مجادعات النمة54

الهمباتي الأغبش
============
الجاب الهرع يارب يجيبو اخوهو
سيل الاتبراوي الاصلو ما بترسوهو
الليلة الخميس يوم جيتو ماتنسوهو
بنشر الهمام سيلا بشيل الجوهو

Khalid Alahmady
============
أصلو الهرع شاعر بكرب أشعارو
وان همباتى نم وجر فوق مسدارو
تحلف تقول طمبار ى نقر أوتارو
تطرب تنتشى وتقول زيدونى من عبارو

الهمباتي الأغبش
=============
الوطواط ظهر ظنيتو باعو خميسو
بي النمة الهناك شاري تب لي قميصو
ماعندك خميس شان عينو تجبر كيسو
وقباض الشليل مابغبي يوم من ميسو

Khalid Alahmady
=============
الوطواط بغبى النهار وبالليل يعودليو شوفو
ان مالحق الخميس فى النمة اياهو خوفو
والقباض انت عارفو وخابر جروفو
النمة تسلم بيك يامامنن من الخيوفو

Abdallah Alhraa
==========
عمود النمه طود انتو النصبتو اوتادو
وملهوف السنين ياكم شرابو وزادو
نوع المتلي ان غابو وكمان ان عادو
شن لاقين بلا هامشاً ضربتو سوادو

Mohammed AL-arky
==============
أنحنا أولاد البلد الجميله بى ناســــــــــــــا...
وأنحنا لى المستقبل الجاى أنحنا أساسـا...
أنحنا بالعلم القرينا حتما نعيد أناســــــــــا...
وأنحنا فى كل البلاد ديما بنرفع راســـــــــا...

الهمباتي الأغبش
============
العركية بانو الليلة صاهلة خيولن
سوايين نضم اصلو المعتق هولن
يبروك بي الكرم حرم يمين لاحولن
اصحاب الفراسة الما انخلق كاتولن

Hafiz Alamin
==========
حباب اولاد رجالا" نارهم يوم ماماتت
اهل اب حراز ابان كلمة" ظاطت
بى دارهم عوجه تب ماباتت
اهل تكيه وصوانيا" تتخابت

Mohammed AL-arky
===============
بنتم فبنا الاغبش الهمباتــــــــــى
كلماتك تهز قلبى وبيها بهاتـــــــى
يوم زادن على حافظ لزمتا سكاتى
ما بقدر ارد , أصلا فقير انا زاتـــى

أبوبكرالجنيد يونس
============
دي المحريةفيكم ضد وجعناالعاتي
دي المحريةفيكم كان يقوم بعاتي
أخوان البنات فرج البخب وبهاتي
مجموعة"مستفةروعةياالهمباتي

الهمباتي الأغبش
=============
حباب ود الجنيد الفي خلاهو بتاتي
النم الموهط في دناك يوماتي
سو انت الغنا بتلقي تب نماتي
اعرض وانبسط لمان تطير حجباتي

Hafiz Alamin
===========
حباب ود الجنيد اسد المحاصه العاتى
تمساح حجرتنا الهازز بيك ضرعاتى
ابشر يالخزين الداخرك لى حوباتى
مرحب حبابك وانشالله تزور يوماتى

بوبكرالجنيد يونس
============
يا حافظ الأمين مرحب حبابك آتي
ترحابك بسطني وزال فحيح وجعاتي
والباسطني تب ومقوي نم أبياتي
في الفيس بوك لقيت ناس في غناهم ذاتي

الهمباتي الأغبش
============
حافظ ياهو راسنا ولي سند وعكاتي
ساعة الروح تضيق ضل الهجير الاتي
وعن نضم الكلام بنظم درر تحاتي
لما القاه جد براهو بي عصباتي

Hafiz Alamin
===========
حبابكم عزى وتمامة كيفى
دثار شتاى نسمة هبايب صيفــى
اخوان بنات بطرى وسند تعريــفى
قولو اعمرو النمه خلو اليزيد تاليفى

أبوبكرالجنيد يونس
============
وياالسراج سراج نورانت في الفيس بوك
متفسبك كأنوالإخترعلوأبوك
حلاةنضمك مجيه زي دهب مسبوك
بدورنتعرف اكترونبقى كف مشبوك

الهمباتي الأغبش
=============
السراج حقيقة اتربي جوة نشاط
في النيلين هناك غناهو ماهو مشاط
بجيد الغنا فوق امات رشوم ووهاط
وفوق النمة ليل مابقرعو الوطواط

Hafiz Alamin
============
السراج سراج نمتنا ونورها الوهاج
اسد عركة اليوم اب دموم وعجاج
تمامة كيفنا ال لى زهجنا عـــلاج
الاصيل بحر الكرم اب هدير وامواج

الأميرلاي السراج
==========
تسلم يا الجنيد إنشاء الله دائماً عالي
نفخربك يمين فوق العجاجا يوالــــــي
سيد رأياً سديد للخوة تب ما ســـالي
تسلم يا تلب نجمك بريقــــــــو يلالي