مجادعات النمة83

محمد احمد احمد
=============
صباح الخير عموم اهل الحديث الطيب
صغيركم كان تصيح ابو مروه تلقى قريب
كبيركم ديمه ذاكر يلهج لسانو رطيب
ونمكم الجميل كم للسقامى يطيب

Msaad Yousif
===========
صباحك صباح الفى المنصة لبس التاج
ود احمد اخوى فراج كربة المحتاج
خيرك ديمة وافر يا ابو نورا سراج
نسبك مأصل متل الدهب الوهاج

الهمباتي الأغبش
==========
حباو المن صباح القاهو لي قريب
اب نضما سمح مافيهة شيتا عيب
الالفة الحداك ياخويا دايرا حبيب
يارب ياكريم في النمة دايما طيب

محمد احمد احمد
==========
يالهمباتى اخوى والله اصلك طيب
فى النم والغزل قولك رقيق ورطيب
وفى شعر الحماس وارث الضرير والطيب
ربى يعمر الشاشاي ويبقى رحيب

الهمباتي الأغبش
==========
يا ابوحميد تراك انت النضم متراسو
والنم الرصين تالاك مغرق ساسو
وريايدك من قليبي بي وداد اخلاصو
والهمباتي ليك حاقب ولف في راسو

بت العمدة
===========
مشيت وجيت لقيت دلو السلوقي
يجوني الناس يعجو يقوفي فوقي
شاكية الغلبة لكن جد بشوقي
متل جمل العلوق كل ساعة اهوقي

الهمباتي الأغبش
============
فوق قيف السماح ختي المطايب روقي
علي جزر الزمن تالاك مراحك سوقي
من هادا العشم يابنية جر واسوقي
تيربت الوصال وبي الود شحطا عروقي

أبوبكرالجنيد يونس
===========
حلوة الخوة بيناتنا ونديةصلاتا
أسمى مشاعر الروح التصلي صلاتا
حنية" تدفق فينا إلفة حلاتا
خوة تنافس الريدة وبتغلى غلاتا


الهمباتي الأغبش
============
جات تقدل بشيش شوف البنية حلاتا
من لون الدهب دفست هناك مخلاتا
هادية رزينة راسية سكوتة مي غالاتا
خجل قمر السما يومو النظر تالاتا

Midoo Khidir
============
الحزن الكتير ياناس ملاني
حتي النمة مابقدر اخشها تاني
الا كان زهجي فك و فات بعيد خلاني
ارجع تاني انم يطلق لساني

محمد احمد احمد
==============
يا ميدو الحزن ماتخلى يملا حياتك
الدنيا ام قدود ما بتستحق دمعاتك
ناس النمه جت ديك ناس اخوك واخواتك
احكيلنا النشوف كان نبقصن وجعاتك

Hafiz Alamin
===========
بـت العـمد اللابسه الفهم اكليل
زتاد نمتنا وزايده الحـروف تشـعيل
تمامة الكيف ال لـي فـهمنا دلـيل
وكت تحزنى انتى شن بيسوو ديل

الهمباتي الأغبش
=============
الببرا الحزن كتر الوحيح بيهدو
والفرح الوهيط في الدنيا بلعب ضدو
الداير انبساط حبل القناعة يمدو
والسايقة بتصل وباقي الولف ليك ردو

أمونه حسن
========
الحزن يالسمحه أريتو مايبراكـــــــــــي
يضر لي الـــــغدار غلط معاكــــــــــــي
ماتبري الحزن انسيهو زيدي في نماكي
اقدلي بي فرح تراهم كلهم معاكـــــي

Hafiz Alamin
============
كم ارشدنى فى الدنيا الوشيها عبوس
فى تنـــظيم حياتى جاتنى منو دروس
رافع الكــف سائل الاله الواحد القدوس
يعوضو شبابو ويصبح مسكنو الفردوس

Msaad Yousif
============
البركة فيكم وربي يطايب النفوس
اصلها قرار الدنيا ام خراب دار العبوس
كم شالت ولدا صغيرة مراة عروس
شاحد الله الكريم منزلتو جنةالفردوس

أمونه حسن
===========
اللهي يجعل سكون المفقود الجنه
منو المات يا الحافظ أخويا لا تمحنا
بشوفك لبست أسود سواد الحنه
ورنا ليهو ندعي ليه معاك كمان بالجنه

Hafiz Alamin
===========
فى وداعة الله يا ابراهيم سند الحله
نعشك مـنو فى ارض الجنان تدلــى
عاشرتك سنين عمرك منافى الذله
رادمو على قفاك حمل الضعيف الزلّ

الهمباتي الأغبش
===============
الدموع تنزل تقطر مني مابتوصف مواجع
الانين الفي الصدور اصلو ياخلايا قالع
خربان ام رماد ديمة يوت براقا شالع
الف رحمة ونور عليه انت فينا برضو راتع

Hafiz Alamin
==============
يـبـكيك الكرم وايـضا" فعايل السمته
يبــكنــك هــمـايلا" بى لـزومن قمتا
ماقــفلتا بــابك مــن مـجـاورك ونمتا
شلتا الشيل مطبق للعشير مالمتا

الهمباتي الأغبش
============
ياهو الليك يحجي تالاك وين ماقمتا
حكار لي القيم كل المكارم حزتا
غرارة ام قدود من كوشا ما تعشمتا
سائل الله الكريم في الجنة تب تنختا

Hafiz Alamin
===========
اصلها فانيه خربانه وبناها مهدم
جفاله وعكوس بتصد بعد تتقدم
حليلو العلى ضهرو الحمل بتردم
حكم الله مطاع نرضاهو مابنتندم.

Msaad Yousif
============
الليلة النمة حزنانة تبكى وتنوح
رابطة الحزامة تب والقلب مجروح
سوت البكاء وصف وبالايادى تلوح
بيها الفقد فقد جنايا وجهة صبوح