مجادعات النمة66

Khalid Alahmady
============
الخبر الأكيد قالو الكبار لاموهو
اللوم مو خاتيهوواكان خبرو البيهو كان عزروهو
ساجى ولاجى من تصبح زى بهم طلقوهو
أكان يقدر يلم يلحق ناس همباتى ديك صبقوهو

الهمباتي الأغبش
=============
الاتبراوي اللدر الليلة تبا غشانا
اظن اللوم وصل قام نط طفر جانا
اتنر يالمربعن في النمة سوي غنانا
بي جيتك يمين نملا الافق جبخانا

Khalid Alahmady
============
اللوم حاصل ياخوى خلها ساى بالنية
من تصبح فى المعايش يامن تمسى عشية
البوكسى القنت وقال يازول رفقاً بيا
ياهمباتى اخوك زول سوق ماهو زول ماهية

Ahmed Suliman Ahmed
=================
كم كربت من الصبح للغيبا
وكم شقيت فيافى وكتلتا دبيبا
اموال الرجال شين من بقت بنجيبا
كربت ياجمل فى ريرا لينا حبيبا

الهمباتي الأغبش
============
شديت القشاط تالا السرج ولبيبا
لبدة وبردعة ومخلاة تمر بنجيبا
الروح كان صفت تالاها تلقي نصيبا
مابفيد المنام لي مقلة صابة نحيبا

الهمباتي الأغبش
===========
حباب احمد حبابك انت ود سليمان
العشمان بجيك يا قبلة الضيفان
النمة الحداك فيها النضم طربان
نجدع وننبسط عقبا نصير حبان

Hafiz Alamin
==========
حباب مكا" يزيد النمه فال ومهابه
حباب اربابا" بوجودو نحنا طرابه
حباب ركازة الفريق اسد الغابه
حبابك تانى بالآلاف وزايده حبابا

Khalid Alahmady
==============
كم شديت البشارى القربتو عجيبة
شقيت الضهيرة دامر بقت لى قريبة
الدود النتر سايق العوق قاجى خبيبة
ماببنجم علا حداك يالمهرة السمح جقليبة

Khalid Alahmady
===============
ودسلمان ظهر الليلة فى وادينا
نمّ وبسطنا وطربنا زادو علينا
خلى النمة تقدل فى البحر وزينة
انت ارباب عديل ابقى مننا فينا.

أبوبكرالجنيد يونس
============
سمح القول بجيدالبشرى رصوونمو
والهمباتي غناي البهنيك ضمو
والسراج تكيةالبالقصيد بنجمو
أبشرآالجنيد في النم شيوخك تمو

الهمباتي الأغبش
============
ترا ود الجنيد الليلة اكرم لينا
بي نمو الرصين غتا لي عينينا
ماتطول غياب ما انت اصلا فينا
روح في النمة تب خدرت لي وادينا

عمك تنقو
============
فحول الشعر لا بتعدو لا بتسمو
نظمو القصيد وجادو فنه ورسمو
زي بستان عليل ديما فايح نسمو
زاهر كتب لي تنقو موقع اسمو

الهمباتي الأغبش
===========
مرواد الشعر الفوق بخلف الكية
محيط نثرك درر في العيون محشية
كملت النضم في النم زربت تكية
يغتيك الله ياابوبكر وليك تحية

الهمباتي الأغبش
===========
ود الطيب الزاهر اخو السمحات
عمك تنقو اسمو مصمم الصفحات
كمان بي شيخ فرح شخصية ليها سمات
كتلة من المواهب ابداع ومنتديات

Hafiz Alamin
============
الدوبيت هيلن وارثين كارو
حافظين عهدو راعين دارو
يناطقو الجن يجيبو اخبارو
ينظمو درا" حلاة اشعارو

الأميرلاي السراج
==========
النضم الرصين أياك ساسو وراسو
خبار الكلام وين ينكسر بتواســــو
دليق الحمام عبار حروف الساسو
إت نضم البوادي الما أنجبر حداثو