مجادعات النمة81

Mahmoud Abdoon .
===============
ممشوقة قوام جميلة جد ووجيهة
موزونة كلام مدرورة ماها سفيهة
ان طلبت قلم دمك حبر تديها
وان طلبت ورق جلدك تفردو ليها

Hafiz Alamin
==========
سليمة الذوق الظرف حاويها
حشت كلاى ورويحتى تلعب فيها
السبب المخلى عينى النوم جافيها
محشمه ومحروسه و العفاف كاسيها

الهمباتي الأغبش
=============.
القمري الصباح يوم صدح حـــاديـها
والذوق والجمال موجود مكمل فيــها
ممشوقة قوام يوم قدمت شاهــيها
شربت الشوق مطر عقبا متيم بيها..

Hafiz Alamin
============
السكه الواصلاك حلف بكمل فيها
ان جابت هلاكى يمين مانفاكيها
المشحتف روحى وزايد البيها
فىالمنام لسانى يجيب طاريها

الهمباتي الأغبش
=============
مكتوب في الدروب خطوات معاك بمشيها
متقرقب حنين واشـــواقي يوت حاشـيها
نتحيب الـغرام لي الــــروح دوام شـاقيها
ياناس لو حسيت دون شك بكون عينيها

Hafiz Alamin
==============
منانا لماك وايامك نضوق صافيها
ونفارق عيشة الغربه ومرايرا" فيها
قبل مايصــبح حياتنا الزمن طاويها
نرحل نفارق الغربه ويتقطع طاريها

الهمباتي الأغبش
==============
كم شاقيت كتير وحــبال صبر لاويها
واتمردغت يوت فوق الــهموم حاويها
بدلتي العذاب شلتي الهموم درتيها
وختيتي الـــحنان جنات اقـيل فـيها

Hafiz Alamin
============
انساكى كيف وحياتى انتى الفيها
شقيت البلاد عشمان اجيك زافيها
الدنيا العبوس كل ماليهو زايد الفيها
الــبعد والفراق طـباعا" مأصله فيها

الهمباتي الأغبش
=============
كيف ابرد مـــعاك وانا ريدتي متدفيها
وفي عمق القلب موجودة تب خاتيها
مابطولا الــعزول مــهما كاس داسيها
بي كل الـحنان والشوق كمان لافيها

Hafiz Alamin
=========
غيبى وتعالى تلقينى ماسك الفيها
صـاين عشرتك حلفتا مــابخـلـيها
الشوق والحنين روحى تب ماليها
كيف الشورة يانفسى ودربى اليها

Midoo Khidir
=========
بت عز الرجال والادب كاسيها
كل نمة الغزل مكتوبة في عينيها
الوصف الكتبتو شوية زاتو عليها
ابليس كان رأها بيهتدي في ايديها

محمد احمد احمد
============
ناس النمه هوى ياناس صباح الخير
ليكم وحشه جد فارقين علينا كتير
مشتاق لى حديث ناس الضرير وعكير
ومشتاق للحماس قولة ابشرن بالخير

الهمباتي الأغبش
=============
صباحك كوم بسط تالاهو انت تسير
طولت الغياب انشاء الـله بعدك خـير
سو لينا النضم خــلينا فـوقو نســير
كان فوق غزل او في الحماسة نطـير

محمد احمد احمد
============
يا الهمباتى وين فاقدك يمين بالذات
وينك يا أمير يافارس الحوبات
بدور اسمع لى منك خمسه ست نمات
قولنا كان نروق نتذكر السمحات

الهمباتي الأغبش
===========
السمحة ام جمال ماليها لي التولات
تحصحص في القليب لو ادبرت ولو جات
ديسا غزير عسل قطير عيون واسات
تبلع جب اكان كسحت حداك بسمات

محمد احمد احمد
============
البت الطويل عودا وملان قسمات
ام ديسا غزير ينزل وراء الصفحات
مشيها برا البعوم فى النيل مع الموجات
بتوردك القبير كان ادتك نظرات

الهمباتي الأغبش
==============
يامحمد اخوي كان شفتا جوز وجنات
وسبحان الخلق خصرا قصاد صفحات
حلجبينا الهلال والحكمة متقارنات
فوق جوز العيون الحوور الواسعات

محمد احمد احمد
==============
شفتهن العصير فوق الجرف جالسات
يقوقن بالحديث زى القميريات
بقول لى قلبى نرجع نقفل اللبقات
قدر باصرتو غفلنى وقعد ما فات

محمد احمد احمد
==============
البت القبيل مرقت من الجيران
ديسا غزير مورد خدها النديان
عيونا برا السرح بالواحه والوديان
وخصرها قسم الفوق والتحت كيمان

الهمباتي الأغبش
===========
البت المنعمة وباتعة فوق دخان
لونا يلاصف الصفرة ويخجل اللمعان
تابن ساقا من تالاهو حجلا بان
صديرا قلع وفوق تولاتو جوز رمان