الأحد، 4 أبريل 2010

مجادعات النمة56


الهمباتي الأغبش
===========
ياحافظ البارح بشوف في المنام ظبيان
جن بشيش يتقادلن والجسيم مليان
ضامرات الحشا مرتع قصيب نديان
جف طيف المنام بي مطيرة قم فزعان

Hafiz Alamin
==========
رؤياى يااب ضراع شايفا قدامى عيان
الرشيديه الحاكت غزال مرتع الوديان
فرمت قلبى ضوقــتـو العذاب الوان
فراقا لى عينى سوالن فعايل البنبان

Hafiz Alamin
=========
عينيها فيها حور يرمى العفيف متديّن
وكلاما فيهو عسل يشرقك تقع متبيّن
اكان مابخاف الله وعين الحسود متعيّن
مابفارق ليما السمحه وافوت متحيّن

Msaad Yousif
=========
انا كن جنيت ما تقولو مجنون
مكتول قرام ابوحاجبا مقرون
من قومت الجهل قايم مصيون
احى على الجسم بشبه البالون

Hafiz Alamin
===========
رشيديه فيها عيونا" يسون خلعه
هردت احشاى وفينى طلقت زلعه
اكان ماعين العزول الاريتا بالقلعه
كنتا من جرة العسل بآخد جرعه

الهمباتي الأغبش
==============
الخلق العيون قص الرموش واساها
تنقص القلوب بي سيف عفافا وجاها
لو نضمت تقول كلمات لذيذ معناها
زي عسل النحل اصلو العسل عن فاها

Khalid Alahmady
===========
شتلة قرير السيدا قام دساها
قصيبة تقنت خدار عقب عماها
اكان مالت مالت قلوبنا معاها
زى نور المداين حتى النجوم غتاها

الهمباتي الأغبش
===========
مابسلم يمين ناظر عيونا وفاها
تحصلو المصايب والمحن والعاها
الجيد النضير زايد جمالا وجاها
علي قمر السما بيها الارض تتباها

Msaad Yousif
=========
كتير الودرت موجودهم وجارى وراها
وكتير من فقد وفى الخلاوى يطراها
السبب البخلى البنات بجملة تتباها
نضافة ورشاقة وقادر ربنا السواها

Msaad Yousif
===========
واحد ضارباهو فى الكبدة ودمو يدفق
واحد شرابو بالدربات وحالتو تشفق
واحد زى الميت ابوه قال كان سلم مابرفق
واحد نهت حايتو وفى الفيافى يصفق

الأميرلاي السراج
===========
أنحنا الما بندور العرفة نتباهابا ...
نحنا معانف أبدرق الغرز نشابا ...
نحنا رجالنا فوق درب الرجال تقابة ...
نحنا كرمنا تشهدبو الوحوش في الغابة .

Midoo Khidir
==========
السراج اخوي البعدل الميل
اخلاق البلد اصيل و ود النيل
كان قصدوه للخير تلقى ليه جزيل
كان قصدوه شر قطاع رقابة عديل


محمد الحسن إبنعوف
============
ضقته مع الخرش عسكر دقشته الغابه...
دوشكا وأربجى قرنوف على دبابه...
ضقته الميج ختف يا أبشمه شاقه سحابه...
كم مره الجبل شال من صلابتى صلابه...

Mohammed Elfatih
=============
كيفن أفوت متحين
أفارق السمحة ذات الجمال البين
بريق عينيها فج سحابة نازلة مزين
والمدَّيِنْ ! خايفو يفارق الطريق البين

الهمباتي الأغبش
=============
طولت الغياب ليك كم زمن ماك باين
ظنيتك تجي وصامت تملي تعاين
فاقدنك عديل والنمة فيها كماين
ساوين الوصف ومرات نعبي رتاين

ليست هناك تعليقات: