مجادعات النمة73

Omer Ali
========
طريت محيا الحبيب جبينو شع ضاواي
اثار كي من شوقو عايشه في جواي
بدور ليها القوما بس قيدي جد لاواي
وفكري اصبح عزمو حداث مو ساواي

Midoo Khidir
==============
عمر القلب هاف واصبح هواك متغلب
يوم رايق ويوم في النار براك بيلب
نسوي الضل تخين يوم نار غرامنا تعلب
يوم نضحك كتير ويوم دموعنا تحلب

Omer Ali
==========
بعدكم بعد الليم سلبني الصحة
حاير قلبي طاير من مكانو اتنحي
تلاتة اشياء علي سبب السهاد والوحي
جور ازمان وفراق احباب وصبرا شحا

Midoo Khidir
==========
سلامتك ياعمر ويارب تتم بالصحة
القلب ان هوى لابد يضوق الوحة
ان حصل الفراق باكر تجيك السمحة
يوم تقدل عليك تملاها حياتك فرحة

الهمباتي الأغبش
==============
حبابك لينا جيت ماك الهوين الخاوي
نضمك في الصميم متان غنا ويتلاوي
حباب النمة بيك لي العتمة انت تضاوي
ياابو عمير حبابك يازول يمين بنخاوي

Hafiz Alamin
===========
متبورة القدم جاتنا ام جسيما" ضاوى
وقلت طلقت فينا نيران جهنم وبـلاوى
اكان ماخوفة الفضيحه وقوالت الراوى
انتــم المراد واتبسط المتيم وهاوى

Mahmoud Abdoon
=============
ياود علي مرحب حبابك ويلكم
لانما سمح لاقول بلاك بنتم
اطراه الحبييب اطراه تب وانجم
ونحنا معاك سند اخوان واولاد عم

Omer Ali
==========
يا وحة القلب المعايا قديمة
أبت ما تنفعك شربة حكيم لا عزيمة
يا نفسي اللذيذ ما بتلقيلك ديمة
والمسافر بعيد ما بتنفعو التقديمة

Hafiz Alamin
==========
يانفسى الصبر امسكى حبالو وشدى
موزونة القوام لاتخــتف صـوابك اهجدى
آه من فراق بريبة الاراك ام خديدا" يندى
حكر كاس الجمال مالكاهو عندها فردى

الهمباتي الأغبش
==========
اتململت زين وحبل الصبر ممدود
والشوق الدشر قدامي يوت مفرود
خلاص قلبي انغمت بالريدة تب موصود
والليل الطويل والقمرا يبقو شهود

Omer Ali
=========
البارح براي بشكي وبنم وبنوح
واصلت السهر عجز بلابل الدوح
السلب الحياة وخلي اللحم مسروح
نظرة خدودي للحزنان سرور وفروح

Hafiz Alamin
===========
شلتا الليل سقد لامن بياحو يلوح
سامرتا النجوم ابكى واقـول وابـوح
حالى الـعلى يـشابــه طلـوع الـروح
عافيلك سهادى وكتر العذاب والنوح

بت العمدة
=========
البارح براي باكية وعلي جراح
شلت اليل وحيح لمن ظهرلي صباح
تعبت من الهموم فترت من النواح
يارب ياكريم يهدى القليب يرتاح

Mahmoud Abdoon
===============..
ناجيت النجم في ليل طويل مطروح
شايل هم صباح يطلع يصحي جروح
فارقت الخلايق واصبحت تب مضبوح
لاقادر اغمد لا بالبي بقدر ابوح

Midoo Khidir
==========
بعد نوم الخلوق حتين بركا يلوح
مسنود لونها ذي وح الشقى المسنوح
بكت بي امات قماري هجوع وقالت نوح
قباضة وبت رجال دلتن المشروح

الهمباتي الأغبش
============
القمري الصباح قوقايو ختا صروح
ولع نار غرام في جوفي مابتروح
السبب البخلي الليل دوام مصبوح
الجدي المخنصر ووشو ضاوي صبوح

بشرى ابراهيم
============
فاجعني الزمان ياعماره الله يقدو
لحسة كوع بقت شوفة البوجوج خدو
انا حارس الديار ياشيما اهلك شدو
خلو عقاب نعلت كل ساعة بعدو

بت العمدة
===========
بريبتا تروع قلب العشوق وتقصو
الذذ من لزير عين المنزع مصو
انفها قمقم الدهب المقايس قصو
فرها كاللجين مع الاشام في بصو

الهمباتي الأغبش
============
الهم العليك ياربي سرعة تسدو
والصبر الحداك في الحال حبالو يتمدو
الريد كان كبس تالاك فايت حدو
بل الشوق سعن واكرف عبيرو وندو

بت العمدة
==========
ات ياقلبي كان بتروق وكان بتجن
بروق القبلة سون في البطاين فن
ضرب عقادو دور وحش الشوقير دن
لقالو عقيرة قمريها ودباسها يغن

Omer Ali
==========
فرت بسمتك تذهب عناي وحزني
عشقت همستك قبل النواظر اذني
انا ياسيدي ليه من دنيتك تلفظني
باعد عني طيفك وطرفي زارف مزني

الهمباتي الأغبش
===========
سماحتكم تدوم والراعي ليكم اغتي
والنضم السمح فوقو المحنة تستي
طاب الريد متلت والشوق هناك منحتي
من النمة قول هت يا المصايب روتي