مجادعات النمة45

الأميرلاي السراج
================
سألتني التقيلة الما بتشبه جيلا
في المشي والضمير شبه الغزال والريلة
بت يوسف سليلة العزة واقفة عديلة
مضمورة خصر سمحة وكريمة وأصيلة

Hafiz Alamin
==========
شن قالتلك السمحه الفى مشيها وحيله
مهرة وادى الملوك شبيهة الغزال والريله
مربوعة القوام حـــــوراة العيون وكحيلــه
مـــوزونة الحديث لاها خـــفيفه لا قويله

الأميرلاي السراج
===========
سألت بي خجل من يات بلد جايينا
شايفاك فوقنا عاد دمك بشوفو علينا
يا ود الرجال أدخل هداك وادينا
كان قاصدنا خير أو كنت قاصد شينة

عمك تنقو
=========
ست البنات سماحة وخلق وزينة
تمشي بي مهل تحلف تقول وزينة
موصوفه وسط البنات وقار و رزينة
واصل يا الامير عـلا ما تازينا

الهمباتي الأغبش
===========
يوم نضمت بقيت فوق العذاب مجدوع
الضامر الحشا تالي اليمين مفدوع
قعدة راسية تتصنت بقيت مخلوع
استغفرت في سري وعدلت الكوع

الأميرلاي السراج
===========
سمحة جنس سماح البت تقول جنية
مبرومة وسط مدعوجة ما دغرية
في المشي تحرجك ذي التقول قمرية
تمشي اليوم ده جت شان توصل الكلية

الهمباتي الأغبش
===========
طاعمة جنس طعام من السكاكر احلي
فاقع لونا ابيض بي فوق للقمر تعلي
تتمني الخلوق لو يوم قريب تتدلي
خلت كم قلوب فوق الغرام تتقلي

عمك تنقو
========
شبهك في البنات بحكوه قالوا دباسة
وكتين تقوقي تنعشنا بي انفاسه
فيك يا ام قيردون سوينا ليك وناسه
متين نشوفك بعدك صبحنا كباسه

الهمباتي الأغبش
===========
يوم موت الشليل والرمة بي حراسة
فوق دنيا الغرام حاقب معاي كراسة
بدل مركب حنين ركبت لي رفاسة
كان اوصل سريع وابقي اول ناسة

Hafiz Alamin
===========
بت ريم المها الماخده من السماح صافيهو
قــدر ما الـريد يطــول حســادو تكتر فــيهو
وكـــت ضاق المجال والحظ عرقتا الفــيهو
بسلمك قلبى امانه هاكى منى اتلافيهو

محمد الحسن إبنعوف
=============
حبابك تاج قبيله وعز بطون ود عايله...
حباب سند المفوزره والمتكيه مايله..
صداد العيوق كسار رقاب الصايله...
العاقر الليوس منك بتمرق شايله...

Hafiz Alamin
=========
الفى الدرك ايدك تنجدو طايله
ارباب ود قبيله سخى وعدال مايله
ود اصولا" فوقو الملكه تلمع خايله
ود عزا" قديم موروث قبل الزايله

الأميرلاي السراج
============
صابرين يا أبنعوف فوق المحن بالكد
لا خفنا العوز لا ضقنا جوع النده
صهاي البروق الما بخيب في مد
كفالنا النعم من الشبع ننقد

الهمباتي الأغبش
============
تجدع من صباح قط مافترلك باع
وفي النم الغليد بلقي ردك صاع
فوق قيف الغنا معروف صمد جداع
وموج بحر الغنا فارد حداه شراع

Hafiz Alamin
============
لحاق الدريكه الاغبش طويل الباع
عطاى الزاد بالجمله مو بالصاع
تيراب مــــغاويرا"يسندو الجاع
صفحتنا فى سطورا ينم سجاع

الهمباتي الأغبش
===============
قيف طرف البحر اللي البعوم بلاع
مقلام الوجع اللي الضروس قلاع
ناب اسد الخلا اللي اللحم قطاع
اخويا اللي ضرا وساعة المحن سراع