مجادعات النمة51

Osman Amin ..........................
َالهمباتي ضارب نص العمل بي طلقا
ومدوغتين حسس والراس بسو الفلقا
سويها التَلفّن متلك يميين ما بنلقا
بنرفعلك تماما والراس تسيلو الحلقا

الهمباتي الأغبش
ياعثمان امين الزول هناك ناضمتو
بي كل الادب حييت وتب سالمتو
الزول زي جبل اسدا عديل قابلتو
من دون التردد دخلت تب عارفتو

الهمباتي الأغبش
الزول في الرجال من صوتو انت تخبرو
تواضع ووهيط نضم عليهو حنكة تجبرو
فاس الطندب الكل البقابلو بكبرو
الزول تب صمد الطايلة مابتعبرو

الهمباتي الأغبش
الزول تب جنب ماهو المعولق اضينة
الفهم الكبير فوق لي العقل زينة
هو فوق سابع سما ادلي لي تبينة
موخاتت فرق انسانو روحو حنينة

الهمباتي الأغبش
اثني عليك كتير جاب النضم فوكام
زاد فوق اللي كان عالي عندي مقام
طار حلف اليمين من الاصم قدام
اتقالد اجيهو في ايدي جاري مدام

الهمباتي الأغبش
واديتو الاذن ووعدا نجيض ومدفق
ازور دارو الهناك بعد العسل يدفق
مهما ان كان بعيد انا بيها ليهو اترفق
عشان معرفة الرجال بي هينة مابتتلفق

Osman Amin
دا يا سعادتك قت لك بضبح أولن في التبادي بعداك يكوس الضيف.

غُناين في القَسِم مهمن اجُرّو ماهو ملان
حباب قبْاض الضيوف البكرمك حفيان
أسمك جنسك ما بهمو ولا بسألك عنوان
تلب قضاي حوايج دا البقصدو العميان...