مجادعات النمة74

Midoo Khidir
===========
وانا ياناس تاني حياتي شن بتسوبها
امة راسي بسيف الغرام مضروبة
قلبي مدينتو كلها اصبحت مخروبة
سببو تنشق العجن البسو في الروبة

Omer Ali
=========
شان نيرانك ماتهيج أوعاك تعشق تاني
خاف شيل الكتوف و كت كربة الوسطاني
وأنا صح عاشق عيون بس هي ماعارفاني
تغازل للعوازل وإياها دي الماغساني

بت العمدة
==========
حياتك غالية علينا يابت خالي
بحتاجوك كتير احمد معاهو معالي
الساب لغرامك انت منو قبالي
ابنها المدينة ووخلي سكنك غااالي

Mahmoud Abdoon
===============
يابت خالا ماتخليها فيك سرحانة
طمني قلبها البت عليك شفقانة
وماتشكيلا ديمة وونسيها معانا
وخلي البال عليها واحفظيها امانة

الهمباتي الأغبش
===========
قلبك بي الصبر كوكريهو بي امعانة
وريتك كان ختت الناس عقب مليانة
الزول في الخصال لو يبقي ليهو مكانة
قيف سقف الغنا يوت بنقلب رطانة

Midoo Khidir
=========
بت العمة انتي بالعلي دريانة
وياهمباتي اخوي انا نفسي جد كدرانة
فتشت القلوب مالقيت لي خانة
ويامحمود اصيل وليك بينا مكانة

عمر علي
========
من سيرة العيون ما كان أخير تختاني
ليش تفتح علي بابا كم منو كنت بعاني
كم لحظا هرد قلبي وتوّر علي مصراني
وكم طرفا كحيل لي نوم عيوني حماني

بت العمدة
=========
الجب في القلب عينو هو المالكاني
من شفت العيون لخبت علي كياني
والطرف الكحيل ملك القلب في ثواني
يارب بس يمر اشوفو لحظات تاني

Khalid Alahmady ............
==============
سلام أحباب ناس داراً دوام عمرانة
طولنا الغيبة من النمة الدوام واحشانا
وكل الكرام الجونا كايسين ينمو معانا
حباب الاف مستفة ود وحب فى حدانا

الهمباتي الأغبش
============
هلا بي الاتبراوي الخالد الجوانا
راضع الجود زمن ما ترا من تالانا
الغيبة المعاك دايمنا تقط ميزانا
وبي جيتك تكون كل الخلوق طربانا

بت العمدة
==========
حباب ود الرجال وخصالو جد عجبانة
حباب ود الحديد والنار طلتك واحشانا
تعال لجاي ونم والنمة بيك فرحانة
بيكم تبقي عمرانة وتملي ملانة

الهمباتي الأغبش
===========
هت بت العمدة حاشاك تب من ضيم
موفورة خصال وطبعك مثالو عديم
تيانة الاصول فهمك وصالو حميم
مفرة في البيوت والصي بتاعة ريم

Khalid Alahmady
=============
حباب مغوارى اللزوم عالى مكانة
اخوى همباتى الفى الحروب كو دانة
مشتاق نماتك ديك التقيل ميزانة
مالك غايب النمة تب محنانة؟

الهمباتي الأغبش
==========
هسع جيت مطر كابي زي السيل
وكل من قال بغم تلقاني تحتو عديل
النمة الهناك نرويها قول ونكيل
وتبي النمة نيل يوت نحن منو نشيل

Khalid Alahmady
============
قدلت فى الفريق الليلة بت عمدتنا
جارة النم تسوى القوق تب طربتنا
يابت الرجال البيهم تفتخر بلدتناا
راقية وفاهمة بيك انملت نمتنا

Khalid Alahmady
===========
اياك ضهرنا المانقصم ويوت كارب
لزام التقايل ساعة المحاص متقارب
سيد النمة الظيتا تب بقا ضارب
حاشاك من قصار فوق فارغة اكيد ماك غايب

الهمباتي الأغبش
=============
ياها النمة بيك انت العمود والشبعة
والديداب كمان وفوق ساسا انت الربعة
كل المدا راسو تالاك ماخد لبعة
هيلك تب اصل من زيرو لاعن سبعة

Hafiz Alamin
==========
من مما قم صغير رجاله مالى العين
معروف عندنا ود ناس وحر وامين
اب رايا" مرضى السمح والشين
نـور النمه زاد تكميلها وليها تزيّـن