مجادعات النمة25

محمد الحسن إبنعوف

==========

قدر جدعلا النضم المقفى قصيد...
هبرت كفتى الكجامه مابيه تصيد...
بعد قندولها فرك قاوى للحصيد ...
جفلت منى عاد ما أياهو حال الصيد

Hafiz Alamin
============

صيد ارايل الوديان ياخلاى ما بالايد
وحد ماتشرك يختر من الكجامه بعيد
المهر اب صوتا" حاكى البلبل الغريد
مسجون غرامو ومستانف طالب التأبيد

لهمباتي الأغبش
=========

اللافح المطرز وفوق دوفو تالي الايد
نفح نار الغرام في جوفي حارة شديد
السبب البخلي بعادي ما بي الايد
الجدي المكوكر من زول يبارك العيد

محمد الحسن إبنعوف

=========

عين المك تلقط فى الصعيد والسافل...
والوزين فرادى ومره مره قوافل...
وقعت عينى فى جدى البطانه الجافل ...
بت متل الفرض ساعة تحوشو نوافل...

Hafiz Alamin
=============

الوزين الجفل بى قدام بيوتنا قوافل
طلق فى جوفنا سمايم الصعيد والسافل
الخلى العين تزرف والنوم فارقنا وجافل
الاريل المفدع مضمور الحشى الكافل

Msaad Yousif

===========

الوزين الجيدو محزوز متل القلادة
لابس ابيض متل الدكتور فى العيادة
ساهر بينا الليالى وعينا كتر سهادة
الله يحمية من عيون الناس اللية ريادة

الهمباتي الأغبش
=========

المهرة الجموح الفي وتيدا تناتل
طامحا اردافا من كتر العلوق ومناجل
السبب البخلي الزول يقبل جافل
ختوك لي الصبق سعرك بدورلو منازل

محمد الحسن إبنعوف

=========

ديسك شفتو مندل لا رباط لاعقده...
خياتك يلاصفن زى لتيبت المقده...
الزرق القصار أمات تفيفه جرقده...
مالك هامه بيهن شايله ليلك سقده...

Hafiz Alamin
============

ديسك منسدل فايت الكفل بى جبده
وجهك نور القمر الحامى العيون الغمده
الخلى المقل تدمع وليلها حاكا السقده
فراقك طلق فينا نيران الاسف والشده

الهمباتي الأغبش
===========

ديسك ليل طويل تحت الكتوف اتمده
شوقك في القلوب دولابو ما انسدة
يام وجها صبوح من نارو كيف الغمدة
فراقك يالغزال كال في خشومنا الرمدة

محمد الحسن إبنعوف

=========

بعد فرقته عقبان مغسه مابتقنت...
واحده الزايله عندى إن سكلت وإن غنت...
تركت الهبه ليها من الصعيد وإتنت...
شربت ريدى بكرى إتكيفتبو وتنت...

Hafiz Alamin
============

يوم جانا الخبر وقالو ساعة رحولك دنت
اتفرم القلب ليلــو ونهارو اتقــنــت
فارقنا المنام وساعة الفرح اتانـــت
ياريت تعود تفرحنا تعمر ديارنا الصنت

عمك تنقو
=========

من يوم الفراق قلوبنا تب ما اتهنت
لا اتمنيت انا لا حتى هي إتمنت
لو ما الصبر كت في عداد الناس الجنت
بعد طول الفراق حنيت عليها وحنت

الهمباتي الأغبش
=========

قامت راحلة من عيني قصيبة التقنت
حمامة المغرب الليها الخلوق تتصنت
السبب البخلي رويحتي ليها اتحنت
ممكن في البعاد وظروفي يوت تتعنت

عمك تنقو

=====

سهـران بفكـر يــوت مسـائـي صبـاحـي
جريـح كايـس للطيـب يــداوي جـراحـي
أئـن وأنـيـنـي زايــد مـعــاه نـواحــي
من الحال الـعلي نسيت مكان مفتاحي

الهمباتي الأغبش
=========

انا والتنقو يوم داك قمنا دغشا بادر
شدينا السروج والسفرة كان بالخاتر
عم تنقو بيدوبي وقرباتو فيها مساير
اغبش في الفريق وفي الحارة اسدا ناتر

الهمباتي الأغبش
=========

عمك تنقو هوي اوعك تكون سواح
وفي دنيا الغرام طاير بغير جناح
الخلاك تساهر والليل تشيلو نواح
غير شوفت الحبيب ياعمو مابترتاح

Hafiz Alamin

==============

آه من وحايحك كل ماليها زايده زياده
مرضك مابتشفيهو زيارة حكيم وعـــياده
السبب الغير طبعى وقالب على العاده
وجناتا" يضون فوق الــخديد الـــــساده

Midoo Khidir

=========

اهل النمة دايرين في السمح نتلما
نحدد لينا موضوعا وناخد جمة
كلنا نتفق وموضوعنا جد يتمة
ننم نكتب نحل بيه قضية مهمة

الهمباتي الأغبش
=========

دا النضم القبيل حافظ عناهو كتير
ولينا بداهو اصلا واصلو خيرو كتير
في الكفتيرة ابدع وشعرو بي التصدير
وعبا اللوري لوم الشال الغزالة يطير

Midoo Khidir

===========

الزول إن ركز وبالحكمة هدأ اعصابة
ينجح في حياته الخير بجيو عن بابو
يعرف مالغلط ويزيلو من اسبابو
وان سأل الكريم يدهو فور جوابو

Midoo Khidir

===========

الزول إن ركز الحل بيجيو قدامو
بعرف كيف يفكر وكيف بوزنو كلامو
كيف بقدر يعامل الناس باسلامو
يكون محبوب وبين الناس بيعلى مقامو

الهمباتي الأغبش
=========

الحل انعدم سادر عديل قدامو
والحظ العنيد فارق نهر بهامو
الجدي المفدع لو اكون قدامو
روحي تبرد في الوجيه وقوامو