مجادعات النمة60

بشرى ابراهيم
=============
سلام عربا تحت بيت الشعر منلمة
بدور اصبح ربيعكم والمزاج ينتمة
الولد البدور جبنة ومجالس شمة
يخلف ساقو في حوري ويجر النمة

Khalid Alahmady
===========
حباب مرحب حباب شاعر وفوق فى القمة
فرحانين عربنا طرابا بى جيتك مرادم تم
جبنةً كاربة نسقيك وتتنى البكرى تنجم
وجر النمة فوق نمتنا تلقى الجميع مهتمة

الهمباتي الأغبش
===========
حباب البشري فوق النمة بين اخوانو
حباب سيد الكلام الما بضل عنوانو
نتشرف كتير وميلادو يبقي امانو
جميع النمة تكرف من عبير ريحانو

عمك تنقو
==========
النم والشاشاي الليلة فيه بشارة
ابشر بالبشرى شاعرنا دليل وإشارة
مرحب بيك ثلاث ورباع و أعشارة
باسمين في وجيهك بدون كشارة

بشرى ابراهيم
==========
مشكورين حبابكم وانتو اهل العز
فرسان عركة اليوم السلاحو برز
داير لي صديقا بيه افخر اهز
احضن نمو زي حضن البرق للوز

عمك تنقو
========
وصلت البكان يا بشرى ارح لز
لزلنا الشعر ضوقنا من اللذ
اطربنا بحديثك خلينا فوقه نهز
احلب بي قليمك معانا وجـز

Msaad Yousif
============
وصلت مكانك يالبشرى ود العز
معاك فرسان فى الكتال ما بتفز
بصون العرض وبيك نفتخر ونهز
بنصادقك فى الله يالساقى الرجال بالنز

بشرى ابراهيم
==========
قول لام ريد نفوسنا عليك تعتا مرضتة
لابداويها شاشاي لا الغنا بيسعتة
عندها اربعة حزوز جملن خلقتة
واحد من وسط وتلاتة في رقبتة

Midoo Khidir
===========
يالبشرى اخوي نضمك كتير سراني
شفتك في احتفال بزيك السوداني
كت دايرة اعرفك وامرك كتير هماني
معجبة بيك كتير حسباك متل اخواني

بشرى ابراهيم
============
لي شرفا عظيم يابت ملوك العز
بت الصدرو باقي محيط وسيفو يجز
شكلك بت رجال وانا بيك ديمة بهز
اخاويك خوة البحر اب قيوف للوز

Midoo Khidir
===========
ماها غريبة فيك وياها دي المحرية
وان حسبو الرجال ات بعدوك مية
مشهور بالكرم واخلاقك الدقرية
كل الجاك محتاج ليك امورو تب مقضية

بشرى ابراهيم
===========
اشعارك رماحن في القلب شكاكا
غالب شعري سبعة اقوان وجهجه باكا
بنيتا حيرة فكري ووقع في شباكا
تتمايس متلشتلت جناين التاكا

Midoo Khidir
===========
شعرك من زمان غالبني ماها جديدة
من امس العصير فرحانة بيك سعيدة
شعري انا وين قصاد كلماتك الصنديدة
الدوبيت وشعر النمة معروف سيدة

بشرى ابراهيم
============
مما جاني كولك وحسك المتندي
ماخد الليل وحيح ايدي اليمين فوق خدي
اسأل ربي ها المرض الملكني يعدي
خايف امرق شعورا وانتي بيه ماترضي

Midoo Khidir
===========
من قمت الصباح مشغولة باشغالي
فجأت سمعت صوت ولقيتو من جوالي
قت يمكن صحيبة تسألني عن احوالي
الا لقيت رسالتك وسرتني جد يالغالي

الهمباتي الأغبش
=============
اصلو البشري معروف من قبل مايجينا
في النم الاصيل جدول سرور وادينا
في الادب العتيق حلة حرير بكسينا
موروثات قيم عفة واصل بغنينا

Msaad Yousif
==========
الليلة البلد عامرة بتمساح اللجة
ادونى الاذن فى المنة اخد فجة
الشكر فيه قليل ضباح ام قجة
بشرى ودابراهيم الفضلو مابتعدة

Mohammed AL-arky
===============
ريحه شعركم طقت وعبيركم فـــــــاح
كت بحسب زمان أنو زمانكـــــــم راح
أقرا فى شعركم وأمشى وانوم مرتاح
فعلا يا شباب فعلا كلامكم صـــــــــاح

الهمباتي الأغبش
============
القمري الصباح تقل غصينو وفاح
تاور في العصب عمق عليا جراح
السبب البخلي الليل اشيلو نواح
الجدي النفر من عيني ولي وراح

Hafiz Alamin
============
الهمباتى للنمه شايل المفتاح
ينم ينطرب ليلو يلاقى صبــاح
وعندنا ميدو كاس وزنها الرجاح
وكل النمه ملوك شعر و فصاح

Mohammed AL-arky
================
بحيكم شباب النمه والشاشـــــــاى
وازنين الكلام أشاعر وحكمـــــه راى
ماهو لغو حديث ماهو الكلام الساى
ليهو طعم عنب تفاح والبــــابــــــــاى