مجادعات النمة44

Abdallah Alhraa
============
مهرة دار جعل ظبيه ومها وعنتيله
في درب الوصول تهت وفقدت الحيله
في اصلك قديم العفه باقيه زميـــــله
بت عز الملوك اسياد حقولنا ونيلــها

Hafiz Alamin
=========
مهرة الملوك الفى مشيها وحيله
طلقت فينى نيران الغرام تشعيله
تــربـيةالعـزاز المن جدودا اصيــلــه
انا لى لماها عدمتا السبيل والحيله

Midoo Khidir
=========
مهرة دار جعل مالقينا ليها مثيل
ماهماها موضة ومسخرة وكوفير
كل التعرفو العفة والتأصيل
الراسية الرزينة المابتعرف الميل

الهمباتي الأغبش
==========
المهرة الموهطة وفي مشيها تقيلا
تتصنت خلوق لو طفرت صهيلا
السبب البخلي الروح تتوقو مقيلا
عطر العنبر الفاح وروحي زاد ملميلا

Osman Amin
=============
شيتن من غزال وبعضن من عواتق الخيل
ومهزوم فوق خصير دسته زيرو عديل
كشحان ني الثمار تارساه قيفة النيل
مسطولة جمال عاشقك ركوبو الفيل

الهمباتي الأغبش
==========
اتناضمنا زين وفضفضنا تب بي المرة
وتاورنا القديم ساعة كسور الجرة
فوق قيف النضم واقفين قصعنا الجرة
حال الدنيا فيها ويوم تطلع برة

Osman Amin
========
فوق عز بنات جعل درب القنا الأتكسّر
مو وقفن زلط ومفهومة لي للبستفسر
للضيفان دوام ماشفنا كرمن قصر
ولينات حديث نضمن مواسا موّسر

لهمباتي الأغبش
==========
النضم الدقاق وشاهيا تقيل سكر
وفريع بانا رطيب فدع القوام واتكسر
ضحكتا بي خجل سال العسل واتقطر
وعندها انبدلت قهيت هناك استغفر

Osman Amin
===========
النضم الدقاق تاباهو لي يا التوم
عسل الباوقا وين لي منقة الخرتوم
علي حس الجنان العين تروق وتنوم
عليّ الضمانه معروف رحيق مختوم

لهمباتي الأغبش
==============
من امس الصباح وباقي النهار اتدشر
مريوق شوفة انبل في شباطو اتقشر
الجاهل القدل قدامي يوت يتفشر
طفش عقلي في دربو وقليبي اتنشر

Osman Amin
========
يتحسبن شهور ماشفتا فيها النور
لااتخرت الكرنك لا أتدوّر البابور
السبب القبيل قطعني خمسه بحور
ممشوق القوام الوازن الطابور...