مجادعات النمة61

بشرى ابراهيم
==========
من شرق الوطن واخفس غرب لابارا
ياتو الغيرو عرقو نضيف وقاشطو حرارا
وحات اسم الله كان اصلو الرجالة جسارا
ماتعقبك شبر لا نفخت الصفارا

Nada AbdalMonem Hassan Madani
=======================
حبابك الف دخري الحوبه دخري عشانا
اتعشمنا فيك وعشمنا ما غشانا
اياك راجل التقيلا البتقود فرسانا
اسد للقبائل حارس عروض وليانا

الهمباتي الأغبش
=============
صياد الغرام من وزين مع حوبارا
ما ناشا الغزالة الفي البيوت تتضارا
نشابا الطعن في قلبي زي سنارا
رشراش الخريف اليوت مندي خدارا

Hafiz Alamin
===========
فى الصاله جات تقدل تسوى الوحّه
اترافقنا من القاهره للاماره السمحه
كايس وراها عشمى بس فى لمحه
منعها منى الخجل والرقيب والطرحه

بشرى ابراهيم
==========
عندك قاهر الجن والانس غبيوها
هيبت عنتر الكل العرب هابوها
إن سلطت علي اعمار البشر ولوها
ترد الروح بعد ملاكها مايشيلوها

الهمباتي الأغبش
==========
الخلق الملتقة قط حرام يصلوها
الزيف والوهم في الدنيا مابغروها
الجيد النضير والحكمة بسمة فوها
تغلغل في الحشا توجع محل ختوها

عمك تنقو
==========
بشري اخوي ورينا العب وشن لونك
كب النم مطر فرغ عديل جالونك
الناس الهناك في النمة عرفو فنونك
حالفين القسم مايكتبو تب من دونك

Hafiz Alamin
=========
لادنه وفيها هيبة الفراس
اصيله ماها زى الناس
حنينه وفيها شده وبأس
كريمه ومنى مانعه الكاس

الأميرلاي السراج
==========
ركاب الضهور العالية والتالاها
غلاب الرجال الساكتة واللباهـــــــة
كشاف الكرب والحارة بتلافاهــــــــا
ما قالو الفراسة بدون أكون معناها

الهمباتي الأغبش
=========
نتال اللجام دون جكة اتخاتاها
الزول الوهط في نضمو اضحي دلاها
الباري الحيط مابيطولو سماها
لو بسمت برق تالا الخلوق ضواها

Hafiz Alamin
============
متين ياقلبى تشوف ام وجيها" واحه
تبـكى وتنتـحب حـزنان وفـاقد الـراحه
السبب الميبس روحى عادم عليهاافراحا
كـل مانـقـول قريب يبعد طناش ومساحه

بشرى ابراهيم
==========
الوقفت قصادي ولي غزت كوعها
ضامرة مدعجة فوق السماح مفدوعة
خلت طرحتها لا واقعة لا مرفوعة
هي الشجرة المجيه والبقية فروعها

Hafiz Alamin
===========
مضمورة الحشا العند الصدر مرفوعه
البريبه طلقت فينى نيران الغرام مولوعه
اكان مابخاف القالو والحكايه تزيع مسموعه
كنتا بشق لى هدمى وارثى روحى المفجوعه

الهمباتي الأغبش
============
الجاهلة المقنطرة ومن تحت مربوعة
وشها ضاوي تقول من القمر مقلوعة
كل الحالي مزروع في سواقي ربوعا
طفح ريدي عايم راجي امتي رجوعا

Hafiz Alamin
==========
القمريه الفوق غصونا سجوعه
هاجرانى ليه ياقلبى وعلى ممنوعه
اكان ما خايف الحكايه تفوح مزيوعه
كنتا ببيت قريب من دارا احضرو طلوعا

عمك تنقو
=========
دي الفريده في عصرها وفريده في نوعه
حازت على الجمال قبال تتم اسبوعه
دي بي سمح الخصال دخلت في الموسوعة
درتها لي شريكـة وبالسنـة المشروعة

Hafiz Alamin
============
=جات تقدل عصر تاله اليمين مفدوعه
الخلانى صريفا وروحى باكيه هلوعا
متبــورة القدم المضـمره ومربوعه
مبطره و كاسيها الــدهب لا كـوعا

Abdallah Alhraa
===========
الوقفت بعيد واقله التقول مفزوعــا
مي دارياها نار جوفي الكمل والوعــــها
ختت ايدها فوق صفحتا فردت كوعـــــها
دي الملكه المبطره والجميع في طوعها