مجادعات النمة53

Abdallah Alhraa
==========
في الزمن السبق فيكي الوضيب شاهدتو
لو الطول الشني ولوهو المفــــــرق ختــــــو
اكان دار دوام ياكي المبـــــــــــــرع ستــــــــو
لكن اصلو عادة الشتله بتشيل الثمار وتحتو

الهمباتي الأغبش
===========
الليلة الهرع بي مراحو بان متقادل
اطرب فينا روح نشط حسس متاقل
دايرين طول غيابك تعويضو حالا طايل
بي النم الوفير سوي المعاك مسايل

Abdallah Alhraa
===========
ابشر يا البهيج سيد الطرب والنم
وباين ديمه في النمه وبدور انجــم
ما بالايد جفاي حكم الزمن والهــم
وكان سلم الفكر عقب النضم بنتم

Hafiz Alamin
=============
مبرومة الضمير البارمه قلبى بى شوفا
طلقت فين اشواق الحــنين ملــهوفه
سماحا" اصيل حاشاها مى مكلوفـــه
ظبيه ان قدلت تبرأها العيون مشغوفه

الأميرلاي السراج
============
وما من الثمار الشغلة دايرة دراســـــــة
وإن صعب الركوب فرسك بدورلو مراسة
العشق الصحي الخلاني فوت كنشاسـا
نصبر فوق محن لا هيلنا لا من ناســـــــا

الهمباتي الأغبش
============
يا الهرع التلب حافظ مطنش غايب
شاحد الله الكريم يكون عوافي وطايب
الا الزول فقد في النمة عندو حبايب
نشفق يوم يغيب ما الدنيا فيها مصايب

الأميرلاي السراج
============
قول بإسم الله وإتفضل علينا تعال
أول نكرمك بعدين نعرف الحـــــــــــال
سيفك سيف تلوب ما شفت ليه مثال
وفرسك هيل حرب ما أظنو للمرسال

Hafiz Alamin
========
اخوانى التلوب والله ليكم وحشه
اشواقى تتــقاطر حاكيه السحاب الرشا
شغلتنى الدنيا اخدتنـى بس فى دوشه
اسأل الله ليكم السلام ماتضوقو الهبشه

الهمباتي الأغبش
=============
اصلو الهبشة مابتجينا وانت معانا
في الصقط البشق نلقاك انت غتانا
والصيف والهجير ضلا رتع تالانا
النم انت سيدو وليك باقي غنانا

Hafiz Alamin
===========
ربنا مايفرقنا يا اولاد الاصول
نتـكاتف نشيلو حــالى القول
نبنى نعلى النمه دار مسؤول
بيــهو نتبـاشر ونــكيدو عزول