مجادعات النمة71

بشرى ابراهيم
=============
فلاو الحبش ابدع كريما ساهن
علاهن ردافهن ومن وسط حزاهن
اخير المتلي يحفظ دمو يتحاشاهن
قبيل سيدي الرسول قال ان ختوك اختاهن

بت العمدة
==========
بشرى بشوف كلامك لحياهن مات
نحن بنات بلد باخلاقانا معروفات
طيبة وجود اصل معاهو ثبات
في كل الربوع من حلفا لسنكات

Osman Amin
============
فلاّو الحبش امات ضمير مختوف
مشنوق البرتكان تب ما علقّنو كفوف
الدوف الممهل فوقو الخصر مبلوف
هابشري علينا توبه مادام عيونا تشوف

الهمباتي الأغبش
==============
بنات هفتي الجمال فوقن جزم مرصوف
واللقب المزرقن عاليات صدير وكتوف
هت اللون دهب عقبا وسط مردوف
تجري الريق يسل لهجا حلو ومخلوف

الأميرلاي السراج
===========
ما سمحات سماحتاً يقطعولا بـــــوادي
بس ناعمات طرف هشات خديدن نادي
لينات في المسيب كفلن بدورلو قوادي
كان خشيت معاهن ما بمرقك قاضــي

Osman Amin
============
جوز رمان هتف فوق الخصير الفاضي
وجلست بي مهل علي اللدين بتراضي
قدلت في السحاب براق حساما الماضي
إتحسبنا ريد والعمده قال ما ماضي...

بت العمدة
==========
يابت الخدر الزي قمر دورين
خبارك يالبنية غايبة ليك يومين
بعد ماتقري نمي الليلة بتمعين
تلفني لي ضروري بدور لقاك في الحين

الهمباتي الأغبش
==============
بت خالك متينة حداها كل الزين
مابنحمل غيابا لو لحظة او في حين
روح للمنة تب ماها العقوق الشين
تسربل في النضم ووراها متكاورين

Midoo Khidir
=============
يابت العمد البكرمو المسكين
اهلك ناس عزاز بالعفة معروفين
والهمباتي اخوي حكى ليك كلاما زين
اديني العزر غيابي مالشين

التربال altarbal
==========
هادي البينية الزينة تب مشكورة
بتسوي النضم في النمة تب مشهورة
مع اخوانا قادلة شاشايا ولع نورة
عمود في النمة تقدل فوق فهم مستورة

بت العمدة
=========
وفيها خصال جميلة احلف عليها اسم الله
كريمة جميلة راسية معرفة تب في الحلة
مابترضى القبيح ولا الهرج لا الزلة
ويالتربال وفية ولقيمها مابتتخلة

Mahmoud Abdoon
===============
ان درنا التحشر والله مابغلبنا
بس اولاد أصول والعادة مابتعجبنا
لاهمباتي قصر لا حافظ اتجنبنا
بس الباقين بعاد وان وصلونا نحنا فرحنا

الهمباتي الأغبش
===========
عابدون تراهو الفي خلايا رفيق
لو حر الكماج بضرب غويس وغريق
جانا النمة تب انا شفت نضمو دفيق
بتعقب وراك النمة تب لا تضيق

لأميرلاي السراج
============
يا راعي المرافعين ماك هوين وجافي
إت صقر الجبال صدرك معبي قوافـي
القول النجيض هولك محل ما تصافي
نضمك بنسمع بارد حديثك ودافـــــي

Midoo Khidir
==========
ياود الاصول مرحب نقولها سلامة
حاشاك التحشر والاصالة علامة
معروف في القتال للرقاب قلامة
وقت الخير يكون مليان كرم وشهامة

ودالمك نمر
=========
سرف القيف وبطر الضيف وخريف اوكاتو
تمامة الكيف ونيل الهيف ووارث ابواتو
صدرونضيف وساعدوعفيف البخت جياتو
مكانو منيف واصلو شريف حباب نماتو

Khalid Alahmady
===========
اياهم اصلنا وملوك الدارة
ركازتنا ساعة توج الحارة
ا~محمود اخوى المابتتر فى الغارة
فرحنا بيك بندور ندق الطارة

Mahmoud Abdoon
============
اشبال الاسود والله ماقصرتو
احسنتو الكلام ولي نمكم جودتو
مشكورين شديد لمدحكم اصلتو
عارفين الرجال الزيكم محل بتختو

التربال altarbal
===========
كمد مخلاتي دافس لي تقاوي الشوق
وتيراب الغرام فوق جرفـي تب ممـحوق
السبب البخلي الريد بدورلـو علـــــــوق
الدعجة العناق اللــــيها ناوي لـــــحوق

Khalid Alahmady
===========
مخلاتك مستفة حاوية حالى القوق
تيرايك مبتق فى قلوبنا دون واسوق
السبب الخلانى ادور اطير بى فوق
مهرة صبق حرة مى جلبة سوق

الأميرلاي السراج
===========
كم فوق سمحة مخلايتك مليتة حقوق
تقاتك تكرم الضيف الولوف وخلــــــــوق
نضمك ريحتو فاحت فات هديل أبطـــوق
يا التربال عناقك ما بتخش الســــــــوق

أبوبكرالجنيد يونس
==============
فوضى الإنفعال بالحسن_تب كملتو
واحساس الجمال بالرقةليك جملتو
في شان الوصال قاسي الهوى اتحملتو
داون لود عديييل من روعتك حملتو

الهمباتي الأغبش
============
قلبي من الولف تالاك جمل شيلتو
بي اجمل كلام من شعري ليك حملتو
والطير البقوقي بي سرعة ليك رسلتو
لا جاب منك خبر لا البي عليك وصلتو

Khalid Alahmady
============
هارديسكى انطقش فضيتو تانى سرفتو
فايلك مشى الريسكل تانى اعدتو
ياالجاهلة المتل رش الخريف فى جيتو
اريتنى بى قلبك اكون فايروس ضربتو..

أبوبكرالجنيد يونس
=============
آالهمباتي كيف احساسي ما وصلتو
ماجاك في القليب نبضةبتدوركونصلتو
فيض ريدي وأساي والله_كان حصلتو
كان سعدالقليب 90 سنة اتحصلتو

Mahmoud Abdoon
=============
ابدعت الكلام ياود الجنيد الباكي
العشق خلاك زي الجداد بتكاكي
بديك العذر واديك معاو املاكي
وان داير تسكو اركب معاي ملاكي