مجادعات النمة65

بشرى ابراهيم
===========
تواريب ليمنا كل خريف بتبطل كافيه
متين يصدف مسورنا وتفتكرنا الجافية
نتلقاها بلهفة قلوبا وافية
رجلا راكبة في نعالين ورجلا حافية

الهمباتي الأغبش
===========
من لاقيتا تب اديتا نيتا صافية
بي ادب الحديت سويت كلمتا دافية
ساوي النظرة علا لقيتا تب ماكافية
من رشش عيونى ادت قليبي العافية

بشرى ابراهيم
==========
اه بل اه ونص لو غيرو لي مساري
من ال عجرم ابقى وبفريقكم اباري
ليه ماتبقى بت عمي ويجلسو كباري
تغطي قدحنا يانانسي واسيك يساري

Osman Amin
===========
بشري حاشاك ها الرهوالصيد تجيبو حُباري
السيل زول هجيمه كيفن تترسو مجاري
الفين في الجزيمه والنُص نسيهو كباري
ناس عجرم خبوب وزولتي ام خديدن ناري..

Hafiz Alamin
==========
ياشيخ العرب قبالك كتار تتجارى
البنيه خاتفا عقوله وسالبه افكارا
اكان ماخوفة الشينه المنها بتضارا
كنتا جاهرتا بالريده وكشفتا استارا

Osman Amin
=========
هت كيفن اسد ام جقول للفطيسه يباري
ام عرضن سمبهار للشاري والمو شاري
غنجن فوق رخص وهفهافا ضاربو الساري
آآكان متعشي قول يمكن نحسبك حاري

الهمباتي الأغبش
===========
بشوف شيخ العرب علي البياض جراري
يوم شاف المدفق عام هناك سداري
جت كشح الغرام فوق ام صديرا عاري
قولب في النضم عطشان ولسة مراري

عمك تنقو
=========
اخاصمك اه يا الشاغلة افكاري
اسيبك ليه وانتي كنتي خياري
دخلتي حياتي تكنو اجباري
آه يالعازة يا كاتمة اسراري

الهمباتي الأغبش
============
بشوف كل زول لي ليلاهو اصبح اغني
عثمان ود امين ليها ام خدود متمني
وتنقو العازة ليها فوق الجمر مستني
وانا الراجيهو ابريل في الحال يطير جني

Abdallah Alhraa
============
الشقراء ام ضمير ومفدعه وضحاكه
زي البشرى راقدين الخلوق تتباكى
اه واهين ونص من مقلتها الفتاكه
لا عم لاقدح لا فــركه لا مفراكــه