مجادعات النمة24

مجادعات مغسة من اللوري الشال المحبوب
=====================

Hafiz Alamin
============
يا الشلتا ضامرة الحشا المبروم
تتكسر قوايمك ومن المكان ما تقوم
يا اب كبوتا"" مرخرخ زى وش البوم
ياالاسود عقاب كتله وصباحك شوم

الهمباتي الأغبش
==========
اللوري الدفر شال البنية معاهو
شال قلبي في رفرف قوايمو وراهو
شاحد الله الكريم تبطل واتلافاهو
ومكنتك تنخرم والدفرة ما نافعاهو

الهمباتي الأغبش
============
النيسان دفر شال البنية وغاب
خلانا الغبار وسمانا فيه غراب
يااب كبوتن اصفر شاكيك لي الوهاب
تتحتت بلاليك ويتكاور عليك خراب

الهمباتي الأغبش
=============
يا الشلت البلوم وعادمك يدخن عاوي
تقسيمتك علت زايد الابنص ضحاوي
لو شفت الدموع ساعتو البغسل وكاوي
ماكان شلتها وفجيت الرمال بتلاوي

Msaad Yousif
==========
يالسادات طوال الباع تقيفوا معاى
اللورى الشال البنية وزاد لى ازاى
يعدم الشاسي كمان الدنقل والياى
يقيف ما يتحرك وتانى مايمر بجاى

Hafiz Alamin
==========
شكيتك لى الله الواحد الجبار
يتفرتك حديدك بى قوة الستار
يااب وشا" متل الموت وخراب الدار
شلتا المرنوعه وطلقتا فينى النار

الهمباتي الأغبش
============
بوريك اللعين من الدغش قام طار
صحي السمحة مخلوعة ودموعا امطار
دخل فينا خوفا ما الفراق اقدار
بخافة الشوفة في ساعت الوداع الحار

الهمباتي الأغبش
============
اللوري الدغش عبولو تب قرباتو
سخنو لي مكنتو ورفعو لي صاجاتو
يوم قام الجدي مسافر علي تنداتو
اتحنتبت واقف عتود فقد اماتو

Msaad Yousif
===========
اللورى الجابوا شنو التعيس فى الفريق
شوف عينى سواقوماو صفولوا الطريق
جاها عديل قبل الناس تفطر تفك الريق
شالها وفات ابوراسا شبية الدابى ابوزريق

Abdallah Alhraa

=============
ختر الفورد فارد قلبي من شريانو
فارقت النصاح حسادي فرحو وشانو
الجدي البقت ارواحنا عايشه عشانو
غادرنا ورحل الفي السواد نيشـــانـو

عمك تنقو
===========

في اب حديد اخوانا الليلة أثارو
شيال التقيلة وابواتنا بيو يوم سارو
مزارعنا الحصد خـت فيه خضـارو
غادرنا ورحل وخلى لينا أثـارو


Msaad Yousif
=========
هو اصلا خواجة فكر وصنعوا للشيل
ماصنعوا يركب فية شبية جدى الريل
المتلوا من القراش مابقادر الا للتحميل
بس لوريك طبعتوا شينة ابشاسيا طويل