تحت الكفل يترنع
مفدوعة الوريد اللى شوفتى تعطى وتمنع
مربوعة القوام الفى المشيه تغطس وتقلع
يا الواشى مافى اسبابا" يخلنى من غناها اتمنع
Hafiz Alamin :-
==========
دى الكاسيها وضيبا لى تحت الكفل يترنع
مفدوعة الوريد اللى شوفتى تعطى وتمنع
مربوعة القوام الفى المشيه تغطس وتقلع
يا الواشى مافى اسبابا" يخلنى من غناها اتمنع
الهمباتي الأغبش :-
==========
ان وقفت مهر وان مشت تتدفدع
وان بسمت قلوب في ابتهاج تتصدع
السبب البخلي الروح دوام تتسكع
خمرة لونا نايرة وعقلي سافر ودع
حافظ الامين :-
=======
الواشى جاب كلام وقال ست البنات زعلانه
شان بنريد السمح ونزيد وصف فى غنانا
والله ماقصدنا غيرك ورب العباد يدرانا
انتى الساس وتاج الراس وانتى هوانا
الهمباتي الأغبش :
=========
تزعل دنيا وانتي ماتكوني جد زعلانة
نفديك بي النفوس وراحتك انتي منانا
كل القول عليك ان كان عرب ورطانة
غيرك مابشوف قمرا ظهر في سمانا
حافظ الامين :-
=======
لسانا" يوصف غيرك يارب يتبكم ويتصما
وشن فى البنات الغيرك غير السجم والرمه
انتى نوارة القلب البيك الفرح ينــتـــما
وانتى غرام الروح وست البيت ومكانة يمه
الهمباتي الأغبش :-
=========
كل الكاتبو فيك وليك الكلام ينتما
محال اوصف بلاك وبي غيرك انت انجما
تأكدي يا البلوم انا ليك بدور اتلما
ولو وصفت غيرك انشاء الله اموت بي الحمي
الاشتراك في:
الرسائل (Atom)