مجادعات النمة84

Hafiz Alamin
==========
يارب الخميس يصل ويتسارعن ساعاتو
يظهر نمر الفروع شعدينابى فى ساحاتو
ياخريف وادينا عطشانين نلاقى هـــباتو
يملى النمه فرح يسعدنا شهـد غفشاتو

الهمباتي الأغبش
============
والله الخميس اصبح عديل بسطتنا
في جيتو بنشوف زولا نحيل عمدتنا
جابراهو الظروف مجبور علي مطتنا
ويا خالد تعال شايلة الجديد نمتنا

Hafiz Alamin
==========
خفيف الروح البيهو يتعدل مايلنا
سليم الذوق ال بالفرح شايلنا
راجين حضورك بالونس يشملنا
يلاك اسرع وراكا نحنا هــملنــا

الهمباتي الأغبش
==========
كتر الشوق علي يالاتبراوي يشفق
والنم الرصين يوت من قفاك مدفق
الزول دون خميس يطرب معاك يصفق
والراجيك كتير لي ردو اوعة تلفق

Hafiz Alamin
===========
شوق موصول من خليج فارس لى ابو سليم
يصــلك ياالــزعيم يلـفاك تــمام وسلـــــيـم
يقـــولك يـــــوم الخميس تجينا تابى هميم
نفــرح ونبســط نمــلى النمه غناء وترنيم..

الهمباتي الأغبش
==========
خت في البال كمان كوم الشمارات ديكا
نضحك وننبسك اسكاي بي جاهز ليكا
الشبكة ان بقت طفشانة شر جــاييكا
وساعة تنعدل حــــــافظ بيضحك فيكا

Hafiz Alamin
===========
الهمباتى يجهز فى الاجنده اللاتو
قال ينتظم راجــى الاجتماع جــياتو
نتناقش بى مهل نشوف عدلو وزاتو
ونشوف امر الغياب لابد نعيد ذكراتو

الهمباتي الأغبش
===========
الهمباتي مسكين ليهو انتو تعقرو
في حتة غياب لموه ضابحين تقرو
راقدين الــــــفحول اللي غيابن درقو
ماكن ناس مجاملة ولا ضعيف بتحقرو

Hafiz Alamin
============
الــهمــباتى ضــونا البيـهـو دربنا نسدرو
ان غاب كيفن فى النمه الطريق بنخبرو
فى المثــل القــديم حــكمه بيها نزكـرو
ومعروف فى الليلة الظلماء يفتقد البـدرَ...

Khalid Alahmady
=============
الدنيا المسجمه دايما مقصره فيني
والجري في المعايش دايما مكتربيني
كلما أغيب أستحي وأقول تاني شن موديني
ألقاكم ياصحابي أقوانا كتيره مدخلينها فيني

Mahmoud Algaily
=============
كلو نسيتو من زمنا بعيد بخرتو.....
و مخي وهبتو لي ذكر الكلام سخرتو..
عضم الراس بعد فكرت فيهو نخرتو..
ما إتذكرت منو ولا حرف دخرتو..

Hafiz Alamin
==========
طال السهاد على ولذيذالمنام فارقتـو
مربوع القوام لاطول لا واضحه قصـرتـو
الخلانى مضيوم ودموعى فينى يخرتو
جبينا" يشلـع ضـاربه فى الفؤاد كهربتو

عبدالله الهرع
============
خريف النمه حافظنا ودليل معنانا
مالا الصوره مدموسه ومغطى بكانــــا؟
محياك البهيج! ينسى النفوس احزانا
شعاع النـمه والهـامنا البغـذي غنـــانا

الهمباتي الأغبش
===========
الحافظ اخوي فــــــــــاقد عزيزا ليهو
ختفو الموت ضحي سود حزن طاليهو
اتبلم سواد بان في غناهو عليهو
ليه الرحمة يوت وحافظ صبر طاويهو

Hafiz Alamin
==============
فارقتا الفرح وكبسن على اتراح
رحل مات الشلبى السخى ومصباح
ابراهيم سائل الكــريم الواحد الفتاح
مرضــك كفاره ويبقالك للجنان مفتا

Khalid Alahmady
=============
هسع جاني الخبرووالله تب متألم
ياحافظ الله ينزل البركات فيكم وفيناتعم
وابراهيم نسألوالقبول وفي جنة عدن متنسم
ينور قبرو بالأنوار وعليهوتب مايضلم

Hafiz Alamin
===========
تسلم ياالعمده وفى شينه مامردوده
يــاود الاصــول اهل المهــر والخوده
شوقا" ليكا زايد النمه بيــهو شهوده
لــى لــقاك حاسبين الايام معدوده

Waleed Abzeed
============
اخوى ضرس المصايب وكتين تدق اجراسه
لحاق بعيد وقريب سيد القبيله وساسه
جبل الثبات وعر الخشاش المابتهزو فراسه
ودالمك صحيح كبر الهجايم داسه

لهمباتي الأغبش
==========
اخوي جبل الكحل اللي الشقوق حراسه
مو زول فارغة تب ولامعدود كمان من ناسه
الكرم الاصيل تالاهو بل زايد عليهو فراسه
حافظ ياك صمد في الحارة قـــاطع فاسه

Mosaab Ahmed Omer
===============
أقول ما دام حبيبي وحـب يتناسانـي
مافيش فايدة للبكا والنبيح يـا لسانـي
أنا في حوجة لي فقرا وطبيب نفساني
كونو غميدي قل ونومي زي حسساني

الهمباتي الأغبش
==========
البكا والوحيح فوقو القليب رساني
يامصعب خلاص توب الحزن كساني
السبب البودر نضمي في الهمساني
بدور الشوفة لكن الظروف تارساني

Msaad Yousif
============
قيام الليل ناسو شوية تب ماكتار
ضربهم للرقاب قليم ماتكبر فرار
ات واحد منهم يا الجدك بجيب التار
شوف عين عديل فى وضح النهار

الهمباتي الأغبش
==============
فج هناك صقر الخوة شاقي عصار
غاب من الفريق اللي الشروك هبار
ضارب الصي ضحي عقبا تلاهو نهار
ونص الليل مغرز سنو في الاشعار

محمد احمد احمد
==========
الهمباتى اخوى يا صاحب الأشعار
صبحك يكون جميل داعيلك الغفار
يديك السرور والصحه وإبنا" بار
وبعدين فى الجنان تسكن مع الأبرار