مجادعات النمة70

أبوبكرالجنيد يونس
==============
الزولةالبتوقد نار شقاي بالفيها
لهلابا"دموعي الكملو مابتطفيها
شنوالخلاني ارح متمني بس صافيها
غيرشهدا"رحيق أزهارومن جنى فيها

الهمباتي الأغبش
===========
هت الليلة العناق جاتنا لافة وشيها
كبست فينا شوق ناظر دلالا وتيها
السبب البخلي الناس تشابي عليها
يوم ظهرت هناك نسوانا شهقن فيها

Midoo Khidir
============
السمحة ام عيون مولاي ابدع فيها
زي بدر التمام والنجوم حوليها
الجيد والضمير والوش مجيه جيها
ان جات بالفريق كل القلوب ترميها

Hafiz Alamin
===========
راسيه رزينه اديبه سمحه وجيهه
سادل توب العفاف كاسيها نوره وجيهه
بريبة الرشيدى عدمتا لى وصولا الجيهه
صعب تتحرم من شى وانتا روحــك فيها

Mahmoud Abdoon
=============
ممشوقة قوام جميلة جد ووجيهة
موزونة كلام مدرورة ماها سفيهة
ان طلبت قلم دمك حبر تديها
وان طلبت ورق جلدك تفردو ليها

بشرى ابراهيم
=========
جدية العجرمان يوم لبسث السارا
طفولة وشها وخصلا تموج شقرا
الحق رغم ادمان مقلتها الحورا
علي حكاية ابوالدردوق مع القمرا

Hafiz Alamin
=========
قدلت حاكت المهره الدهب سوارا
ظبية امات سريح الفسل غفارا
ان اقبلت تلفاك العيون بى نارا
وان ادبرت مهره وعبكولا الدارا

الهمباتي الأغبش
============
لو شفت العيون بسراع هانك تتضارا
حاجب عينيها ظاهر بي قفا النضارا
السبب البخلي الناس هناك تتجارا
الجدي المكمل وفي الحديث طمبارا

Osman Amin
==========
جدية عجرم نعم انو سمحه لدينه وقواما مبربح
هااناس الأ كمان جلوعتن تسو فعايلن تقبح
كان سويتوغناي طرود والنمه جات تتشبّح
عندي الساويه عود وعلي العفاف بتصبّح...

الهمباتي الأغبش
===========
عناق العجرم الفوق الطشت بتغسل
تتحرقص تميص فوق الهديم بتنسل
مابفرز غناها رشاشا ديما مكسل
حولينا بنات لعاب وعتود ا ظني مفسل

الشاعر المخستك
============
بتسوق السحاب وبي مهل تتكي
يوم ماتبين تلوح كل الخلوق تتشكي
من سحر العيون أقعد براي في الدكة
وأصحابي المعاي واخدين وراها الجكة

بت العمدة
=========
درعاة المعيز البي الصقيع نجاعة
تاركات المشارع وبرجن النقاعة
للفاتل حبالوا و اب كلاب قناعة
ماخدة حذرها فوق الكفة مي وقاعة

Hafiz Alamin
=========
تلة ايدا فوقا ظاهره الساعه
مرناعة القوام اللقلوب قلاعه
طلقت فينى نيران الغرام ولاعه
ترباية بطاين خريف لا حش لا زراعه

الأميرلاي السراج
=============
وا نار الدهيبة الفي القلب ولاعـــــة
تتمايل تتم نشرة تمام الســـــــاعة
ملكتني أم ضمير اللغيب مناعـــــة
كان نقص الكلام بنتم قنيت ومياعة

Mahmoud Abdoon
=============
الفين سلام بت العمدة يالماعة
وريني الدرب البيو بجيك بي شجاعة
واقعد باحترامي واونسك بي وضاعة
وان الراس كبس لسجارتي هات ولاعة

الهمباتي الأغبش
============
النضم السمح الزول بدورلو شداعة
وبت العمدة هيلك فوق النضم جداعة
غيابك من زمن حاسبنو ليك بالساعة
خابرين الهموم والقراية وطباعة

Mahmoud Abdoon
==============
في شرقت صباح بدور انجما
واسلم للحبايب وعليهم اتلما
كيف اصبحتو كيف صنقرتو كيف الهمة
وكيف احوال شاشاينا وكيف النمة

Hafiz Alamin
==========
حباب ودعبدون اسدالكريهه الطامه
ودالقبائل تكل القلوب الهامه
حباب الفارس اب نفايلا" تامه
فى دار العز نمتنا راحة العامه

Mahmoud Abdoon
============
سلام ود الامين فارس القبايل البيضا
فرتاق الصفوف بي سيفو جاد تبديدا
اقبل بي صديق وزيد المحنة وعيدا
في صفحة الشاشاي بالحيل نتم تجديدا

الهمباتي الأغبش
=============
حباب عابدون ولد في النمة تلا ضراعو
فوق سوق الاصل ابواتو اخدو وباعو
التلب الوهيط في التيوة طايلة كراعو
اخوي الفي القلب مغزوز هناك مشراعو

الهمباتي الأغبش
============
كم سويت كتير اسد المحاصة الدافر
في ساعت الكماج ماك صادد ونافر
بتقابل الرباعي والدوشكا ليها تعافر
واللاقاك طفش بي سرعة ودع سافر

Mahmoud Abdoon
=============
ياهمباتي اخوي يابرقة ضواية
يااسدا نتر ياسيد سيوف هداية
شاكرين لمديحك اللي تاج و عباية
وان شاء الكريم رقابنا ليك سداية