الأحد، 4 أبريل، 2010

مجادعات النمة57





محاكمة الهمباتي الاغبش
============




مدخل :-
الهمباتي غاب من النمة يوم الخميس والجمعة ما خشا النمة الا يوم السبت
فقام الجماعة سمار النمة ناس الوجعة اتلمو وقالو ينصبو محكمة للهمباتي
ويعرفو سبب غيابو شنو ؟
فتعالو شوفو الحصل شنو في محاكمة الهمباتي الاغبش .



Hafiz Alamin
==========
جانى طلب من ارباب وعظيم السيره
قالو اعضاء النمه باكر يمرقو مسيره
يستنكرو الغيبه ودايرين شرح تفسيره
وانا اعلنتا تاييدى وجاهز جواز تاشيره

Midoo Khidir
===========
فوق هذى المسيرة نهتف ندور عمدتنا
نشكي ليك فراقو الليلة يانمتنا
همباتي العزير في النمة رب اسرتنا
من غير وبتكون مسخانة جد جلستنا

الهمباتي الأغبش
=============
من دون الشجب وادانة جيت تالاكم
مجبور يا العزاز الخترة تمشي بلاكم
متيمن عديل مشتاق اشوف نماتكم
اطرب وانبسط وعقبا اكون بحداكم

الهمباتي الأغبش
==============
الزول البعاد بي ايدو مابسويهو
بتجبرو الظروف دون رغبة بتوديهو
لو يبقي المراد العترة مابتجيهو
تبقي النمة بيت نتكاور جميعا فيهو

Msaad Yousif
=============
الكلام دا تب فى راسى مامفهوم
قدمناهو الطلب لى محكمة المظلوم
قضيتك سببها بت العزاز حميتها النوم
الرد باكر بجيك معلون فى الورق مختوم

Msaad Yousif
===========
قضيتك عمت جميع اهل النمة والشاشاي
اتلمينا واتفقنا وبي سبب قيابك عقدنا الراي
شاطرونى كل ناس النمة وحالفين يقيفو معاى
نحاكم ونصل معاك الاستئناف وتانى عندناراى

الهمباتي الأغبش
============
فراق النمة يا الغالين ماااا بي الايد
وردتا فيني تالاكم شعاعا بزيد
السبب البخلي اللوم علي شديد
ظروف الدنيا خاتاهو البعا في الايد

Msaad Yousif
===========
مسيرتنا بقت محكمة وقضايا
ليه تقيب من النمة وشاشايا
امرك بقي قريب والاعتزار ماكفايا
عاوزين الحكم يمشي للنهايا

Msaad Yousif
===========
كيف تقيب ونحنا ليك مشتاقين
امرنا شرعى ومنو ما متنازلين
بمحكمة النمة ناخد حقنا وليك شاكرين
تفرح بيت حيدر ونحنا ليك عازين

الهمباتي الأغبش
===========
ياعم تنقو هوي اسرع تعال قدامي
ناس النمة حالفين ينفشو حمامي
محكوم في قضية والغياب لوامي
بترجاك تكوني في جنبي انت محامي

الهمباتي الأغبش
=============
ياعم تنقو هوي اسرع تعال قدامي
ناس النمة حالفين ينفشو حمامي
محكوم في قضية والغياب لوامي
بترجاك تكوني في جنبي انت محامي

Hafiz Alamin
===========
انا مصر على الموقف وطالب التأييد
وغياب الاضينه بزعل خليك من الصنديد
انا بسال وطالب جميع من يقرأ لي يفيد
شن فايدتو بس الكعـك البعقــب العيد

الهمباتي الأغبش
==============
الليلة الغياب ختاني في التخشيبة
مكلبش من ايدي في النمة جوة زريبة
فوق الباب مساعد قاضي ايدو عصيبة
وحافظ فوق قفاي والزنقة زنقة عجيبة

الهمباتي الأغبش
===========
قبلان القفص ادخلو غصبا عني
وغبت عشان ظروف جابورة مامتمني
الحكم الهناك داير يطير جني
يا السراج تعال وجيب البعيد والبدني

Msaad Yousif
==========
حافظ اخوى شايف الركب ليك وصل
معاهم كبارات البلد وانا ليكم بصل
نسمع رايهم ونخبرهم بالحصل
نسرد ليهم القصة كاملة بالاصل

Hafiz Alamin
==========
يا الكلس حكايتك مره عجيبه
تغيب بدون اسباب فاكر الحكايا زريبه
عقدنا المجلس امورك يعيد ترتيبا
تنتظم جلساتو يصيغ العقوبه يجيبا

