مجادعات النمة52

أبوبكرالجنيد يونس
==========
سلام النمةوالشاشاي وأجمل نمة
مني علي المووقدين نور؛ليالي ضلمة
بستأذن عليكم بالدخول في اللمة
أصلي اخترت داركم مرسى شان انجمه

الأميرلاي السراج
===========
مرحبتين حبابك والشرف للنمة
ياك أسد الرجال فرتاك جيوش اللمة
دارك وبيتك إت أدخل عليو إنجمة
ما تستأذن إت سيد الأصل والعمة

الهمباتي الأغبش
==========
حباب ودالجنيد مبسوطة بيك النمة
سامعبك قديم تب سوق غناك انتمة
حبابك ياللدر في النمة تلقي اللمة
نجدع وننبسط نطرب نهز ننجمة

Msaad Yousif
============
مرحب حبابك ابو بكر الصديق
يانور الخلاوى ابوصدرا ما بضيق
النمة بيك فرحت وفجت ليك طريق
اخترة دارك ومرساك وان ليك صديق

Hafiz Alamin
===========
حبابك الآف ولا جوه خليك داخل
اتباشرنا بى جيتــك حضــورا" حـافـل
فوق المهر البتقدل والغزال الــجافـل
نطبق النمه فوق النمه نسوى محافل

Khalid Alahmady
===============
ود الجنيد زول قايد الشعر من زمن ادابو
مرحب حبابك يالفتحت لينا أبوابو
شاعر ستة وتسعين النمة اكيد بتتهنابو
ياحليل الزمن الجميل وناس منتصر بابو...

Khalid Alahmady
============
ياها المحرية فيكم ياشباب النمة
أكان أمات خدور وأكان أخوان شمة
مما عرفناكم تسالمو وتطايبو بى همة
الناس البخاووكم حرم مرادم تم

الأميرلاي السراج
============
البت الحليوة بتقرا جامعة فــــــي أولي
إحسان الحسان هيبة وجمال وطفولة
ترباية خمج بيبســــــــي وقزايز كـــــولا
يا رب العباد أنا تاني أرجــــــــــــع أولي

Ahmed Mohammed Alfatih
=================
السراج أخوى أعذرنى بس فى اللوم
شان ست البنات داير تعود برلوم
ترباية الخمج والبيتزا بالمشروم
سيبك من بنات روتانا والدوت كوم

الهمباتي الأغبش
============
البت الحليوة الحافظ اخوي ناداها
يوم شافة اب شنب كل الخلوق خلاها
العمة المقنطرة في حالو يوت دلاها
اتحفحف صباح حتي الدقن جازيها

لأميرلاي السراج
===========
أنا غير البنات يا خوي شن بسوي
ياهن بلوتي وباقيلي فيهن أسـوة
البيت إن خلا بملاو براي ما بسوي
وقدن ناري حي كتلن جواي النخوة

الهمباتي الأغبش
===========
ترجع اولي يا السراج معاك الحق
دي القطعة الحداك زي العسل دفق
اللادنة القوام مهرة جات تتفشق
حتت لي الصبر خلت قلوبنا محق

Ahmed Mohammed Alfatih
===================
ترجع اولى يا السراج تعيد الجولة
ومن حب البنات لا حيلة ليك لا حولة
اركز يا العنيد أطراها ديك الصولة
نقطة سطر جديد ما تجيبا تانى الشولة

الهمباتي الأغبش
============
هو زولك فاط سطر من شافا اول مرة
فوق قيف النشاط شاشايو داك انشرة
قولب لي نضم بين الارض ومجرة
اتنبل شحظ وعروقو وقفت برة

الأميرلاي السراج
=============
يا حليل النبق صمغ الهشاب والدومة
ظنيت المدائن زاتا فقرة وشــــــومـة
من خشينا يا أبو حميد لبسنا هدوما
بارينا الطرح سلمي وعبير والتومـــة

Khalid Alahmady
.==========
ود أمحمد أخوى سراجنا ليه بتلومو؟
زولكاونو قلبو بدري قبل هدومو
زمان اب سن عديل ختاها فارز كومو
قال لاتاخذونا فيهن القومن هضلومو

Mohammed AL-arky
=============
السراج أخوى أرجع وعود برلــــــــــــــــوم
عشان حتة عسل اكلو الخشب فى الدوم
تتعب فى السنه وانشاالله تفرح يــــــــوم
ولا عاوز تعيش طول الزمن محــــــروم ؟؟؟