مجادعات النمة40

Abdallah Alhraa
============
عناق ام سومر المن الانيس خبابه
تلّقط في العسين فوق سمره مي شبابه
ختت قلبي فوق جمراً تقول تقــــــــــــــابه
كل ما يدور اموت توميلو بي الهبابــــــــــه

Hafiz Alamin
==========
آه يارفيق من نار الغرام واسبابا
فتقت فى جروحا" يصعب على اطبابا
عديل القوام اب وريدا" طرى وهبابه
طالق فى نيران من اشواق وصبابه

الهمباتي الأغبش
===========
العقد اكتمل دق لي الطبول ابوابا
طولتو البعاد والنمة مات تيرابا
شاكين الظروف والدنيا لي وهابا
تتحسن ظروف ويخدر يندي عقابا

محمد الحسن إبنعوف
==============
أسود من صباح الله الصباح ده معفر...
رحته بلا سبب ساهى أتعرط وأتنفر...
قلبى الدغش مابى أم بسايط جفر...
أشوف البضحك إبكى الببارك كفر...

Hafiz Alamin
=========
ركاب عليهو الاصهب العجاجو يعفر
ودفاع فحل المراح اب زنودا" دفـــر
بحفظ عهد الرفيق ان خان او قصر
واســاى للبتطاول على ويتنــــفر

محمد الحسن إبنعوف
===============
ياحافظ أخوى القافيه فا وبى راها...
لازم المو لزوم عقب الغنيوه أبراها...
ضبطية النضم لابد نتحراها...
والنمه إن قست مابنبقى نحنا براها..

Hafiz Alamin
===========
فاهم للاصول حافظها سهول ومتاهه
قبلنا كتير فارقتا سامحنا وماحكيناها
ان درتا الدرب نمسكو ونــزيدو وجاها
وان طولة لسان دروبنا اخير تخــتاها

عمك تنقو
=========
تنقو معروف ركاب بنات عسجور
اسدأ في الخلا وتمساح في المسجور
ينصر للضعيف حاشاه ما ماجور
صابر على الزمان مهما عليه يجور

الهمباتي الأغبش
=============
لسانك في النضم اصبح عديل ساطور
ختيت في الدرب ياتنقو كم ناطور
معروف يالهميم في الوحلة يوت قاطور
ود تكتوك حداك راكب الحكم حنطور

Khalid Alahmady
============
حرم انت ماك تنقو انت ابن منظور
جيهت النضم وكمان معاهو زيادة سطور
انت بقيت فى النمة مع اللحم سيد التور
ياربى العازة نايمة ولا طالقة البخور؟

عمك تنقو
========
إن جيت للنضم النضمي هيلو وسيدو
ماني الدريفون اللبعلب يداب في ليدو
قلت الكلام تاني ماني بعيدو
فِهمو البروف ومختار الصحاح في إيدو

محمد الحسن إبنعوف
=============
ويا الهمباتى كيف أهل الفجيجه الغادى...
كيف لشقتها كيف نشقتها كيف شقتها تبه ووادى...
كيف أخوانك الخرش القبيله جنادى...
دقارا" بورو الوش وكت نغم البروجى ينادى...

الهمباتي الأغبش
===========
اخوان البنات فوق تاتشر مرقبنا خو
مشط لي الدروب مرات يطير في الجو
صنقر في الدفاعات صحيان وبايت القو
وعن رفع التمام تحتو الارض تنطو

الأميرلاي السراج
============
يا ود أبنعوف الشكوة شن معناها
سكليب النسون هردنو حشاها
شافعة متل قصيبة الخيدران مرباها
نحرت كبدتي وكتر النويح قصاها

الأميرلاي السراج
============
وازرني الفقر من قمت قافل دربي
مغسني الدهر زود مواجع كــــربي
فوق درب الوصل للرايدو بالي وقلبي
تهت ورحت كم قربت أمش لوكربي

الأميرلاي السراج
============
من بية وبلوس بيلا الأغر وأبرنجة
لا بحر الرهد فوقو العرب منخمجة
يا سيدي الحسن زينة ولاد أبعنجة
ياك أسد الرجال الما بشيلو طبنجة

الأميرلاي السراج
==========
السايقة بتصل عِلا النوائب تافلـــــة
شوك الحسكنيت عفر دروب القافلة
سراج الحصين ما تبقي عينك غافلة
تنشاف كل يوم سمحة وبعيدة وجافلة