Hafiz Alamin
=============
بنادى مجلس الشوره الهرع وود امين
يدلو بى رايهم الكّمل العاقلين
نعرف اصل القصه بدات من وين
ماتبقى فوضى تتحسم فى الحين

Msaad Yousif
==========
حافظ اصلك ما بتقول كلاما شين
وناسك المعاك كلهم عارفين
بحسموا الموضوع فى ساعتين
ياخد جزاهو ويكون عبرة للقائبين

Midoo Khidir
==========
النمة بتقول القو المسيرة خلاص
مادام ظهر اللليلة سيد الناس
قدم اعتزار ود الاصول العاز
نحن قبلنا منو وشيلنا فوق الراس

الهمباتي الأغبش
==========
بي ساعات غياب في النم بقيت الجاني
ماعارفين بعادي في جوفي ضمة ازاني
ياخالد تعال قبل الخميس الفاني
مايصدرو فيني حكما وفي الحبس تلقاني

Msaad Yousif
==========
الخبر الجانى قالو تنقو باقى محامى
قالو يتأجل نطق الحكم لى اليوم الفلانى
سألت القاضي قال الحكم صدر قدامى
انا حلف ما اخليها لو يعيدو الحكم تانى

الهمباتي الأغبش
==============
سمح سجن العزيز فوق العزيزة النمة
ريدك يا الملاك جوة القليب انتمة
مادام الغياب دخلني جوة ضلمة
بحمل لي العذاب وابعد من غيابك ضمة

الهمباتي الأغبش
============
غصبا عني غبت وجيت مولع شوق
مشتاق لي الطرب في النمة دمي يروق
لو يبقي الحكم في زول ضني المعشوق
قبلان بي القصاص شان من غيابي افوق

Msaad Yousif
===========
يا حافظ اخوى شايف ناس من القضية اتنحو
كيف تقبلى الاعتزار منو قبل النايمين يصحو
كان تخليه فى الحكم ياخد نصيبو والغلط يتلحفبو
مادام بقيب بدون سبب ويزعل الفرحو

Khalid Alahmady
===============
هوى ياناس أنا محامى التلب اخو الجار وضيبة
بقدم دفوعاتى وبختما حتى ان قتو عواسة بلا قرقريبة
الهمباتى الهميم فوق النمة حاشاهو الغلت والريبة
علا العزر ظاهر مسكين اللزوم كترن طلبات النسيبة...

عمك تنقو
========
صدر الحكم يا صاحبي كمان قدامي
ختوك في القفص وحجروك فيه الزامي
اللغبش برئ يالقاضي ماهو حرامي
زولي وبعرفه وببقى ليه محامي

Msaad Yousif
الزول البريدك منك قبلو تب الاعتزار
قالت القوها القضية مادام جاكم بى اصرار
نحنا حالفين نرفع الدعوه فوق لو يصدرقرار
من الفيها تب ما متنازلين وباكر بتسمعو الاخبار

الهمباتي الأغبش
============
محامين الدفاع الليلة بان مكتوبن
عمك تنقو راسم خالد هناك بي فوقن
وناسا تحت تحت باقي الكلام واسوقن
هاناس الغياب والله صف عروقن

الهمباتي الأغبش
============
في قفص الاتهام ختوني تب بي القوة
ياعم تنقو قول للقاضي يا ابو مروة
الزول تب مظيليم في النمة قاصد خوة
ماغاب شان بعاد في النمة قاعد جوة

Khalid Alahmady
=============
ياالقضوة ناس مساعد وحافظ اب كلمةً مسموعة
حاشاكم قصار حقيتو النضم فوق قصةً مرفوعة
علا الزول كب الجراسة والخوة مافيها دفوعة
قال الحكاية ومافيها وجاكم شايل الراية تب مرفوعة

Khalid Alahmady
==============

قصراً للكلام فى شان مانعيد ترديدو
الزول متعزر قال تانى السوا تب مابعيدو
دحين خاتر النمة أكبر من جمعة لمّ فيها نديدو
وانا شايف الحكم فى النمة يكون تأبيدو

Midoo Khidir
============
الهمابتي اخوي حكايتو الليلة حكاية
خلي الناس تجوط في الجمر قلاية
انا مسامحاه وانتو الليلة اخطو خطايا
اكيد حكماهو ظروف ياناس اعززو معايا

Msaad Yousif
==========
الحق يا حافظ اخوى زولك بقى فى تولا
تنقو المحامى عرف الامر مافى محاولا
قنع خلاص منها القضية الامرها لاحولا
خالد طالب الصلح ونسي قضيتهم الجولا

Hafiz Alamin
===========
كلامكم فوق الراس من فوق
بس القضيه اكبر من يشيلا الزوق
واخطر من مجرد غياب كان ملحوق
كبيرنا ولا زم يبقى غدوه للمسبوق

