مجادعات النمة88

بشرى ابراهيم
==============
زرعت هواي في صيا مدمر بيرو
جنيت معلومة للعاشق القدبرو مصيرو
حصاد الحب عرس للماعرف تفسيرو
كعب الزول يتيرب والحصاد لغيرو

Mahmoud Abdoon
============
اخوي العرس اصبح ادارة والبنات بيديرو
لا نضما سمح لا عشقا وراهو يسيرو
دايرين سيد قرش يعرف تمام تبذيرو
وان بقى مغترب مابكوسو تب لي غيرو

أمونه حسن
=========
الاغتراب كان زمان و كتير مرغــــــــوب
الا هسه من مقالبو قالت البنات الـروب
زمنو فات قليل البفتشـــــــــــــلو دروب
و إن وعن البنات ولد عم ولبـــاس الت

الشاعر المخستك
============
أخر الحب عرس بتعب كتير تعسيرو
والزول العشق بعد الحبيب بيضيرو
مابرضي الفراق بحرص يسقي جزيرو
والعامل مفتح بكرة بصبح زيرو

Msaad Yousif
============
زرعت هاوى فى خلايا صعب بعيد ميسو
مالقيت شيتا غير بعد المسافة جنيتو
حاصادى لى همومو بعد ما نسيتو
كعب كان تيربت ونسيت ما سقيتو

الهمباتي الأغبش
===========
مزروع الهوي مالي التقانت كيلو
ومعشوق الغرام كل المراير هيلو
الشوق في الجيوب عاقب نهارو وليلو
والنضم السمح جنب الحبيب ترتيلو

بت العمدة
===========
ان قلت الجمال انا زولي حاوي
في التشبيه مأصل مو دلاوي
وين ماقت لو شي يقوم بي داوي
يسوي رشيش هضاليم الخلاوي

Msaad Yousif
==========
زولك جمالو يفوق على نور الخلاوى
ود مكوك ماصل عديل مامتلاوى
قضاى القرض وللناس بساوى
دفاع للضعاف من عيش التقاوى

Midoo Khidir
============
الزول كان حزن وكتر صياحو
يلقاكم يمين تبرد جراحو
ينسد الزمان جايب رياحو
وعينيه من دموعن استراحو

بت العمدة
============
الزول كان حزن افراحو تب جاياهو
مايشيل الهموم الشين دة مايطراهو
يتريس كتير الدايرو جت بلقاهو
يمد حبل الصبر يتحقق الفي مناهو

Midoo Khidir
===========
مفروض الصبر بيه تب نتحلى
الا الهم كبس حما الغميدة الطلة
والزول كان حزن الشين براهو بنشرة
مابقدر يفكر عقلو جد ينشلة

محمد احمد احمد
=============
البلزم يقينو المولى ببرى جراجو
والبيشاور الأحوان تعم افراحو
نحمد ربنا الظلل عليك بجناحو
بعد ليلا طويل فجرك اطل صباحو

Midoo Khidir
=============
كتير من الحزن مفروض علي نواحو
والزول ان حزن تزيد عليه جراحو
يفرق ليه صديق عارف صراحو
وبعد الحزن اكيد الزول بشوف افراحو

بت العمدة
==========
فيه اصالة زي اهلي وكباري الفاتو
كريم معروف شهامة نال رضى اماتو
غتاي العروض قشقاش دموع اخواتو
بدور الدرعو فوقو ونفضولو بتاتو

محمد احمد احمد
===========
فيهو العفه فيهو الفرسه فيهو الشفنا فى ابواتو
جمبو أخوانو واقفين زى اسود والله ما بتفاتو
معروفين هناك من شبو من ما تاتوا
حارسين البلاد واقفين جبل فى ثباتو

الهمباتي الأغبش
===========
كتر صاقعة سما نسرا كبار جنحاتو
قدل فوق المراح مليانة تب ضرعاتو
وكت طار الصقير فرت هناك حجباتو
معرف في الكرم طابق عقب مسراتو

Midoo Khidir
==========
زولك جد اصيل عجباك كل صفاتو
معرف زول كرم يتمنو لي رفقارتو
وقت الحارة متشمر وبضراعاتو
في العز والفخر الناس جميعا ياهاتو