مجادعات النمة87

Abdallah Alhraa
===========
مانا عريب نَجُع في بكره سولن شكله
ومانا بزر بيوت متفجفجين فوق اكله
نحن نبانا يوم جرد الديوش والعكـله
نحن جبال ثبات فوقنا البلد منتكـله

الهمباتي الأغبش
==============
ماني عتود مراح فوق المواص اتدغلب
وماني العوقة وسط الناس هناك اتمقلب
اطير صقرية فوق ريحة الكليت والمحلب
وعند الليل انم اطرب واهيش واتقلب

محمد احمد احمد
==============
الهمباتى اخوى الجمعه ليك مبروكه
شاحد الله الكريم من الجنان يسقوكا
نم اطربنا قول خلى الجميع يبروكا
يا اب بما"سمح زى دقت الدلوكه

الهمباتي الأغبش
=============
تسلم يا الهميم تالاك قيم متروكة
نفسي تكون معاي ناكل هناك مفروكة
ناكل وننبسط والقهوة ديك مبروكة
فوق ضل الضحي الونسة تب مشبوكة

Mosaab Ahmed Omer
===============
الأماتـو فـوق سـدر الـودي ختنـو
سرحن منو غـادي وقرجمـن سابنـو
التيه فوق عيونو والبياض فوق سنـو
تلقى العاشقو حارس شيخو ضامن جنو

Mahmoud Abdoon
==============
محبوبتي الغزال مغرم متيم بيها
ما لقى زي جمال ولا رشاقة فيها
القمرة اختفت ووهبت سماها اليها
وزعلت ارضها وحنت لي صلاتا عليها

Elsheikhe Ibrahim
===============
محبوبتك عسل ليك حق تغنى عليها
ما دام القمر غار من دلالا وتيها
لو بسمت يمين تشرق شمس من فيها
ولو قالت حباب مزيكا من شفتيها

Mahmoud Abdoon
==================
محبوبتي مابقدر ابيت الليل وما طاريها
بذرف للدموع من فرقتا الحابيها
واشيل الليل سهاد واتمنى احلم بيها
كيفن عاد طريق اوصل حبيبتي واجيها

Midoo Khidir
=============
محبوبتك تعيش ويغطي الله عليها
يحفظها ليك براك من الغرام تسقيها
تديك هي الحنان والشوق يكون مالبها
ياربي الكريم يخليك ويخليها

Mahmoud Abdoon
===============
يارب ياكريم لبي الدعاوي الليها
واظفر بالحبيبة ونشوف جمال عينيها
وتديني المحنة المن زمان راجيها
واديها المحبة المن زمان خاتيها

بت العمدة
==========
حبيبتك يااخوي الخير كمان كاسيها
زي بدر التمام والكل بدور حوليها
اديها الوفا وبالغرام احويها
هي تريدك براك وهواك جد مليها

محمد احمد احمد
==============
صباح الخير عموم اهل النظم والنمه
جمعه إنشاء مبروكه وثوابا" عما
كل احلامنا و آمال الجميع تنتما
وفى الفردوس هناك إنشاء الله جت نتلما

بت العمدة
==========
امين ياللصم نضمك براهو جميل
وفي الدعوات تقول يقبل عزيز وجليل
احلامك تجيك قاصداك سعادة عديل
وفي الفردوس نكون زي وردة في منديل