Hafiz Alamin
===========
قصر الكلام يجيبوهو اهل الشورى
وما بنقول كلمه باكر تعود متروره
الهرع وود امين فى ملعبهم الكوره
يفتو ويحكمو ورنرجى للمنظوره

Msaad Yousif
============
يا بت جمل الشيل البكرم الضيفان
ليه تعفي حقك للزول انبقى غلطان
من قبيل بسمع فيك ماتقولى سرحان
منك تب ماراضي واحافظ هناك زعلان

Hafiz Alamin
==========
الجانى معترف شن معنى المحامى وجيتو
اعتراف ودلايل ومتهم واضحه جنيتو
كبيرنا ولازم يبقى غدوه لينا رعيتو
اردع ياقاضى ماترتى وتعجبك نيتو

Khalid Alahmady
=============
حافظ ومساعد كبارنا حاشاكم مابتنزمو
والهرع وعثمان شغلاهم ظروف يبقى الدور يتمو
شن الفايدة من الحرسة وزولنا حلف بى دمو
طالبين الشطب وغتغيت الحصل بنتمو

الهمباتي الأغبش
===========
مختوت في الحجز وانا اصلو جبتو براي
بي حبة غياب بي القوة مابي الراي
راضيبو الحبس بس عاينو قبلو جاي
جيبو لي عشا ويكون معاهو غتاي

Hafiz Alamin
==========
=يالاحمدى الحصل صعب يتغتا
والزول كبيرنا وبيهو نسستتر نتغتا
لو من صغير كان ممكن الامر يتغتا
ماشفنــا الكرت بعد الفتوح بيتغتا

Msaad Yousif
=============
كلامك تب ما بنفوتو ولابنتعداهو
خليم ينظرو فى القضية كان ظلمناهو
نحترم رايهم البقولوا اصلو مابنتختراهو
بس الزول يقبل بالتجى قاصداهو

Khalid Alahmady
=============
والله ياودأعمى امرك صعب واتعسر
والقاضى حالف كلامو مايتكسر
وقالى ياالمحامى علينا ماتتجسر
واكان للعشا بجيبلك كوجة فى قدح دبكر

Hafiz Alamin
==========
المحكمه ياسيف الله لسه دى مناظر
وقضيتنا اكبر من تحلها حكومات ومنابر
متهمنا اســد النمــه اب قلبـــا" جاسر
ماهو اضينه عشان نقبل الصلح ونخاتر

Midoo Khidir
===========
ياملانا قاضي المحكمة الشرعية
اعفيه العزيز همباتي صافي النية
امكن غاب غصب او لامور صحية
عاتبناه صوح بس فرحتنا الجية

الهمباتي الأغبش
============
عشان النمة رقاد البلاط بحلالي
وفي بطن السجن النم بسوي يلالي
ياحافظ اخوي لوكان تقيف تسغالي
صاقرني الظرف حكم علي اشغالي

Midoo Khidir
===========
ان كان للغياب ظهر همياتي دحين
عندنا زول عزيز ماشفنا ليه يومين
نسألو برضو عنو سايقنا الحنين
وينك يالاصيل عثمان ود امين

Khalid Alahmady
===============
أسد النمة وقلبها الفى خلاهو مناتر
دود الدميرة العرش وجاكم دافر
حاقب نماً كتير يطربنا بيهو نفاخر
كيف تحاكمو الارباب حتى ان قلب كافر؟؟؟

الهمباتي الأغبش
============
بشوف الهرع في الجات اظن نادوهو
ولي الخبر القبيل بسراع عديل فتوهو
طار طش الشمار كل الخلوق سمعوهو
قالو الزول رقد في النمة ديك حبسوهو

Midoo Khidir
===========
القاضي القبيل صرح كلامو وقال
غير حبس العزيز مافي اي مجال
ناقشناهو حاورناه حريم ورجال
قلانالو بنفدي الغالي كان بالنمة او بالمال

Msaad Yousif
===========
خبرك انتشر فى البنادر وبادية العربان
قالو السبب كلو فراقك للنمة والحبان
اصبر فى سجنك وخلية ليك مكان
جدع نمك خلى المساجين كل واحد طربان

Khalid Alahmady
===========
يالهرع شيخنا جيناك عديل فى ملمة
ياتراس السيول أبقالنا أمل الأمة
اتلوم اسد وجمّع بعيد فات النمة
كيف ياحكيم نحاكم البحاكم فى الفراق واللمة

Abdallah Alhraa
===========
الصح في المثل قالو البلومك دارك
والمابحمل غيابك مره هو العزالـــك
يا الهنباتي اخوي لللوم اقيف ادارك
وكتر طلتك باهيه البتستــــــر حالك

