مجادعات النمة55

الأميرلاي السراج
=============
أحامدة مأصلين من قمنا سيدنا المولي
ترباية الرجال الما بعملو العمــــــــــــلة
ستارين عروض ما فينا زولاً خمـــــــلة
ما حايزين دهب هيلنا المكارم جملة

الهمباتي الأغبش
============
هيلكم من زمان السمتة زايدة فراسة
والعركة ام لهيب اللي الخصوم دراسة
الهيلكم حقيقة وتبقو جت من ناسة
حفاظين عروض داقين كرم من ساسة

الأميرلاي السراج الهمباتي أخوي :
================
الشايف الدبيب بي عينو ما بيطاهو
والحبل الرهيف العقـــــــــــــدة ما بتحجاهــــو
شن فايدة عشق لا حقــــــــــــو لا بلقاهــــو
كان ماساي شلاقة أنا عشقي شن معناهو

الهمباتي الأغبش
============
الشايف العوج مايبرا دربو الجاهو
والبال الغويس الديمة في جهجاهو
الزول السدر حتي البلد هجاهو
الريد في القلوب الا العقل وجاهو

Midoo Khidir
=============
الهمبتااااااااااااااتي هوي ياود عزاز القوم
غير النمة والشاشاي غلبني احوم
منتظراك في الصفحة عصاية دوم
حلفت الليلة ماالقاك تب ما انوم

Midoo Khidir
==========
سأل حافظ عليك قت ليه شفقانة برضي
شايلة ليك كلام حازمني طولي وعرضي
سؤال عليك ياهمباتي شعوري الفرضي
قلت للنمة بكتبه اكان ترضي او ماترضي

Hafiz Alamin
=========
طال غيابك ياالتلب اللزوم للشيل
فارس محاصة النمه وضوها القنديل
ماتشوف الــشر ياالـفارس العنتيل
بى وراك حزينه النمه ويتيمه عديل

Hafiz Alamin
=============
الهمباتى اخوى راجين طلتك وافراحا
طولنا منك عساك سليم فوق راحه
شفقتنا يالتلب ملك عموم الساحه
ياك ساسنا وتاج راسنا بكل صراحه

الهمباتي الأغبش
===========
تسأل منكم العافية ورقاد الضل
من ماجيت هنا اصبحتو لي اهل
مغمور بي الوداد تالايا ما بنحل
ريدكم في القليب تحكيهو ديمة مقل

Midoo Khidir
==========
غيابك انت يالهمباتي قلق العامة
فقدناك يالعزير مقضي الامور الهامة
النمة بوراك مافيها شيتا تامة
غيبة مننا زي لديغت السامة

الهمباتي الأغبش
============
بعاد النمة احر من السموم كان جات
وفقد الناس ينوسر في العضام نحات
اتبرمجتو في جواي وانشريتو فيا صلات
ودادكم دين وما بوفيهو بي الكلمات

Midoo Khidir
==========
الشئ المهم انك تعيش بين اهلك
طمنا عليك يالراقي طبعك واصلك
مابندور نلومك الا بس من فضلك
ماتغيب مننا شان مافي ابدا متلك

Khalid Alahmady
===============
يامقنع بنات جعل أمات وضيباً كاب
اب نترةً خلاعة عقب رباى اسود الغاب
العاجبنى منك ياالاصلو مابتنعاب
الزول متلك تب يعقبو ان فد يوم غاب