مجادعات النمة72

أبوبكرالجنيد يونس
============
تالاك القلب باللهفة يوت سايقني
والتبريح عليك بالإلتياع شايقني
وجعةفرقتك بيها الأسى مضايقني
والشجن الأليم لا طايقو لا طايقني

الهمباتي الأغبش
===========
الليلة الغرام في جوفي حار ماكني
تاور يا الجنيد في اعضايا تب هالكني
السبب البخلي قليبي يوت متكني
بعد تلفون طويل لج قام شاكلني

بوبكرالجنيد يونس
============
ما ليوحق يشاكل زول متيم زيك
إلا حق الدلال مديهويسرق ريك
في مضمارصبر أطلق عليوخيل غيك
إن قالك سلام أوعك تردلو:ازيك

Khalid Alahmady
=============
أمسى القليب فى غيهن حاكرنى
واصبحت سجين هواهن مافى من يذكرنى
السبب الخلانى متوكل راجى من يقبرنى
ظبيات الخلا النافرات ترا طرفهن كاتلنى

Hafiz Alamin
===========
شـــوف العين برا ما ســــمعنابو قاطع الفرقه
وما بهــــز الجبال ضـــرب السيوف والدرقه
بس صدرا" طامح خـــــلاني زي الـــورقه
طفش عقلى رايـــح شمــــار في مرقه

Mahmoud Abdoon
=============
ياخواني العزاز ماقدركم في الجرسة
ولامحجور قلب ولا بسك العرسة
بس راجي الكريم يرحمني من الفلسة
ونظفربالمليحة وخلاص نجر المرسة

بت العمدة
=========
قدر ماجاك عليل منصر تتب بطولك
مابتحرن تصد كل المعاك شهدولك
فرت فاطرك انطبعت عليها اصولك
إن عدم الدواء بتداوي شوفتك وقولك

الهمباتي الأغبش
============
الجود والكرم ميراث جدودا هولك
والقصد اللطام بجفل بعيد من هولك
رباي للصغار ووقار حنين لكهولك
الحبل المتين الما شفنا قط هلهولك

Khalid Alahmady
==============
شمس الهجير بردت بي صب هطولك
ضيف الهجعه عشيتو ضبحت فحولك
حديثك هام مابتتني القبايل قولك
موندمان وحاتك البنحسب في عولك

Abdallah Alhraa
============
الكرم انت اصلا سيدو والعز هــولك
من ولدوك ملجابو وصبح منهـــــولك
معنعنه فيك مكارم ابهات وكــــهولك
ميراثك تليد في الخير رحيبه سهولك

بت العمدة
===========
مما قام صغير المال بصرفو
وانا شكر الرجال بالحيل بعرفو
ذويا بالتلاتة بيضوي سرفو
تجيني العافية يوم ادني واكرفو

Msaad Yousif
===========
كرما مشهود بية القبيلة وكتيرة نفايلو
ما كرم هيل تجار ولا شوفونى عاينو
ضباح الشايل وكان حرت الصف بضايرو
معروف فى كل انحا السودان وقبايلو

Hafiz Alamin
===========
الطـين السـمح دايـما بخضّر زرعو
والأصـل الجميـل لابدّ يتبـــعو فــرعو
وكت تحر الزول يحجاهو سيفو ودرعو
زي أمك وابوك ما بتلقي ناساً يرعو

Abdallah Alhraa
============
يارب يا كريم تديني لو في حلمه
اشوف الخدها بنور دماس الضلـمــــــــه
حالية الحديث لي مهرجله ولي بلمـــــه
كلمتها بي العيون بتساوي مليون كلمه

Midoo Khidir
==========
ياربي الكريم يتنمة ليك مرادك
تشوفها تكلمك والكلمة تصبح زادك
بنظرة عيون من الهموم تصتادك
تسلم ليك انت ويسلم قليبها الرادك

بت العمدة
=========
الليلة ام خدود دايرة النشوف بتاوق
فوق رؤوس الطوال ام روايق بيساوق
عنت نوناية الوعرة ام ربويا سايق
دايرةالمرقة بي الصي اب هوايا رايق

Hafiz Alamin
==========
حايط النمه الليله جاب نفحات
بنات العمد يتجـــــــــادعن كلمات
هبن رسمن درر سون العديل جُملات
اشعلن الحماس خلن النفوس حاسات

Mahmoud Abdoon
=============
يارب ياكريم تديهو كل الدايرو
تجمعو بالاصيلة وفيك العشم انا قايلو
وتفرح قلبو بي ست الجمال واصايلو
وترتاح نفسو من الريد الخطير وعمايلو

Fathi Hassan
=========
شاحد الله الكريم دايما تكون مبسوط
والحلوة تبق حليلتك لا نضم لا شروط
نحضر يوم جديدك و المزاج مظبوط
وان درت البطان جاهزين كمان للسوط

Midoo Khidir
==============
قم من حيني قاصداه حكيم الصحة
امشي عليهو واردف كل مرة الوحة
قت لي سيبيني ماعندك دوايا صحة
انا طبي الحبيب والقلب لغيرو تب ماشحة

Hafiz Alamin
============
الله كشف ضرك ويملاكى عافيه وصحه
الفنجريه يابت الرجال ابان نحاسا" قحا
يجمع شملك الخالق بى ولادة النجحه
ليهو تملى البيت بنوت بنين بهجه وفرحه

بت العمدة
========
فرحان بيك طبيبك وبي نفايلو يجادع
ومسك للوجع بتر الدكاكر القاطع
يازينة البنات صدرك محكم وواسع
شاحدة الله الكريم لاتمي لاتري فاجع

Midoo Khidir
===========
علي المرضان طبيبي بهم يجيو مسارع
وللداربو القدر بيتب عجول متواضع
سخيا ما عنيد في الحوبة بيقبل راجع
ما المي البدن القليب هو الواجع

Mahmoud Abdoon
=============
سكيت الطبيبة الخلتني عيش في سرحة
بدور اشكيلا من العلي من جرحة
الا وكت اقرب من ام وجيها ملحة
لا بنضم معاها لا بقدر اوقف قحة

Midoo Khidir
============
الله يعينا في المرض التملي مسكنا
يزيد حبل الصبر ويقوي لينا عزمنا
من شوفت الحبيب الغالي مايحرمنا
يدينا الحنان في حبو مايهملنا

الهمباتي الأغبش
==========
ماك شبه الدرادر والعلل بالمرة
والعافية التجيك بدنك هناك ينفرة
تعظيم الاجر مكتوب قصاد المرة
والمؤمن مصاب لو الصبر انشرة