Msaad Yousif
=========
ياالهرع الزول اتلوم لوما شين
فارق النمة بدون اذن ليه يومين
قاطع الحركة تب ونحنا ليه فاقدين
ماقصدنا ناحكموا بس ليه مشتاقين

Msaad Yousif
=========
اتعودنا علية ودوام ليه سامعين
كيف يفوت النمة ونحنا ماعرفين
نحاكموا مادايرين غرامة ولاقرشين
عشان نعرف مقدارنا عندو لاوين

Abdallah Alhraa
============
ودالاحمدي وحافظ وتنقو وميدو
وديوسف كفاكم قول خلاص لاتزيدو
الزول كان عتر فد مره فكه حديـــدو
كوسولو العذر عقبان بكربو شديـدو
... مشاهدة المزيد


***
الهمباتي باز النم وكفات صيـــــدو
مو من ساهله يجفانا ويغبو بريــدو
ارواحنا الدوام وارده الدميره رهيدو
ساقيها الدرر عودنا بي تجديــــــدو



***
الهرع الغياب ياهو البقالكم سيــدو
جاييكم ضمين ليهو وتحلحلو قيــدو
في بدالو الحكم لو كان وجب تأبيدو
راضيهو ولزوم حتى ان بيأخد جيـدو

عمك تنقو
=======
الزول غلط وضاق كمان الزرة
من ناسانا عزاز داروه تب بالمرة
ساقوه الحكم كلمات صريحة وحرة
لا ترجع لفعلتك او تعيد الكرة

Hafiz Alamin
=========
الزول ياتنقو ماهو زولا" ساهل
دا بحر المحيط عدمان القيوف والساحل
غدوتنا وزعيم نمتنا حلال كرب ومسائل
لا بنسامح فى غيبتو لا بنغفر لا بنجاملل

الهمباتي الأغبش
===========
بعد هادا النضم ختيتو فيني احساس
بي ودادكم يمين تاج يشيلو الراس
عارض بي حلف النم يكون مقياس
ومابوفيهو قول قط في عزاز الناس

عمك تنقو
========
معروف ود الغبش ده راجل حربي
شيال التقيلة وعليها اكيد متربي
ده الخلاني يوت زايد فيه حبي
العذر معاه شاغله القفيص الذهبي

Midoo Khidir
========
ياخلاي خلاص هذا الحديث اغفلوه
العندو العزر بغيابو لاتلوموهو
اسأل عنو لالزم مالو بس شوفوهو
ان قال العزر بالله ماتعابوهو

Abdallah Alhraa
===========الهمباتي باز النم وكفات صيـــــدو
مو من ساهله يجفانا ويغبو بريــدو
ارواحنا الدوام وارده الدميره رهيدو
ساقيها الدرر عودنا بي تجديـــــدو

Abdallah Alhraa
==========
الهرع الغياب ياهو البقالكم سيــدو
جاييكم ضمين ليهو وتحلحلو قيــدو
في بدالو الحكم لو كان وجب تأبيدو
راضيهو ولزوم حتى ان بيأخد جيـدو

Hafiz Alamin
==========
فداك ياالهرع غفرنا الزله
كرمالك وعشان عين نكرم حله
الهمباتى حضور يوماتى فينا وطله
واى ساعه غياب نرجع نعيد الكره

الهمباتي الأغبش
============
ليك علي من النمة ماني بفز
فاديني الاسد اللي الفقر بيجز
الهرع التلب قدلة ومهابة وعز
نتكاور جميع مين العلينا يلز

الهمباتي الأغبش
============
من دغشا مبدر لامن عصيرا يليل
اتوسد غنا في النمة ديمة اقيل
بس اوعو الغياب كرباجي تب متحيل
نجدع في الغزل وعقبا فراسة نميل

Hafiz Alamin
============
ابشر بالنم ياالفارس العنتيل
سوا معاك نجادع من النهار لليل
ان درتا الغزل نوصف حسان الريل
وفى الشجاعه اسود نترس السيل

Msaad Yousif
============
الهرع اخوى مدام جيتا مابترجع مضيوم
حرم نعافاهو ان بقي كاتل خيار القوم
جيتكم اتشرفنابا وامركم خلاص محسوم
بشطب قضيتوا حتى كان بالاعدام محكوم

Hafiz Alamin
============
كرام اولاد الاصول حق فوق الرقاب
طالبنا الهرع نصفح ونقفل الباب
مع انو حار بالحيل غــيبة الاربـاب
ختيناها الشروط ووضحنا للاسباب

‏ليست هناك تعليقات: