مجادعات النمة77

بشرى ابراهيم
============
ان وقعت عديلة وان مشت مبرومة
وان قدلت معجنة من وسط مقسومة
ان قعدت موهطة واقساوة القومة
مبرومة حشا وعجوة محس قدومة

الهمباتي الأغبش
============.
لافحة الطرحة ماها مشرشرة ومشرومة
معدول القوام عند الوسط مصمومة
ان سكتت ملاك وان حكت كلومة
وان بسمت درر عند الخشيم منظومة

Hafiz Alamin
=========
ان اقبلت قمرة سبوع معلومه
وان ادبرت مهرة ملوك ومسومه
ان نضمت يقطر عسل منظومه
وان قدلت تبراها العيون مصرومه

Midoo Khidir
=============
ان قدلت سحابة وجاتنا شايلة غيومة
وان قعدت مطر خريف تصب في يومة
العالية المقام حاشاها مي مزمومة
تعرف للنضم في النمة عالية علومة

بت العمدة
=========
ان شكرنا فيها برضو هي المظلومة
عاليه مضمرة زي شتيلت الدومة
ابدع فيها الله ومن حاجة مي محرومة
جميلة مهذبة وراقية ديمة هدومة

Midoo Khidir
===========
لابتشبه سعاد لافاطنة لاكلتومة
وحيدة صفات زينة في البنات معدومة
نوارة الفريق بالمعجبين مزحومة
فارعة في القوام ومن الوسط مقسومة

الهمباتي الأغبش
===========
ماها العبوس وماها البقت مهمومة
تتقطر حلا حت ولو قايمة يوت من نومة
مشكورة طباع في الحلة مي مذمومة
بي كل اختصار تستاهل القيدومة

Khalid Alahmady
============
قدلة الوزينة كان شفتوها ساعة العومة
تتفدع متل جدى الغزال فى الحومة
خدارا مندى لمع البرق تتلاصف جسومة
مالقيت شبيهك فى البنات معدومة

Midoo Khidir
==========
معروفة البنية تملي زولة خدومة
بتقيف في الضيوف العندهم معزومة
بيوصفها الخلوق زي قصة الفطومة
تستاهل يقفولها الخلوق محزومة

Msaad Yousif
=============
فى مشيها تقول ضابط الحكومة
عالية الفنايد خلقة الله مامرسومة
ضامرة هافا سجارة برنجى مبرومة
الصدير حكمة حكام محكم فى القومة

Abdallah Alhraa
============
موفورة الدلال الساده مي مرشومه
تامة خلقه ميها البي الكريم متمومــه
ساعة استاذنت واتسندت للقومــــــه
لهج الشفتو مابتوفي الحروف منظومه

Mahmoud Abdoon
=============
ان سرت في الليل يبدا القمر في لوما
وان صبحت صباح ريحة الزهر قدومة
وان ضحكت تقول لولو ودرر مرسومة
وان ذرفت دموع ماسات تلملم كومة

أبوبكرالجنيد يونس
============
إن وقفت تقول نخلةوقصيدةوبانة
وان قدلت حمامة نغم كمنجةوبانه
وان قعدت موهطة تفتخر تيبانه
واكترة قلوبا" خلعت بيبانه

عبداللة الهرع
=============
بالدال دكت الدهب النضيف ومشكّل
وبالراء ريقها من نحل الجنينه العكّـل
بالياء يا لطيف من فاقـلها البتكّـــل
وبالهاء هبلت عزم الفكي الاتوكّــل

الهمباتي الأغبش
===========
داويت القلب ياخويا فيك متكامن
ربيت الفرح في الريد عليك متطامن
ياك وافي وحنين فيك الولف متآمن
هديت الظروف كل الصعاب ومزامن

Khalid Alahmady
===============
ص فارالدهب اللونو بخجل منك
ف اهك دررمنظوم ان ضحك سنك
آ ه من قامتك نخل القريرمابقرب منك
ء نا من صفاك صفيت دناى بي حنك

الهمباتي الأغبش
===========
هدهدت القلب اصبر خلاص لاتضيق
دودرت الفرح تالايا يبقي رفيق
يايات العشق ممكونة فيا غريق
لاليت المحبة تطفي مني حريق