مجادعات النمة69

Fathi Hassan
==============
تود الدقدق ألمن قام نشيّط
عصاقيلا تخلى الكور يعيّط
تقولب ايديك تقول مكنة مخيّط
بلا ست ريدى ما اظنك تبيّت

الهمباتي الأغبش
============
حباب فتحي الفوق غناهو وهيط
هز وانتر قصاد النمة حاقبو سويط
وسل في النم قولا لسانو سليط
وراك نجدع نخت فوق النضم فحييط

Fathi Hassan
==========
يا الهمباتي اخوي ما بنفع الجديع
ورا زولا بجر النم وراهو قصيد
ياكا بحر شعر الما بدور تجريد
جر النم بي وراك نحن نعيد

الهمباتي الأغبش
===========
النم والنضم ياك هولو انت اكيد
والقول السمح بي سرعة ليهو تصيد
نخاز الوجع البجدع هناك بعيد
سو القول طرب وحداك نحن نزيد

Midoo Khidir
============
مرحب بيك حبابك انت بينا جديد
والهمباتي معروف نمو ليهو بجيد
والقول بوراو ماببقى لينا سديد
نحن نشوف كلامو نحاول التقليد

Midoo Khidir
==============
ياالنمة الحنان وريني كبف امسيتي
مشتهياك عديل شوقك مطلع زيتي
انا جد شوقي ليك نساني اهلي وبيتي
وصحباتي الهناك ليلى وسعاد وبخيتي

Hafiz Alamin
==========
طلى النمه تتباشر وزايده نضار
يامهيرة الرجال الكمل الابرار
ابشرى لا جوه ادفقى للاخبار
جرستنا الغيبه والفطام جد حار

الهمباتي الأغبش
===========
زمن بت الخدر مستني اسمع نمك
والقول السمح بحس كلماتو في نضمك
اياك شتيلة البوح والنمة اصلا امك
بحس طعم الغنا سارح جاري في دمك

Hafiz Alamin
===========
قمر العشا بتفقد فى لحظات افولو
يلاكم نسوى النم يطرب البلابل قولو
عوسى عوسك فينا ورينا الفن واصولو
ماانتى فينا الراس نبراهو سمح مدلولو

الهمباتي الأغبش
=============
ياها العلم الفي النمة قاسي نزولو
سوايت النضم المافي ضمة مثيلو
ركازة الضعيف تقالة الخفيف لاحولو
نشفق لي غيابك وجيتك هناك تكميلو

Hafiz Alamin
===========
اياها الساس وتاج الراس وزناد تشعيلو
بنت الناس ومونة الساس وزاد تكميلو
ست الخير رتاية للغير السمح تأويلو
يلا عوضى الفاتك قبال يدمس ليلو

الهمباتي الأغبش
=============
ضل النمة الضهر ياحلاتو مقيلو
روح النمة الحنينة اللي عكرنا تزيلو
معاك بت الخدر كل السمح نمشيلو
يحفظك الاله وقدمك سعد يخطيلو

Midoo Khidir
============
نم همباتي اخوي موزون ولايق وخايل
نضم حافظ كمان نضم ملوك واوائل
في النمة اجتمعنا بقينا اهل وعوايل
للنمة بصون وفي حماها نقاتل

Midoo Khidir
==========
يالهمباتي اخوي نضمك مجيه قولو
حافظ اخوي هناك النم بعرف اصولو
السراج وخالد شاشاينا جد عرفولو
وين البشرى اخوى منتظرة تاني نزولو

Fathi Hassan
==========
بت الخدر نمك نسيم وعلايل
لا فيهو شقا و لا عويدا مايل
متشاركين نجيب المابقولو القايل
خلينا من الفيس باكر يكون موبايل

Msaad Yousif
===========
ديل كلهم اسود فى غابة النمة بجولو
كلامك حقيقة يابت خضر واضح قولو
نضمهم منظوم مرتب مافى مثيلو
مامشيتى بعيد وديل النم فحولو

بت العمدة
=========
ناس اللجنة قالو الليلة نمك لايق
كلام بت الخدر واضح وكلو حقايق
غياب همباتي شايفة جابلو عوايق
ها حافظ اخوي شايفك هناك متضايق

Hafiz Alamin
===========
الفنجريه تجتاز اى لجنه بى زوقه
ست النفايل بنت الاصول والروقه
فوقا اجر القافيه حروف مطبوقه
رزينه وشهمه باالعفاف معتوقه

الأميرلاي السراج
============
هي القول الرصين والباقي تبع القافية
كتابة درر حبات حروفاً شــــــــــــــــــافية
ما كترة نضم غايتو المقادير كافـــــــــــية
تسمعو منها اليوت في السحايب صافية