مجادعات النمة48

وصف الجعلي
============

Osman Amin ........
==========
بديكن وصف للجعلي تعرفو بيهو
أبااي العوج من الصفات الفيهو
عوام المحاصة قص الرقاب شافيهو
وحرّم الفارس وزن قدُر الجِعووله الفيهو

الهمباتي الأغبش
=============
يادكتور حلاوي العز بطر يبراك
الجود والكرم لاصق مع ابواك
تبان الالم فشاش غبينة الجاك
ملاك الرحمة تربت تملي يداك

Osman Amin
===========
يا الأغبش دحين ما تخت علي المكشوف
حسب الأستفاق بي( كودنا) نحنا ضيوف
ببهجا هسي وشخصك ببين معروف
بسعدني الغتا وعز الفراسه الشوف

Khalid Alahmady
=============
انكشف المغتا واتعرّف الموصوف
اتنين فى المحاصة عز السمع والشوف
فى العلم المغرّق والحكم رصو الحروف
فى الأصل أولاد معزة بحر وجروف

الهمباتي الأغبش
=============
تبقي الشوفة منية يا الخزين الغايب
نتقابل عيان نفطر فطير بي رايب
تحكي لي كتير في الوست لي عجايب
وبي دامتي المعاي قاصص وكاتل الشايب

Khalid Alahmady
============
شهر أبريل ترا جا لايبقى شهر الكضايب
احسبلو وأعد واقول بكون شهر العجايب
وبعدو مايو القالو كلو ببقى طمبور وطرايب
أندق وانجلد فى الدارة تب مابتلقانى عايب

الهمباتي الأغبش
=============
ماشفنا الوزير لعريسو بترك تب
في الدارة بيطير مع العريس ينصب
مابتختو صوت فوق الضهر ينكب
فداك انت العريس حرم بدل يركب

Osman Amin
=========
أبشر يا عريس..
أبريلك كبس ضو حِنة دُكٌن مختوتة
ودقولك نحاس ما بغنو ناس حوته
شبالات جدي وكت تكب زغروته
يا حليل اُم سماح عقبالنا نحنا الكوته..

لهمباتي الأغبش
===============
هههه الله يجازي محنك ....

متمني المعاي في الدارة يبقو معاي
عثمان بي اليمين وحافظ شمال تالاي
خالد والهرع واقفين يباركو حداي...
والسراج عزم باقي القروب بي جاي

خالد الاحمدي
===========
نحمدو نشكر فضلو الله الكريم القادر
سوق النمة أصبح بالمفاخر سادر
السبب البخلى الزول شقى وموقادر
يغب ويعود ينبسط ينسى الدرادر

الهمباتي الأغبش
===========
سوق النمة اصبح بالسراج عاتي
وشيخ عثمان بلد حافظ هناك يوماتي
ميدو هناك تجابد من ايدا جار همباتي
فاقدين الاتبراوي والهرع سندانتي

Khalid Alahmady
===============
الاتبراوى المسجم فى الدنيا دا المتنيّل
مابقدر يطولو سماكن الخريفو مسيّل
غير يحاحى الطير وفى ضلكن يجى يقيّل
ياركايزنا الفوقا نخت حمولنا نشيّل

الهمباتي الأغبش
===========
مابتعرف تنم فوق الجسيمو نحيل
تقالة الغنا التحتو الخلوق بتقيل
شاغلاهو الظروف عليهو يوت بتميل
بي نمو بنخت فوق السروج ونشيل ..............