مجادعات النمة80

Bent Alomda Hassan
==================
مضمور الحشا كفلو البرج لي ساقو
احور طرفو شوف رمشو وحاجبو اتلاقو
العطل كلاي شال قلبي من علاقو
فر سنو زي برق البدودي سحابو

Msaad Yousif
=============
المربوعة قامتو برمكى وقدال
لحظ ابصارو برق القبلى الشال
لى بلد ام سماح بشد ترحال
على ضهر الاربد البجيب الفال

Hafiz Alamin
=============
متبور ساقو مضمر هافو وحورا آماقو
بريبة جهمورك فى الكبد احراقو
متى قلبك ننجى وننول اشفاقو
سهدتينا وحميتى العيون يتلاقو

الهمباتي الأغبش
==============
مخنوق من وسط ممشوق ولادن ساقو
يوم قدلت بشيش كـــل الخلوق ما فاقو
الذوق والـجمال قاعــــدين قبـــالا اتلاقو
والـحاجب الغزير والشهد الـبسيل دفاقو

Hafiz Alamin
=============
فراق بريبه كل ماليهو زايده اشواقو
مضمورة الحشى فرك العينه الشلع براقو
وجهل ود سبعتين الفى وادينا هلّ اشراقو
الدهب المجمر على المتلى غاليه اسواقو

الهمباتي الأغبش
===========
من زمنا قديم اشواقي ليك ماحاقو
والسهر الطويل والنتحي تب ماراقو
والقلب الحداي قط ما انعرف فــلاقو
ونيسان الـغرام يوت الحنين سواقو

Hafiz Alamin
============
من فارقتا البلد عينى والقلب ماراقو
بتزكر الاخوان ورفاق الصبا البتلاقو
بتزكر يمه كل ماقدامى الدروب يتعاقو
بتزكر يــابـا وكل ماليهو زايده اشواقو

الهمباتي الأغبش
===========
الشوق كان مرق ليهو العيون بتسارقو
والسفر الــبعيد قلبي الـموجع حارقو
الزول كان صبر برضو الشجون بتدارقو
ولو غــمد كمان يحلم يمــضي اوراقو

Hafiz Alamin
==========
ليه يانفسى المعدوم تزيدى اسناغو
السفر والبعاد فى اعمارنا طال امحاقو
وسهم الفرق فى الجوف غرز زراقو
حليل ظبى امات سريح المتبر ساقو

الهمباتي الأغبش
==========
الظبي المفدع فات دخل اشلاقو
الديس الغزير الما انهبش حلاقو
اللبن المغتي خاتنو في معلاقو
هارد للقليب وحارة تب اشواقو

Hafiz Alamin
===========
ظهرت من بعيد وعيوننا دابن راقو
المرنوعه تتهادى ونميل يغلبو النظر اطراقو
تالـه اليمين مع الغويش فى نغـم ينسـاقو
حلاتا المحياها بدرى فى دارنـا هلّ اشراقو