عبد القادر النوبي ============ بلد الحايمة يالهضليم عقبت فروشو وخر ردة المرعى الكتير داشوشو ريق ظبي الجزو الأبن الحيامة وحوشو حلات قصب الجنيد البنقرش لا عروشو
الهمباتي الأغبش ============= بلدا انكتم يالنوبي عالية دشوشو لخبيت الدواهي فوق المعلا بروشو جابولنا الهنايات لي الشينة جت بتحوشو حتي الفي المسور باريهو فاكي دحوشو
Khalid Alahmady ٠============ ترا جانا ودالنوبي الليله منوالبحوشو في الطندب هناك فاضل شيخ مابتكمل عيوشو البحرالفاض ودفق بالخيرانترس حوشو حبابو قايد النم والشاشاي تملي ديوشو
عبد القادر النوبي =========== الأغبش أخوي الأحمدي يله نحوشو قبال ما ينزرق يدخل هويشو وغوشو الجنا كان فلت بي نمو الجماعة بهوشو تبقى علينا ندامة العاس وأندفق كتوشو
الهمباتي الأغبش ============ الريد كان كبس كل الجماعو بدوشو وان لافا العناق كل العواطف يجوشو فوق عود الصبر علق هناك كنتوشو زي سيد اللبن اكل الزبون لي قروشو
Mahmoud Abdoon ================ من أرض الجدود برسل سلام وتحية سودانا الكبير بلدا رجالو وفية فرسان الوغى راكزين وصادقين نية مابعرفو المهابة بالسيف بجيبو الدية
Msaad Yousif ============= اولادك بخوض المعارك وليك عاقدين النية قصدهم رفعت البلد من غير جهوية فيك اسود الغاب ناس شندى والمحمية كمان جنوب وشرق وغرب مابسوا النية
Mahmoud Abdoon ============= قلب اولاد سودانا قلب النمور الحية في الحارة الثبات مابعرفو تب دبرية وفي الجود والكرم تخجل قبيلة طية يا التارك السودان اقبل وانوي الجية
Mahmoud Abdoon =============== ناس النمة هوي والله جت قصرتو الموضوع وطن لي نمكم وصلتو كايسين لمديحكم الا الجميع اهملتو وللاوطان ديون في دمكم من حقو
الأميرلاي السراج =========== وأخر قول عديل غايتو الليالي تــــــــوري من حلفا الجنيد وادي البطانة وقـــــــري فيك توب السكات أحسن عليك تفـــري ما تناضمي النضم بكشف عيوبنا ويعري
الهمباتي الأغبش ============ البلقي الهبوب يوت فوق تقاتو بضري والدنيا المحك كل يوم علينا تقري ياروحي البقت والهم هناك منشري اكتم ياسراج للشينة زول ماتوري
Midoo Khidir ========== عارفينك سكوت بالفيك مابتوري وعيها البنية قوليها احفظي سري ماتمرقيهو بره حتى لو تطري خليك ليها نور في الضلام بيضوي
الأميرلاي السراج ============ وكان خير الكلام ما قل وأوجز حـــــــالو ما تلوكي النضم ترمي العوج حـــــبالو ماك دارياني شن سويت وشن ببقالو وإن لزوك علي ماني البكشف حالــــو
Msaad Yousif ============= سمح الزول الفى المجالس قليلة اقوالو ستار للعروض دراس عضم الفقر بشمالو فى المثل القريب الولد منسوب لى خالو نتشرف بيها يمين ونحقق المن العلم نالو
الهمباتي الأغبش =========== مضاري علي كلام علا ظاهر وباين الجواك غريق ياخوي وضاوي رتاين التالاك بحر ممدود محل ما تعاين قول الفي الضمير نفرو مهما كاين
الأميرلاي السراج ============= ما أتختيت يمين في حتة ضيقة قــبالك أأ وهج السروح الفر جبينو حـــــــــــبالك قولك كان صنوبر مر كلامــــــــــــــك زالك أنا زول ود بيوت حت أسألي الفي بالك
Midoo Khidir ========== ياود السراج شايفاك مهموم مالك قول احكي العليك كلمنا عن اخبارك كان دا من الغرام شاغل قليبك وبالك بكرة تكون سعييييد ويصلح بيه حالك
ليست هناك تعليقات:
إرسال تعليق